Read Batak Angkola NEHEMIA 12 Bible Online

NEHEMIA 12 - Batak Angkola bible

NEHEMIA 12

¹Angka on ma malim dohot halak Levi na mulak sian habuangan rap dohot si Zerubabel anak ni si Sealtiel dohot Malim Godang Jesua, si Seraya, si Jeremia, si Esra.

²Angka malim: Si Seraya, si Jeremia, si Esra, si Amarya, si Maluk, si Hatus, si Sekanya, si Rehum, si Meremot, si Ido, si Ginetoi, si Abia, si Miyamin, si Maaja, si Bilga, si Semaya, si Joyarib, si Jedaya, si Salu, si Amok, si Hilkia dohot si Jedaya. Angka halahi ma na gabe malim kapala di hatiha ni si Jesua.

⁸Angka halak Levi: Angka pamimpin ni ende tarimakasi: Si Jesua, si Binui, si Kadmiel, si Serebia, si Juda dohot si Matania.

⁹Anggota ni parende kor na mangendehon ende pangalusi: Si Bakbukia, si Uni dohot halahi na sahorong.

¹⁰On ma parjojor ni tarombo ni Malim Godang Jesua: Jesua, Joyakim, Elyasib, Joyada,

¹¹Jonatan, Jadua.

¹²On ma goar-goar ni angka kapala ni malim dohot sisolhot ni halahi dompak na markarejo si Joyakim gabe Malim Godang: Malim Meraya sian horong ni si Seraya, Hananya sian horong ni si Jeremia.

¹³Mesulam sian horong ni si Esra, Johanan sian horong ni si Amarya.

¹⁴Jonatan sian horong ni si Meliku, Josep sian horong ni si Sebanya.

¹⁵Adna sian horong ni si Harim, Helkai sian horong ni si Merayot,

¹⁶Zakaria sian horong ni si Harim, Helkai sian horong ni si Geneton,

¹⁷Zikri sian horong ni si Abia, sian horong ni si Minyamin, Piltai sian horong ni si Moaja,

¹⁸Samua sian horong ni si Bilga, Jonatan sian horong ni si Semaya,

¹⁹Matnai sian horong ni si Joyarib, Usi sian horong ni si Jedaya,

²⁰Kalai sian horong ni si Salai, Heber sian horong ni si Amok,

²¹Hasabia sian horong ni si Hilkia, Netael sian horong ni si Jedaya.

²²Anggo daftar salaho tu angka kapala ripe ni halak Levi dohot ripe ni malim madung disuratkon i di hatiha ni angka Malim Godang na nipajojor dison: Elyasib, Joyada, Johanan dohot Juda. Madung sidung catatan i di na mamarenta si Darius gabe raja ni Persia.

²³Tapi anggo salaho tu angka kapala ripe ni horong Levi hum intap ni hatiha ni si Jonatan pahompu ni si Elyasib do na adong tarsurat.

²⁴Dibagi-bagi do halak Levi marrombongan-rombongan, i ma na nipimpin ni si Hasabia, si Serebia, si Jesua, si Binui dohot si Kadmiel. Ganop mamuji Tuhan, dua rombongan ma na markarejo dohot na pasahat tarimakasi tuSia marsibalos-balosan, songon na niaturkon ni Raja Daud, naposo ni Debata i.

²⁵Angka panjago pintu horbangan ni Bagas Ni TUHAN na ditugaskon manjago angka kamar simpanan na di lambung ni pintu horbangan ni Bagas Ni TUHAN, i ma: Si Matania, si Bakbukia, si Obaja, si Mesulam, si Talmon dohot si Akub.

²⁶Di hatiha ni si Joyakim anak ni si Jesua jana pahompu ni si Josadak dohot di hatiha ni Gubernur Nehemia dohot Malim Esra Ahli Uhum i do halahi mangolu.

²⁷Di na pasahatkon tembok ni kota Jerusalem i tu Tuhan, diontang do sude angka halak Levi sian inganan ni halahi be anso dohot mamestahon peristiwa i marhite angka ende tarimakasi, dohot angka musik gambus bope hasapi.

²⁸Jadi marlagut ma angka parende na sian horong ni Levi i, na maringanan di humaliang ni Jerusalem, bope na sian angka kota na humaliang Netofa,

²⁹na sian Bet-Gilgal, Geba dohot Asmawet.

