Read Batak Angkola 2 JUJUR TAON 4 Bible Online

2 JUJUR TAON 4 - Batak Angkola bible

2 JUJUR TAON 4

¹Disuru Raja Salomo ma anso dibaen sada langgatan loyang rap sambilan meter ginjangna dohot bidangna, jana gincatna opat satonga meter.

²Laing dibaen muse dope sada bak loyang na tingko, bagasna 2,2 meter, langka tongana 4,4 meter, jana langka humaliangna 13,2 meter.

³Humaliang topina i sian ruar dihias ma i dohot gambar ni lombu dua baris, na dicor rap dohot sambong i.

⁴Dibaen ma inganan ni bak i di ginjang ni tanggurung ni dua bolas lombu na sian loyang — tolu ma i adop Utara, tolu adop Selatan jana tolu adop Habincaran.

⁵Hapal ni bak i 75 millimeter. Topina i tarsongon bibir ni mangkuk na marlengkung do tu ruar suman tu bunga bakung na kombang. Masuk do disambong i hira-hira 60.000 liter.

⁶Laing dibaen Raja Salomo dope sampulu sambong na godang, lima ma i sibaenon di sabola Selatan ni Bagas Ni TUHAN i, jana lima nari di sabola Utarana. Guna ni angka sambong i, i ma inganan pamasuan ni angka juhut ni binatang na niponggolan na giot situtungon gabe haul. Anggo aek na di sambong na godang i, di angka malim do haporluan ni i laho mangias dirina.

⁷Laing dibaen ia muse do sampulu pat ni parlampuan sian sere mangihutkon potongan ni na dung disangkapi humani, dohot sampulu meja. Sudena pat ni lampu i dohot meja i di ruangan tonga ni Bagas Ni TUHAN i do i dibaen; lima ma i di siambirang, jana lima ma i di siamunna. Laing dibaen dope saratus mangkuk sere.

⁹Laing dibaen Raja Salomo muse do sada alaman di bagasan baen di angka malim dohot sada alaman di ruar. Angka pintu ni horbangan antara ni alaman na dua i dilampis do dohot loyang.

¹⁰Anggo bak i di lambung ni suhi na adop Tenggara ni Bagas Ni TUHAN i do i dibaen.

¹¹Dibaen si Hiram kapala ni tukang i ma huali, sodok dohot angka mangkuk. Jadi sidung ma sude dipauli ia panjamaan di Bagas Ni TUHAN hombar tu na nijanjihonnia tu Raja Salomo. Angka on ma parkokas i: Dua tiang na godang Dua kapala tiang na dipasang di ujung ni tiang i dua-duana Rante na dibayu di ganop kapala ni tiang i Opat ratus dalimo loyang na disusun dua baris, ganop baris ma i saratus dalimo, humaliang puyuan ni rante di ganop ulu ni tiang i Sampulu kareta Sampulu sambong na godang Bak Dua bolas lombu tumbaga na manahan bak i Angka huali, sodok-sodok dohot angka garpu. Sian loyang do sude parkokas i dibaen si Hiram, digosok ia ma i sude lopus marlinang. Hombar tu parenta ni Raja Salomo do i sudena dipauli ia baen di Bagas Ni TUHAN.

¹⁷Disuru raja i ma dipauli angka barang-barang i di panuangan antara ni Sukot dohot Zareda na di Rura Jordan.

¹⁸Hara ni bahatna angka barang-barang i, gabe nada adong sahalak pe na umboto sanga na piga kilo bahat ni loyang na hona pake tusi.

¹⁹Disuru Raja Salomo muse dope paulihon angka parkokas na asing sian sere na polin sipakeon di Bagas Ni TUHAN. I ma: Langgatan Angka meja inganan ni roti radean Sude pat ni parlampuan dohot lampuna sian sere na matobang, i ma sipagaraon di jolo ni Bilik Na Sun Badia, hombar tu sangkap hian Angka hiasan na songon bunga Angka lampu Gampit-gampit ni api Pangintopi ni lampu Angka mangkuk Pardupaan Inganan ni banggar Sude pintu ruar ni Bagas Ni TUHAN dohot pintu ni Bilik Na Sun Badia na dilampis dohot sere.