Read Batak Angkola ESRA 6 Bible Online

ESRA 6 - Batak Angkola bible

ESRA 6

¹Dung i, dibaen ma panangkasion di bagasan arsip ni harajaan na disimpan di Babel hara ni parenta ni Raja Darius.

²Tapi anggo catatan salaho tusi nada di Babel pardapotna, hape di kota Ahmeta na di Luat Media do. Di sada pustaha na margulung do catatan i disuratkon jana songon on ma hatana,

³“Di taon parjolo mamarenta Raja Kores, diharuarkon ia ma parenta anso dibangun mangulahi Bagas Ni TUHAN na di Jerusalem, gabe inganan ni halak maroban haul dohot halak na manutung haul. Gincat ni bagas i angkon dua pulu pitu meter jana bidangna dua pulu pitu meter muse.

⁴Angka dindingna i angkon songon on do pambangunna: Ganop tolu lampis batu angkon baenon ma salampis hayu di ginjangna i. Biayana tanggungan ni kas ni harajaan do.

⁵Songon i muse angka parkokas sere dohot perak na dipake di Bagas Ni TUHAN jana na dung dibuat ni Raja Nebukadnesar sian Jerusalem jana dihaldung tu Babel, angkon paulahon tu ingananna humani.”

⁶Dung i ditongoskon si Darius ma alusna songon on, “Mandapotkon si Tatnai, gubernur ni propinsi Efrat Hasundutan dohot si Setar Bosnai, maradu angka pejabat na di Efrat Hasundutan. Ulang hahua hamu angka halak Jahudi i,

⁷jana ulang halang-halangi hamu pambangunan ni Bagas Paribadatan ni halahi. Padiar hamu ma gubernur ni Juda dohot angka pamimpin ni Jahudi i mambangun Bagas i mangulahi.

⁸Rap dohot on huparentahon ma hamu laho mangurupi halahi di bagasan pambangunan i songon on ma carana: Sude biaya ni pambangunan i angkon buaton sian suha ni pajak negara na di propinsi Efrat Hasundutan jana angkon gararon ma i tu halahi ulang dipalambat-lambat.

⁹Tamba ni i, sanga aha na porlu di angka malim na di Jerusalem, songon lombu jantan umpamana, biri-biri dohot anak ni biri-biri sibaenon haul sihaulkonon tu Debata na markuaso di banua ginjang, songon i gandum, sira, anggur dohot miak zetun, angkon lehenon tu halahi nada tola lalap.

¹⁰Patulus sudena i anso tarbaen halahi pasahatkon haul na pasonangkon roha ni Debata na markuaso di banua ginjang, jana anso dipangido halahi pasupasu di au dohot di angka anakku.

¹¹Huparentahon, anso dibuat sada tiang sian bagas ni sanga ise na mangalanggar parenta on, dipincuri ma ujung ni tiang i, lalu disusukkon ma tu pamatang ni halakna i lopus tombuk. Bagasna i angkon baenon inganan ni rompak.

¹²Debata na mamili Jerusalem i gabe inganan parsombaan tuSia, sai dipusa Ia ma ganop raja sanga bangso na barani mangalanggar parenta on dohot na mancubo mangaroncohon Bagas Ni TUHAN na di Jerusalem i. Au si Darius, au do na mangalehen parentaon. Padalan ma i sadenggan-dengganna.”

¹³Dipatulus si Tatnai, gubernur ni Efrat Hasundutan i dohot si Setar Bosnai maradu angka dongan ni halahi i ma sosot parenta ni Raja Darius i.

¹⁴Dipatorus angka pamimpin ni Jahudi i ma pambangunan ni Bagas Ni TUHAN i mardongan panyosoi ni Panurirang Hagai dohot Panurirang Zakaria, anak ni si Ido. Dipasidung halahi ma pambangunan i hombar tu parenta ni Debata ni Israel dohot parenta ni si Kores, si Darius dohot si Artahsasta, angka raja ni Persia i.

¹⁵Sidung ma sude Bagas Ni TUHAN i di tanggal tolu bulan Adar di taon paonomkon mamarenta Raja Darius.

¹⁶Dung i di bagasan jop ni roha ditabalkon halak Israel ma, angka malim, angka halak Levi maradu sude angka na tarbuang i hian ma Bagas Ni TUHAN i.

¹⁷Di peristiwa i dipasahat halahi ma tu TUHAN saratus lombu jantan, dua ratus biri-biri jantan dohot opat ratus anak ni biri-biri jantan. Baen haul hasesaan ni dosa dihaulkon dua bolas hambeng, sada be ma i ganop Marga Israel.

¹⁸Dung i tu pangkobasion di Bagas Ni TUHAN, disusun halahi ma golongan ni angka malim songon i angka halak Levi mangihutkon paraturan na tarsurat di buku ni si Musa.

¹⁹Di tanggal opat bolas bulan sada di taon na mangihut marari Pesta Paskah ma angka halak na dung mulak sian habuangan i.

²⁰Sude malim dohot halak Levi madung mandalankon upacara mangias diri anso taretong na ias. Dung i disambol angka halak Levi i ma angka pahan-pahanan na gabe haul Paskah di angka malim, di halahi sandiri dohot di sude halak na asing na tarbuang i hian.

²¹Sudena ma mangankon haul i, i ma halak Israel na dung mulak sian habuangan dohot halak luat i na dung manadingkon parngoluonna na mardosa jana na ro laho marsomba tu TUHAN, Debata ni Israel.

²²Pitu ari lolotna halahi marjop ni roha mamestahon Pesta Ni Roti Na So Marragi i. I noma jop ni roha ni halahi hara ni na nibaen ni TUHAN marburju ni roha raja ni Asur[2] tu halahi gabe diurupi halahi di bagasan karejo na mambangun mangulahi Bagas Ni TUHAN, Debata ni Israel i.