Read Batak Angkola 2 JUJUR TAON 5 Bible Online

2 JUJUR TAON 5 - Batak Angkola bible

2 JUJUR TAON 5

¹Dung sidung dibangun Raja Salomo Bagas Ni TUHAN i, disimpan ia ma sude sere, perak dohot angka barang na asing na nihaulkon ni si Daud tu TUHAN di angka gudang na di Bagas Ni TUHAN i.

²Dung i disuru Raja Salomo ma sude pamimpin ni marga dohot horong sian bangso Israel anso ro tu Jerusalem laho mangalap Poti Parjanjian ni TUHAN i sian Sion, Kota Ni si Daud, jana marobansa tu Bagas Ni Debata.

³Jadi marroan ma halahi sude di Ari Pesta Undung-undung Bulung Rata.

⁴Dung marlagut sude pamimpin i, diangkat halak Levi ma Poti Parjanjian i,

⁵jana dioban ma tu Bagas Ni Debata. Bandar Ni TUHAN i pe dohot sude parkokasna dioban angka malim dohot halak Levi i do tu Bagas Ni Debata.

⁶Dung i marlagut ma Raja Salomo rap dohot sude rayat ni Israel di jolo ni Poti Parjanjian i lalu dihaulkon halahi ma tu TUHAN biri-biri dohot lombu nada taretong be hara ni bahatna.

⁷Dung salpu i dioban angka malim ma Poti Parjanjian i tu bagasan Bagas Ni Debata jana dipayakkon halahi ma di toru ni kerub na di bagasan Bilik Na Sun Badia i.

⁸Manggistang ma habong ni kerub i manutupi poti i dohot hayu pamorsanna i.

⁹Ginjang do hayu pamorsanna i, jadi angkon di jolo ni Bilik Na Sun Badia i do iba jongjong muda giot mangaligi lalu tu ujung ni porsan-porsan i. (Lopus tu sadari on laing disi dope hayu pamorsan i.)

¹⁰Nada adong bagi aha di bagasan Poti Parjanjian i asing sian dua batu. Na dipamasuk ni si Musa do tusi batu i di Dolok Sinai, di na mambaen janji TUHAN dohot Israel dompak na mardalan dope halahi ruar sian Mesir.

¹¹Sude malim na adong disi sian sude rombonganna be madung markobas laho mandohoti upacara i. Sude parende dohot parmusik sian Marga Levi, i ma si Asap, si Heman dohot si Jedutun maradu sude halak na sian horong ni halahi, mamake pakean na sian abit linen. Jongjong ma halak Levi di sabola Habincaran ni langgatan i maniop simbal dohot hasapi. Adong do saratus dua pulu halak malim siombus sarune na rap dohot halahi. Mardomu ma ende ni angka parende dohot sora ni musik ni sarune, simbal dohot alat musik na asing i. On ma hata ni ende pujian ni halahi tu TUHAN, “Puji ma TUHAN, dibaen na burju do Ia. Hot do holong ni rohaNia sapanjangna.” Di na haruar angka malim sian Bagas Ni Debata i, ompot ma digohi sinondang tanda na ro TUHAN di Bagas i, jabat nada tartoruskon halahi be upacara i.