Read Batak Angkola 2 JUJUR TAON 6 Bible Online

2 JUJUR TAON 6 - Batak Angkola bible

2 JUJUR TAON 6

¹Dung i martangiang ma Raja Salomo, “TUHAN, jumop do rohaMu maringanan di hagolapan ni ombun.

²Saonnari hupajongjong di Ho bagas na songon bagas godang, ingananMu ma i songon bagas godang, ingananMu ma i salolot ni lolotna.”

³Dung sidung na martangiang i, dipaadop ia ma tu rayat i sude na marjongjongan disi, lalu dipangido ia ma pasupasu ni Debata tu halahi.

⁴Didok ia ma, “Na marjanji do TUHAN na salpu i tu damang si Daud songon on, ‘Mamungka sian na Huoban bangsongKi ruar sian Mesir lopus tu sadari on, nada adong sada kota pe na Hupili di tano Israel na gabe inganan laho mambangun bagas paribadatan tu Au, jana nada adong sahalak pe na Hupili laho mamimpin bangsongKu Israel. Tapi saonnari Hupili ma Jerusalem gabe inganan marsomba tu Au. Jana ho, Daud, Hupili laho mamarenta bangsongKu.’ Nipuji ma TUHAN Debata ni Israel na dung patuluskon janjiNa i!”

⁷Dung i dipatorus si Salomo ma mandok, “Madung nian disangkapi damang si Daud laho pajongjong bagas paribadatan di TUHAN Debata ni Israel.

⁸Tapi didok TUHAN ma tusia, ‘Denggan do maksud i.

⁹Tapi nada ho, anakmu do na giot pajongjongkon BagasKi.’

¹⁰Saonnari madung dipatulus TUHAN janjiNa i. Madung gabe raja au manggontihon damang, jana madung hupajongjong bagas paribadatan di TUHAN, Debata ni Israel.

¹¹Madung hubaen di bagasan Bagas Ni TUHAN, Poti Parjanjian na marisi batu parjanjian ni TUHAN dohot bangso Israel.”

¹²Madung dibaen si Salomo panggung sian loyang di tonga-tonga ni alaman ni Bagas Ni Debata. Ginjangna dohot bidangna 2,2 meter jana gincatna 1,3 meter. Manaek ma si Salomo tu panggung i di jolo ni rayat na hadir i jana jongjong ma ia adop langgatan i. Sude do halak marnidasa. Dung i jongjong di dugulnia ma ia lalu diangkat ia tangannia dua-dua jana martangiang.

¹⁴Ning ia ma, “O TUHAN, Debata ni Israel! Di langit dohot di tano, nada adong Debata na songon Ho! Dipatulus Ho do janjiMu jana dipatuduhon Ho do holong ni rohaMu maradopkon bangsoMu na setia jana burju mangoloi sian sasude rohana tu Ho.

¹⁵Dipatulus Ho do janjiMu tu damang si Daud; sadari on ma dipatulus Ho sude hata na hupajojor i.

¹⁶Laing dijanjihon Ho muse do tu damang, muda tutu do antong setia pomparannia mangoloi uhumMu laing songon ia i, gabe sai adong ma sada nian pomparannia na gabe raja di Israel. Saonnari ale TUHAN, Debata ni Israel, pangidoanku anso nian laing patulusonMu muse sudena na nijanjihonMu tu damang si Daud i.”

¹⁸“Tapi ale Debata, tutu dehe tarbaen Ho maringanan di tano on di tonga-tonga ni jolma? Salang sude pe langit i nada tuk bidangna di Ho, mur ma bagas paribadatan na hupajongjong on?

¹⁹O TUHAN Debatangku, naposoMu do au on! Tapi laing tangihon ma pangidoankon, ale TUHAN Debatangku jana patulus ma pangidoanku.

²⁰Sai jagohon ma arian dohot borngin bagas paribadatan na dung dipiliMon di Ho. Hara ni i, sai tangihon ma sian inganan parmiananMu di banua ginjang jana ampuni ma au dohot bangsoMon muda ro hami mangadop tu bagasMon jana martangiang tu Ho.”

²²“Muda adong halak na hona tuhas marsala maradopkon halak na asing jana dioban tu langgatanMu na di bagasan bagas paribadatan on laho marsumpa bahaso na so marsala ia,

²³ale TUHAN, sai tangihon ma i sian banua ginjang jana Ho ma mamutuskon parkaro ni angka naposoMon. Uhumi ma angka na marsala jana palua ma na so marsala.”

