Read Batak Angkola 2 JUJUR TAON 8 Bible Online

2 JUJUR TAON 8 - Batak Angkola bible

2 JUJUR TAON 8

¹Dua pulu taon lolotna si Salomo na mambangun Bagas Ni TUHAN dohot bagas godang ni raja i.

²Dibangun ia ma mangulahi angka kota na nilehen ni Raja Hiram disia, lalu disuru ia ma halak Israel maringanan disi.

³Ditaluhon ia ma daerah Hamat dohot Zoba

⁴dohot dipatogu ma kota Tadmar na di halongonan, lalu dibangun ia ma mangulahi sude gudang panyimpanan ni bohal na di Hamat.

⁵Dibangun ia mangulahi kota Bet-Horon Dolok dohot Bet-Horon Lombang gabe kota na marbenteng marhorbangan na marpalang pintu.

⁶Laing dibangun ia muse ma mangulahi kota Baalat dohot sude kota panyimpanan ni bohal, maradu angka kota parpunguan ni kareta porang dohot kudona. Madung dipatulus ia sude sangkap taringot pambangunan ni Jerusalem, Libanon dohot di sude luat na nirajaannia.

⁷Sude pomparan ni halak Kanaan na so dibunu ni halak Israel di hatiha na mangarampas luat i halahi, diarahon si Salomo ma i markarejo paksa. I ma angka halak Het, Amori, Peris, Hewi dohot Jebus. Lopus saonnari laing hatoban do pomparan ni halahi.

⁹Anggo halak Israel nada dohot disuru karejo paksa, dibaen madung tugas ni halahi gabe parajurit, perwira, komandan ni kareta porang dohot tentara pasukan na markudo.

¹⁰Dua ratus lima pulu halak pagawe na gabe hasahatan ni tanggung jawab tu angka jolma na mandalankon karejo paksa i di angka proyek pambangunan na marragam.

¹¹Dipapinda si Salomo ma dadaborunia, boru ni raja Mesir i sian Kota Ni si Daud tu bagas na dipajongjong disia. Didok si Salomo do, “Nada tola tinggal dadaborungku di bagasan bagas godang ni si Daud, raja ni Israel i, harana sude inganan na dung jungada hapayahan ni Poti Parjanjian i, inganan na badia do i.”

¹²Dipasahat si Salomo ma haul situtungon tu TUHAN di ginjang ni langgatan na nibangunnia di jolo ni Bagas Ni TUHAN i.

¹³Mangihutkon uhum ni si Musa do dibaen ia pasahatkon angka haul i di ganop ari pesta: Di Ari Sabat, Ari Pesta Bulan Baru, dohot ari pesta na tolu siganop taon, i ma Ari Pesta Ni Roti Na So Marragi, Ari Pesta Paskah, dohot Ari Pesta Undung-undung Bulung Rata.

¹⁴Hombar tu angka aturan na nibaen ni si Daud amangnia i, dibagi si Salomo ma karejo ari-ari ni angka malim dohot halak Levi na mangurupi angka malim di na mangkarejohon dohot na mangendehon puji-pujian. Songon i muse angka pangawal ni Bagas Ni TUHAN i, dibagi ia do i marrombongan-rombongan di ganop pintu horbangan, hombar tu na niaturkon ni si Daud naposo ni Debata i.

¹⁵Sude na niaturkon ni si Daud tu angka malim dohot halak Levi salaho tu angka gudang dohot na asing-asing, tangkas do dipadalan.

¹⁶Jadi salose ma proyek pambangunan na disangkapkon ni si Salomo i. Madung denggan dikarejohon sude parkarejoan mamungka sian na mamasang pondasi lopus tu na sidung Bagas Ni TUHAN i.

¹⁷Dung salpu i, kehe ma si Salomo tu Esion-Geber dohot tu Elot, i ma kota labuan di topi ni Dolok Akaba na di tano Edom.

¹⁸Ditongos Raja Hiram ma tusia angka kapal rap dohot anak buania sandiri dohot angka anak kapal na marpangalaman. Marlayar ma halahi rap dohot anak bua ni si Salomo tu tano Ofir laho mambuat lima bolas ribu kilogram sere lalu dioban ma i tu si Salomo.