Read Batak Angkola ESRA 4 Bible Online

ESRA 4 - Batak Angkola bible

ESRA 4

¹Tarbege do tu musu ni halak Juda dohot Benyamin barita bahaso na mambangun angka halak na tarbuang i hian, i ma Bagas Ni TUHAN, Debata ni Israel.

²Jadi gabe didapotkon halahi ma si Zerubabel dohot angka kapala ripe ni horong-horong, lalu diusulkon halahi ma, “Paloas hamu ma hami dohot mambangun Bagas Paribadatan i, harana hami pe na mangoloi tu Debatamunu i do, laing songon hamu ale angka dongan. Sai tongtong do hami pasahatkon haul tuSia mamungka sian na nioban ni si Esarhadon raja ni Asur hami tuson.”

³Tapi dialusi si Zerubabel, si Josua dohot kapala ni horong-horong i ma, “Nada porlu di hami bantuanmunu laho mambangun Bagas di TUHAN Debatanami. Hami sandiri do giot mambangun i hombar tu na niparentahon ni si Kores, raja ni Persia i tu hami.”

⁴Dipagale halak na dung lolot maringanan disi ma roha ni halak Jahudi boti dipabiar-biar halahi anso diantak pambangunan i.

⁵Disogok halahi ma angka pejabat ni pamarenta Persia anso laing disundati sangkap ni halak Jahudi i. Torus do sai songon i salolot Raja Kores mamarenta lopus tu na mamarenta Raja Darius.[1]

⁶Di parmulaan ni Raja Ahasweros mamarenta, mambaen surat gugatan ma angka musu ni halak Jerusalem dohot Juda.

⁷Songon i muse di hatiha ni si Artahsasta mamarenta, mangulahi do i tarjadi: Mambaen surat ma si Bislam, si Mitredat, si Tabel dohot dongan ni halahi tu raja. Di hata Aram do dibaen surat i, jana angkon diterjemahkon do hatiha manyisena.

⁸Laing dijagit si Artahsasta muse do surat salaho tu Jerusalem. Na nitongos ni Gubernur Rehum do surat i dohot si Simsai sekretaris propinsi dohot angka donganna, angka panguhum dohot angka pajabat na asing na marasal sian Erek, Babel dohot Susan na di tano Elam,

¹⁰dohot angka bangso na asing na hona angkat dibaen si Asnapar Na Godang jana na disuru maringanan na hot di kota Samaria dohot di angka kota na asing na di propinsi Efrat Hasundutan.

¹¹Songon on ma hata ni surat i, “Tu adopan ni Raja Artahsasta, sian angka naposo ni raja i na maringanan di Efrat Hasundutan. Horas ma!”

¹²“Diarop roha torang di raja i taringot tu halak Jahudi na dung manadingkon angka luat na asing di bagasan harajaan ni raja i, saonnari madung hot halahi maringanan di Jerusalem jana topet ma halahi mangulahi mambangun kota na jahat boti na sai tagi mangalo i. Madung dipungka halahi mangulahi pajongjongkon angka tembokna jana nada sadia honok nari be anso sidung.

¹³Anggo jabat do lalu sidung dipajongjong, indangkon na ra be halak na maringanan disi manggarar pajak. Jadi gabe murak ma pandapotan ni harajaan.

¹⁴Anggo hami na dung marutang budi do tu raja i jana nada giot hami marnida raja i hona hararugi. Jadi hara ni i hami usulkon,

¹⁵anso disuru raja i tangkasan arsip ni angka na umpompar raja i. Sian isi ni arsip i botoon ni raja i ma bahaso na tutu do kota Jerusalem na tagi mangalo jana sian najolo sai na mangarugihon tu angka raja dohot tu na markuaso di propinsi. Sai na tongtong do susa pimpinon halak pangisina i. I do dalanna umbaen na dironcohon kota i.

¹⁶Jadi yakin do hami, muda jabat do dibangun mangulahi kota i jana dipajongjong angka tembokna i, nada tarkuasoi raja i be muse anggo propinsi Efrat Hasundutan on.”

¹⁷Dibalos raja i ma songon on, “Mandapotkon Gubernur Rehum dohot si Simsai sekretaris propinsi maradu angka dongan ni halahi na maringanan di Samaria dohot di angka kota na asing di Efrat Hasundutan. Horas ma.

¹⁸Surat na nitongoskonmunu i madung diterjemahkon jana disisehon tu au.

¹⁹Jadi hara ni na huparentahon madung ditangkasi jana tutu ma antong tarbukti, sian narobi do Jerusalem sai na mangalo tu kuaso ni angka raja-raja jana bahat do sian halak kota i sipangalo dohot sibaen gaor.

²⁰Jungada do adong angka raja-raja na barani mamarenta disi jana mangarajai sude propinsi Efrat Hasundutan jana padalan pajak dohot bolaan.

²¹Jadi hara ni i, haruarkon hamu ma parenta laho mangantak karejo ni angka jolma i, anso ulang dibangun mangulahi kota i lopus tu na hulehen parenta na asing.

²²Manigor ma padalan hamu na huparentahon i anso ulang mur mabahat be harugianku!”

²³Dung dibasahon surat ni si Artahsasta i tu si Rehum, si Simsai dohot tu angka dongan ni halahi i, manigor ma halahi kehe tu Jerusalem jana dipaksa halahi ma halak Jahudi i mangantak karejo na mambangun kota i mangulahi.

²⁴Madung diantak mangkarejohon Bagas Ni TUHAN jana nada ditoruskon be i lopus tu taon paduahon mamarenta si Darius, raja ni Persia.