Read Batak Angkola 2 JUJUR TAON 35 Bible Online

2 JUJUR TAON 35 - Batak Angkola bible

2 JUJUR TAON 35

¹Dung i dipestahon si Josia ma Paskah di Jerusalem laho pasangapkon TUHAN. Disambol ma biri-biri sipakeon di pesta i di tanggal opat bolas bulan sada.

²Dibagihon si Josia ma tu angka malim angka karejo sikarejohonon ni halahi di Bagas Ni Debata, jana disosoi ia ma anso denggan dikarejohon halahi.

³Laing dilehen si Josia ma parenta tu angka halak Levi na dung dihapunjungkon tu TUHAN, dohot na gabe guru-guru ni Israel. Didok ia ma, “Baen hamu ma Poti Parjanjian ni Tuhan na badia i di bagasan Bagas Ni TUHAN na nipajongjong ni Raja Salomo anak ni si Daud i. Ulang pola be paimbar-imbar hamunu i. Oloi hamu ma TUHAN Debatamunu i dohot halak Israel bangsoNa i.

⁴Kehe ma hamu tu Bagas Ni Debata tu inganan na ditontuhon di horongmunu jana marhobas ma hamu mandalankon karejo na ditotopkon ni Raja Daud dohot anakna Raja Salomo i tu hamu.

⁵Atur hamu ma karejo i sanga na bia anso laing adong sian hamu na bolas manolong ganop rombongan ni halak Israel.

⁶Angkon hamu do manyambol hambeng dohot biri-biri Paskah i. Jadi hara ni i angkon mangias diri do hamu mangihutkon ugamo, jana paradehon haul anso tarbaen angka halak na sian dongan sabangsomunu mandalankon sanga aha na niparentahon ni TUHAN marhite si Musa.”

⁷Baen sipakeon ni angka halak na dohot di pesta Paskah i, disumbangkon Raja Josia ma sian pahan-pahanannia sandiri tolu pulu ribu biri-biri, anak ni biri-biri dohot hambeng jara jara, dohot tolu ribu lombu jantan.

⁸Angka pagawe ni si Josia pe mangalehen sumbangan do tu angka malim, jana di halak Levi sian sude rayat i. Sian angka pagawe na gabe hasahatan ni tanggung jawab di Bagas Ni Debata i, i ma Malim Godang Hilkia, si Zakaria dohot si Jehiel, dilehen halahi na tolu ma tu angka malim dua ribu onom ratus anak ni biri-biri dohot hambeng bajar dohot lombu jantan tolu ribu gabe haul situtungon di pesta i.

⁹Angka pamimpin halak Levi, i ma: Si Konanya, si Semaya, si Netaneel, na martinadohon, si Hasabia, si Jeiel dohot si Josabad, dilehen halahi ma tu halak Levi lima ribu anak ni biri-biri dohot hambeng bajar, lima ratus lombu jantan, na gabe sihaulkonon di pesta i.

¹⁰Dung hobas sude na laho marpesta Paskah i, marsibuat ingananna ma angka malim dohot halak Levi hombar tu na niparentahon ni raja i.

¹¹Dung i disambol halahi ma pahan-pahanan sipakeon di pesta Paskah i; halak Levi ma mambobahina jana angka malimma mamispiskon mudarna i tu ginjang ni langgatan.

¹²Ganop keluarga na dohot ro disi maruli do sada sian pahan-pahanan na giot sihaulkonon i gabe haul mangihutkon aturan na tarsurat di Buku Uhum Ni si Musa.

¹³Dung i ditutungi angka halak Levi i ma haul Paskah i di ginjang api, hombar tu paraturan, jana dibolgang halahi ma angka haul na mardohonan di bagasan hudon, huali dohot panci, dung i diompot ma mambagi-bagihon juhutna i tu angka jolma i.

¹⁴Dung salpu i baru ma anso diparade halak Levi na di halahi sandiri dohot na di angka malim pomparan ni si Harun. Harana, torus do anggo malim markarejo lopus borngin manghaulkon angka haul i.

¹⁵Anggo angka parmusik na sian horong ni si Asap na di Marga Levi i di inganan parkarejoanna do halahi, i ma na dung ditontuhon ni Raja Daud di halahi. Angka on ma goar ni halahi: Si Asap, si Heman dohot si Jedutun, sada halak na markarejo di raja i. Angka pangawal ni pintu-pintu horbangan nada porlu manadingkon ingananna, harana bolas do halahi mamestahon Paskah i di inganan ni halahi markarejo marhite bantuan ni angka halak Levi na deba nari.

¹⁶Dipatulus halahi ma di ari i sasude na niparentahon ni Raja Josia laho mamestahon Paskah i, dohot ma i na manghaulkon di langgatan.

¹⁷Sude do rayat na dohot ro tusi mamestahon Paskah i jana pitu ari lolotna halahi mamestahon Pesta Roti Na So Marragi i.

¹⁸Nada jungada be dipestahon Paskah na songon i mamungka sian hatiha ni Panurirang Samuel. Sada halak pe nada adong sian raja-raja na salpu i na jungada mamestahon Paskah i songon na dipestahon

¹⁹di taon pasalapanbolaskon mamarenta si Josia, na nibaen ni Raja Josia rap dohot angka malim, halak Levi, halak Juda dohot Israel, maradu halak na maringanan di Jerusalem.

²⁰Dung sidung dipatupa Raja Josia sudena i baen di Bagas Ni TUHAN, diarahon si Neko raja ni Mesir ma pasukannia laho marporang di Karkemis na di lambung ni Batang aek Efrat. Dicubo si Josia do laho mangambati ia,

²¹tapi ditongos si Neko ma barita songon on tu si Josia, “Nada mardais tu ho, raja ni Juda, porang on! Nada ho na hualo umbaen na ro au, tapi na giot mangalo angka musungku do, jana disuru Debata do au anso huompoti sude. Debata do mandongani au, hara ni i ulang ambati au, dironcohon Ia lalu ho.”

²²Tapi laing karas do si Josia laho mangalo. Nada ra ia mangihutkon na nidok ni Debata marhite Raja Neko i. Pauba rupa ma ia jana kehe ia masuk tu parporangan na di tano napa Megido.

²³Hona pana ma Raja Josia di parporangan i. Jadi diparentahon ia ma angka naposonia anso maroban ia ruar sian parporangan i harana banga do gasania i.

²⁴Diangkat halahi ma ia sian karetania i jana dipaimbar tu kareta na asing na adong disi, dung i dioban ma ia tu Jerusalem. Disi ma marujung ngolunia jana dikuburkon di kuburan ni raja-raja. Marsiluluton ma sude rayat ni Juda dohot Jerusalem hara ni hamamatenia i.

²⁵Dikarang Panurirang Jeremia ma sada ende andung di Raja Josia. Lopus tu sadari on dipake angka parende do ende i di Israel, halaklahi bope dadaboru di parningotan siluluton tu si Josia. Dipamasuk do ende i tu bagasan parpunguan ni angka ende andung.

²⁶Barita na asing salaho tu si Josia, holong ni rohania tu Tuhan, pangoloionnia tu Tona Ni TUHAN,

²⁷pendekna sude parsorionnia sian mulana lalu tu ujungna, disuratkon do i sude di bagasan Buku Sejarah Ni Raja-raja Ni Israel dohot Juda.