Read Batak Angkola 2 JUJUR TAON 36 Bible Online

2 JUJUR TAON 36 - Batak Angkola bible

2 JUJUR TAON 36

¹Dipili rayat ni Juda ma si Joahas anak ni si Josia, jana diangkat ma ia gabe raja di Jerusalem manggontihon amangnia i.

²Marumur ma si Joahas dua pulu tolu taon di na gabe raja ni Juda ia, jana tolu bulan lolotna ia mamarenta di Jerusalem.

³Ditangkup si Neko raja ni Mesir i ma si Joahas jana dioban ma ia tu Mesir, lalu disuru ma Juda manggarar dangdang 3.400 kilogram perak dohot 34 kilogram sere. Dung i diangkat si Neko ma si Elyakim angkang ni si Joahas gabe raja, jana digonti ia ma goar ni si Elyakim gabe si Joyakim. Dung i dioban ia ma si Joahas tu Mesir.

⁵Marumur dua pulu lima taon ma si Joyakim di na gabe raja ni Juda ia, jana sabolas taon ia mamarenta di Jerusalem. Mardosa do ia tu TUHAN Debatania.

⁶Di na nitaluhon ni si Nebukadnesar raja ni Babel i Juda, ditangkup ia ma si Joyakim jana dioban ma ia tarrante tu Babel.

⁷Dioban si Nebukadnesar ma deba barang-barang sigodang arga na sian Bagas Ni TUHAN jana dibaen ia ma i di bagasan bagas godangnia di Babel.

⁸Barita na asing salaho tu si Joyakim, angka pambaenannia na hodar i dohot angka hajahatannia, disuratkon do i di bagasan Buku Sejarah Ni Raja-raja Ni Israel dohot Juda. Si Joyakin anaknia ma gabe raja manggontihon ia.

⁹Marumur salapan bolas taon ma si Joyakin di na gabe raja ia di Juda, jana mamarenta ia di Jerusalem tolu bulan sampulu ari lolotna. Ia pe mardosa do tu TUHAN.

¹⁰Di pargontian ni taon, dioban si Nebukadnesar ma si Joyakin tu Babel gabe tahanan, jana dohot do angka barang sigodang arga na adong di Bagas Ni TUHAN dioban ia muse. Dung i diangkat si Nebukadnesar ma si Zedekia angkang ni si Joyakin gabe raja di Juda dohot di Jerusalem.

¹¹Marumur dua pulu sada taon ma si Zedekia di na gabe raja ia di Juda, jana sabolas taon lolotna ia mamarenta di Jerusalem.

¹²Ia pe mardosa muse do tu TUHAN. Nada ra ia patoruk rohania jana nada diihutkon ia Panurirang Jeremia na palaluhon tona na sian TUHAN.

¹³Dipaksa Raja Nebukadnesar ma si Zedekia marsumpa mangasahon Debata paboa na setia noma ia. Tapi di pudi, mangalo ma si Zedekia tu si Nebukadnesar. Sian angka dosania i pe nada ra muba si Zedekia. Jogal do rohania maradopkon TUHAN, Debata ni Israel jana nada ra ia mulak tu TUHAN.

¹⁴Tamba ni i, dipahodar angka pamimpin ni Juda, angka malim dohot rayat do Bagas Ni TUHAN na dung dihapunjungkon tu TUHAN i sandiri, harana dohot do antong halahi sandiri marsomba gana-ganaan dohot mangihutkon parngoluon na mardosa songon angka bangso na asing na humaliang halahi.

¹⁵Marpupu do nian disuru TUHAN, Debata ni ompu ni halahi angka utusanNa laho paingotkon bangsoNa i, dibaen holong do rohaNia mida halahi dohot BagasNia i.

¹⁶Hape diparmayam-mayam halahi do angka utusan ni Debata i, dipartatai halahi angka panurirangNia jana nada ditangihon halahi hatana. Ujungna sun ma muruk ni TUHAN tu halahi jadi gabe nada adong be dalan ruar di halahi.

¹⁷Digorakkon Tuhan ma roha ni raja ni Babel anso mamorangi halahi. Dibunu raja i ma doli-doli ni halak Juda, dohot ma i na di bagasan Bagas Ni Debata. Sada halak pe nada adong na ibo rohania midasa, na matobang sanga na poso, halaklahi sanga dadaboru, na marnyae sanga na horas. Dipasahat Debata do halahi sudena tu raja ni Babel i.

¹⁸Sude do dirampas raja ni Babel i angka parkokas ni Bagas Ni TUHAN dohot angka barang-barang sigodang arga, songon i dohot sinadongan ni raja dohot angka pagawena i lalu dioban tu Babel.

¹⁹Ditolbakkon ia ma tembok ni kota Jerusalem jana disurbu ia kota i dohot Bagas Ni TUHAN maradu bagas godang maradu sude angka barang sigodang arga na adong dope di bagasan angka bagas godang i.

²⁰Rayat na malua, dioban ia tu Babel. Gabe hatobannia ma disi halahi jana hatoban ni pomparannia lopus tu hatiha ni harajaan Persia markuaso.

²¹Songon i ma tulus tarjadi na nidok ni TUHAN marhite si Jeremia na mandok angkon hiang luat i pitu pulu taon lolotna songon gonti ni angka taon Sabat[6] na so dirohahon i.

²²Di taon parjolo mamarenta si Kores raja ni Persia, dipatulus TUHAN ma na nidokNia marhite Panurirang Jeremia. Digorakkon TUHAN ma roha ni si Kores laho mangharuarkon sada parenta na disise di sude harajaannia. Songon on ma hatana:

²³“On ma parenta ni si Kores, raja ni Persia! Madung dibaen TUHAN, Debata na markuaso di banua ginjang au gabe raja di portibi on sudena, jana disuru Ia do au laho mambangun bagas diSia di Jerusalem na di Luat Juda. Jadi, saonnari hamu sudena anggota ni bangso ni Debata, angkon mulak hamu tusi! Sai didongani TUHAN Debatamunu i ma hamu.”