Read Batak Angkola 2 JUJUR TAON 7 Bible Online

2 JUJUR TAON 7 - Batak Angkola bible

2 JUJUR TAON 7

¹Dung sidung Raja Salomo na martangiang i, mijur ma api sian langit manutungi angka haul na dihaulkon i tu TUHAN. Jana digohi sinondang ni parmianan ni Tuhan ma Bagas Ni TUHAN i,

²jabat nada tarmasuhi angka malim be tu bagasan.

³Di na niida ni rayat ni Israel i mijur api sian langit dohot sinondang ni haroro ni TUHAN manggohi Bagas Ni TUHAN i, manungkap ma halahi tu lante i lalu marsomba dohot mamuji Debata, hara ni dengganNia dohot holong ni rohaNia na manongtong i sapanjangna.

⁴Dung sidung i, dipasahat Raja Salomo dohot sude halak na marlagut disi ma haul tu TUHAN.

⁵Na gabe haul pardamean dihaulkon si Salomo do 22.000 lombu dohot 120.000 biri-biri. Songon i ma dibaen si Salomo dohot rayat i sudena upacara na pasahatkon bagas paribadatan i tu Debata.

⁶Jongjong ma angka malim i di jongjonganna be paadop-adop dohot halak Levi na mamuji TUHAN dohot alat-alat musik na nibaen ni Raja Daud, lalu mangendehon, “Manongtong do holong ni rohaNa sapanjangna,” hombar tu na nidokkon ni si Daud. Diombus angka malim ma sarune, lalu marjongjongan ma rayat i sudena.

⁷Dung i dihapunjungkon ia ma bagian partonga ni alaman na di jolo ni bagas paribadatan i, lalu dipasahat ia ma disi haul situtungon haul gandum dohot tabo-tabo na sian haul pardamean i. Hara ni na mamenektu langgatan loyang i baen inganan ni sude haul i umbaen na songon i dibaen si Salomo.

⁸Dipatupa si Salomo dohot sude rayat i ma di Bagas Ni Debata i Pesta Undung-undung Bulung Rata pitu ari lolotna. Bahat sajo do halak na marlagut disi mamungka sian Dalan Hamat di Utara lalu tu batas ni Mesir di Selatan.

⁹Pitu ari lolotna na marlagut i halahi di upacara na pasahatkon langgatan i tu TUHAN, dung i pitu ari nari muse marpesta Undung-undung Bulung Rata. Di ari parpudi dibaen ma pesta panutupan

¹⁰jana ancogotna i, i ma di tanggal dua pulu tolu bulan pitu, disuru si Salomo ma halahi mulak. Marmoga-moga ma halahi hara ni sude na denggan na nibaen ni TUHAN tu bangsoNa Israel, tu si Daud dohot tu si Salomo.

¹¹Dung manjadi sude sidung dibangun si Salomo Bagas Ni TUHAN dohot bagas godang ni raja songon na dung disangkapinia,

¹²dipataridahon TUHAN ma mangulahi dirina tu si Salomo topet borngin-borngin. Didok TUHAN ma, “Madung Hutangihon tangiangmi, jana dohot on ma Hupabotohon anggo bagas na dung dipajongjongmon, na gabe inganan na mamunjung ma i laho maribadatan tu Au salolot ni lolotna.

¹³Muda nada Hupaijur udan sanga Hutongos siapor laho mangabiskon suha ni tano sanga Huparo nyae masa tu bangsongKu,

¹⁴dung i dipatoruk halahi roha ni halahi martangiang tu Au jana ditadingkon halahi pambaenanna na jahat i, jadi gabe tangihononKu ma tangiang ni halahi sian banua ginjang; ampunanKu ma angka dosa ni halahi jana baenonKu makmur mangulahi tano ni halahi i.

¹⁵Sai torus ma pamanatonKu bagas paribadatan on jana rade do Au manangihon sude tangiang na dipanaek di inganan on.

¹⁶Hubaen pe sudena i dibaen na dung Hutodo do inganan on jana Huhapunjungkon gabe inganan maribadat tu Au salolot-lolotna. ParrohahononKu jana jagohononKu do i sapanjangna.

¹⁷Muda songon amangmu si Daud i do ho burju mangoloi angka uhumKu jana dipatulus ho sude na Huparentahon tu ho,

¹⁸gabe patulusonKu ma janjingKi na tu amangmu si Daud i bahaso na sai tongtong adong sada sian pomparannia na gabe raja di Israel.

¹⁹Tapi anggo dilanggar ho dohot rayatmi angka uhum dohot angka parentangKu jana marsomba hamu tu angka debata,

²⁰gabe paruaronKu ma hamu sian luat na dung Hulehen on tu hamu. Bagas on pe na dung Hutotopkon gabe inganan maribadat tu Au, tinggalkononKu ma. Sanga na di dia pe layasan ma bagas paribadatan on jana gabe sipartataan.”

²¹Jana Bagas paribadatan na dipasangap on saonnari, gabe mambaen longang halak na mamolus dison jana tarsonggot. Dokkonon ni halahi ma, “Biasi songon i baenon ni TUHAN ulaning tu luat on dohot tu bagas on?”

²²Jadi gabe alusan ni halak ma, “Hara ni na nitadingkon ni halahi do TUHAN Debata ni halahi na dung manaruhon ompu ni halahi haruar sian Mesir. Marsomba jana marjanji do halahi mandok setia tu angka debata. I do dalanna umbaen na diparo TUHAN sitaonon on tu halahi.”