Read Batak Angkola ESRA 9 Bible Online

ESRA 9 - Batak Angkola bible

ESRA 9

¹Dung dipatulus sudena i, ro ma tu au piga-piga halak hatobangon ni bangso Israel. Dipaboa halahi ma tu au na so disirang halahi dirina sian angka bangso na asing, na maringanan di na humaliang i, i ma bangso Amon, Moab, Mesir, Kanaan, Het, Peris, Jebus dohot Amori. Dohot do angka malim mambaen songon i dohot angka halak Levi. Sude do halahi dohot mambaen pangalaho hagigian i na nipambaenan ni angka bangso i.

²Halaklahi sian halak Jahudi mambuat boru sian bangso na asing i, jadi gabe nada polin be bangso i na dihapunjungkon nampuna ni TUHAN. Angka hatobangon dohot angka pejabat ni Israel muse do na pajolohon mambaen na songon i.

³Umbege pangalaho i, gabe mandele situtu ma au. Jadi gabe husibakkon ma pakeanku jana hujanggingi ma obukku dohot janggutku, juguk ma au songon i markutondo.

⁴Laing sai juguk ma au songon i lopus tu na pasahatkon haul andospotang. Dung i marroan ma halak mangarongomi au. Mabiar be ma halahi marningot ancaman ni Debata ni Israel maradopkon dosa ni angka jolma na dung mulak i sian habuangan i.

⁵Di na mamungka pasahatkon haul andospotang, jongjong ma au sian juguhan parkutondoanki jana laing marpakean na mangkasibak, manungkap ma au manyurduhon tanganku tu TUHAN Debatangku.

⁶Hudok ma, “O, ale Debatangku, maila do au mangangkat tanganku di adopanMu. Martimpa-timpa do dosanami di ginjang ni ulunami lalu dais tu langit.

⁷Mamungka sian zaman ni angka ompunami lopus saonnari, sai mardosa do hami bangsoMon tu Ho. Patunda ni i ma umbaen na talu hami, angka rajanami dohot angka malimnami dibaen angka raja na asing i. Hona bunu hami, disamun dohot dihaldung gabe taban. Madung dipalayas hami marabis-abis, songon pangalaho na masa di ari sadari on.

⁸Hape saonnari, ale TUHAN Debatanami, apala on dope maribo ni roha Ho tu hami. Dipalua Ho do sanga na piga halak sian tonga-tonganami sian parhatobanan anso mangolu di bagasan dame di inganan na marhapunjungan on. Dilehen Ho do di hami ngolu na imbaru. Dompak di bagasan parhatobanan hami,

⁹nada ditadingkon Ho hami, gabe hasian ni angka raja ni Persia do hami dibaen Ho jana dipaloas hami mangolu dohot mambangun mangulahi BagasMon na tinggal gabe tapor-tapor i. Dilehen Ho do dihami parlinggoman dison, di Juda dohot di Jerusalem on.

¹⁰Hape saonnari, ale TUHAN Debata, dung sidung sudena i, aha be sidokkononnami? Madung hami pasiding mangulahi angka parentaMu,

¹¹na nilehenMu tu hami markite-hite angka panurirang, i ma angka naposoMi. Dipaboa halahi do tu hami, anggo tano na giot siinganannami i nada ias harana antong sudena halak na maringanan disi sian topi tu topi mambaen na hodar do dohot sihagigian.

¹²Dilarang angka panurirang i do nian hami marsibuatan boru dohot angka jolma i, sanga pe mangurupi halahi mambaen sonang dohot marsonang. Muda mangoloi hami, hatabohononnami ma tano i jana pateankononnami tu pomparannami salolot-lolotna.

¹³Madung mardosa hami maradopkon Ho jana hami langgar uhumMu, jana madung diuhum Ho hami. Tapi hami boto do, ale Debatanami, nada songon borat ni na patut jagitonnami uhuman na nilehenMu, dipalua Ho muse dope hami.

¹⁴Jadi, bia muse dope hami pasidungkon angka parentaMu jana marsibuatan boru hami dohot angka jolma na jahat i? Muda laing hami baen dope antong songon i, ma pasti sun murukMu, gabe roncohononMu hami jana nada padiaronMu sahalak pe mangolu.

¹⁵O TUHAN Debata ni Israel, na tigor do Ho, haru songon i pe laing dipadiar Ho do hami mangolu. Hami oku ma hasalaannami tu Ho; nada marhak hami ro tu parmiananMu.”