Read Batak Angkola ESRA 5 Bible Online

ESRA 5 - Batak Angkola bible

ESRA 5

¹Di hatiha i, mamungka mangkobari ma dua halak panurirang mangasahon goar ni Debata ni Israel tu halak Jahudi na maringanan di Juda dohot na di Jerusalem, i ma si Hagai dohot si Zakaria anak ni si Ido.

²Umbege tona ni panurirang na dua i, manigor dipungka si Zerubabel anak ni si Sealtiel ma dohot si Josua anak ni si Zosadak mangulahi mambangun Bagas Ni TUHAN na di Jerusalem, diurupi panurirang sidua halak i.

³Tapi manigor ro ma tu Jerusalem si Tatnai gubernur ni propinsi Efrat Hasundutan rap dohot si Setar Bosnai dohot angka dongan ni halahi manyapai tu angka halak Jahudi, “Ise marsuru hamu mambangun dohot mangkobasi Bagas Paribadatan on?”

⁴Laing disapai halahi do goar ni sude halak na mangurupi pajongjongkon Bagas Ni TUHAN i.

⁵Tapi diparrohahon Debata do angka pamimpin ni Jahudi i jana dijagahon Ia, jadi gabe diputuskon angka pejabat ni Persia i ma anso ulang mambaen tindakan painte so jolo manongos surat halahi tu si Darius jana manjagit balosanna.

⁶On ma lapuran na nitongos ni halahi tu Raja i,

⁷“Tu adopan ni Raja Darius. Sai di bagasan dame ma raja i mamarenta!

⁸Diarop roha torang di raja i, bahaso na dung kehe hami tu propinsi Juda na hami ida anggo Bagas Ni TUHAN, Debata Na Bolon i, hatiha dibangun ma mangulahi dohot angka batu na godang-godang dohot angka tembok na nilampisan dohot hayu. Manat situtu do dibaen panjama ni karejo i jana lancar do pardalanna.

⁹Dung i hami sapai do tu angka pamimpin ni bangso i, sanga ise na mangalehen isin di halahi laho mambangun mangulahi Bagas Paribadatan i dohot mangkobasina.

¹⁰Laing hami sapai dope angka goar-goar ni halahi anso tarpabotohon tu raja i sanga na ise-ise na manguluhon parkarejoan i.

¹¹Dialusi halahi do, ‘Anggo hami on, naposo ni Debata na mangarajai sandok alam on do. Na mambangun mangulahi do hami di Bagas Ni TUHAN na nipajongjong jana dihobasi ni sahalak raja ni Israel na godang marpulu-pulu taon na salpu.

¹²Tapi madung dibaen angka ompu na umpompar hami haririmas ni Debata parkuaso na di banua ginjang i, gabe dipasahat Ia ma halahi tu kuaso ni si Nebukadnesar, raja ni Babel na sian pomparan ni si Kasdim. Dironcohon ia ma Bagas i jana diangkat ia ma bangsonami tu Babel.

¹³Dung i si Kores ma na gabe raja ni Babel jana di taon na parjolo ia mamarenta, diharuarkon ia ma parenta laho mambangun Bagas Ni TUHAN i mangulahi.

¹⁴Salangkan angka parkokas sere dohot perak na dipake di bagasan Bagas Ni TUHAN i, jana i ma na dibuat ni si Nebukadnesar sian Jerusalem lalu dipamasuk ia tu bagasan kuil na di Babel. Dipasahat Raja Kores do angka parkokas i tu bayo na margoar si Sesbasar, i ma na niangkatnia gabe gubernur di Juda.

¹⁵Disuru raja i buatonnia angka parkokas i dohot paulakkon tu Bagas Ni TUHAN na di Jerusalem, dohot mambangun Bagas Ni TUHAN i mangulahi.

¹⁶Jadi ro ma si Sesbasar tu Jerusalem jana dipayakkon ia ma pondasi ni Bagas Ni TUHAN i. Mamungka sian hatiha i, torus ma mardalan pambangunan i lopus saonnari, tapi laing so marnasidung dope.’

¹⁷Muda diisinkon raja i, hami pangidohon anso nian dibaen panangkasion di bagasan arsip ni harajaan na di Babel. Dohot dalan na songon i gabe botoon ma sanga na tutu do adong parenta ni Raja Kores laho mambangun mangulahi Bagas Paribadatan na di Jerusalem on. Dung i intean do hami di barita salaho tu haputusan ni raja i taringot tu parkaro on.”