²⁴“Muda talu bangsoMu Israel dibaen angka musuna hara ni na mardosa halahi, lalu ro halahi mangido tolong tu Ho di bagasMon jana sian toruk ni rohana halahi martangiang mangido ampun tu Ho,

²⁵sai tangihon ma halahi sian banua ginjang. Sai ampuni ma dosa ni bangsoMon jana oban ma halahi mangulahi tu luat na dung nilehenMon tu ompu ni halahi.

²⁶Muda nada dipaijur Ho udan hara ni na mardosa bangsoMon tu Ho, dung i gabe muba roha ni halahi sian dosana i jana ro halahi mangadop tu bagas paribadatan on lalu martangiang sian toruk ni rohana tu Ho,

²⁷ale TUHAN na di banua ginjang, sai tangihon ma halahi. Jana ampuni ma angka dosa ni bangsoMu Israel. Ajari ma halahi mangkarejohon sanga aha na tigor. Dung i ale TUHAN, paro ma udan tu tanoMon, tu luat na dung nilehenMu tu bangsoMu anso gabe nampuna ni halahi salolot ni lolotna.”

²⁸“Muda masa di luat on haleon dohot bala, sanga disego-sego alogo na milas suan-suanan sanga bala siapor, sanga muda diporangi musuna bangsoMu, sanga hona nyae,

²⁹sai tangihon ma pangidoan ni halahi. Muda adong sada halak na marsak sian bangsoMu lalu ro ia martangiang tu Ho mangangkat tanganna adop bagasMon,

³⁰sai tangihon ma i sian bagasan parmiananMu di banua ginjang i jana ampuni lalu urupi ma halahi. Hum Ho do na mananda isi ni roha ni jolma. Jadi hara ni i, baen ma tu ganop jolma sanga aha na patut disia,

³¹anso mabiar bangsoMi jana mangoloi tu Ho salolot maringanan halahi di tano na dung nilehenMu tu ompu ni halahi.”

³²“Muda habegean tu sada halak na asing di luat na dao taringot tu hagodangan dohot hagogoonMu, jana na sai rade Ho mangurupi, jana gabe ro ia tu bagas paribadatan on laho martangiang tu Ho,

³³sai tangihon ma sian inganan parmiananMu di banua ginjang i tangiangnia i jana patulus ma pangidoanna i. Jadi laing songon bangsoMu Israel, gabe sude ma bangso na satano on mananda Ho jana burju mangoloi Ho, jana botoonna ma bahaso inganan paribadatan tu Ho do bagas na hubangun on.

³⁴Muda diparentahon Ho bangsoMu anso kehe marporang mangalo musu, jadi sanga na di dia pe halahi tinggal, mangadop halahi tu kota na nipiliMon jana martangiang halahi adop bagas na dung hupajongjong on di Ho,

³⁵sai tangihon ma sian banua ginjang tangiang ni halahi i jana lehen ma hamonangan tu halahi.

³⁶Muda mardosa bangsoMon tu Ho — tutu nian nada adong sada halak pe na so mardosa — jana hara ni murukMu gabe dipadiar Ho ditaluhon musu halahi jana dioban gabe taban tu luat na dao sanga na donok,

³⁷jana muda sian ias ni rohana jana marsitutu halahi manadingkon angka dosana di luat i jana martangiang tu Ho mangadop tu luat na nilehenMon tu ompu ni halahi, mangadop tu kota na nipiliMu dohot tu bagas paribadatan na dung hupajongjong on di Ho,

³⁹jadi sai tangihon ma tangiang ni halahi sian parmiananMu di banua ginjang i jana sai ibo ma rohaMu mida halahi; sai ampuni ma sude dosa ni bangsoMu.

⁴⁰Saonnari, ale Debatangku, pamanat ma halahi jana tangihon ma angka tangiang na dipasahat tu Ho sian inganan on.

⁴¹Jongjong ma Ho saonnari ale TUHAN Debata! Jana masuk ma nian Ho tu bagasan bagas paribadatan on rap dohot Poti Parjanjian na manggombarkon kuasoMon jana maringanan ma Ho dison lopus salolot-lolotna. Sai pasupasu ma sude parkarejoan ni angka malimMu jana sai martua ma sude bangsoMu hara ni burjuMu tu halahi.

⁴²Ale TUHAN Debata, ulang ma tulak tangiang ni raja na nipiliMon. Ingot ma holong ni rohaMu tu si Daud naposoMi.”