³⁰Mangias diri ma angka malim dohot angka halak Levi i di diri ni halahi sandiri, di rayat i, di angka pintu horbangan dohot tembok ni kota.

³¹Husuru ma angka pamimpin ni Juda manaek tu tembok i laho mamimpin rombongan na bahat na giot marbaris manghaliangi kota i lalu marende pujian tarimakasi tu Debata. Marbaris ma rombongan na parjolo di ginjang ni tembok i manuju tu siamun tu Horbangan Rompak.

³²Di pudi ni angka parende ma si Hosaya mardalan diihutkon deba sian angka pamimpin ni Juda.

³³Ihut ma angka malim na nipajojor dison mardalan di pudi ni halahi lalu mangombus sarune: Si Asarya, si Esra, si Mesulam, si Juda, si Benyamin, si Semaya dohot si Jeremia. Ihut ma muse mardalan si Zakaria anak ni si Jonatan jana pahompu ni si Semaya. Deba sian ompu na umpompar ia, i ma si Matania, si Mika, si Zakur dohot horong ni si Asap.

³⁶Mardalan ma di pudinia angka na sian horongnia, i ma; si Semaya, si Asareel, si Milalai, si Gilalai, si Maai, si Netaneel, si Juda dohot si Hanani. Maroban alat-alat musik do halahi sude, sarupa tu na nipake ni Raja Daud, naposo ni Debata i. Malim Esra Ahli Uhum Ni Debata i ma mardalan di jolo ni barisan i.

³⁷Dung lalu di Pintu Horbangan Sampuran, mambelok ma halahi jana manganangkohi tangga ni Kota Ni si Daud, mamolus sian bagas godang ni si Daud, lalu mulak tu tembok na di Pintu Horbangan Aek na di Habincaran ni kota i.

³⁸Rombongan ni parende na sada nari i marbaris ma di ginjang ni tembok i manuju tu siambirang jana huihutkon ma i rap dohot deba sian rayat i. Marbaris ma hami mamolus Palas-palas Parapian lopus tu Tembok Bidang.

³⁹Lalu mamolus ma hami sian Pintu Horbangan Efraim, Pintu Horbangan Na Lolot, Pintu Horbangan Ihan, Palas-palas Hananeel dohot Palas-palas Mea lopus tu Pintu Horbangan Biri-biri. Maradian ma barisannami i di lambung ni Pintu Horbangan Panjagoan na di lambung ni Bagas Ni TUHAN.

⁴⁰Jadi lalu ma parende na dua rombongan i di lambung ni Bagas Ni TUHAN. Tamba ni angka pamimpin na di rombonganki,

⁴¹dohot muse do angka malim na mangombus sarune. I ma angka si Elyakim, si Maaseya, si Minyamin, si Mika, si Elyoenai, si Zakaria, si Hananya,

⁴²di pudi ni halahi mardalan ma si Maaseya, si Semaya, si Eleasar, si Usi, si Johanan, si Malkia, si Elam dohot si Eser. Marende ma angka parende na nipimpin ni si Jisrahya.

⁴³Di ari i bahat do haul na dihaulkon tu Tuhan. Marmoga-moga ma rayat i dibaen madung marjop ni roha halahi dibaen Debata. Angka dadaboru pe dohot dakdanak dohot do marpesta, jabat do habegean sora ni halahi na marmoga-moga i tu na dao.

⁴⁴Ditugaskon do di hatiha i sanga na piga halak mangawasi angka kamar simpanan inganan ni angka sumbangan tu Bagas Ni TUHAN, masuk ma disi haul parsampuluan dohot gandum maradu parbatu ni suan-suanan na parjolo malamun ganop taon. Angkon palaguton ni angka pangawas i do sumbangan-sumbangan i sian angka ladang na di humaliang ni angka kota. Dipasahat ma sumbangan i tu angka malim dohot angka halak Levi, hombar tu aturan ni Uhum. Diargahon halak Juda do angka malim i dohot halak Levi,

⁴⁵dibaen halahi do antong na mandalankon upacara haiason dohot angka upacara na asing na dung diparentahon ni Debata. Angka parmusik pe dohot angka panjago horbangan ni Bagas Ni TUHAN marsikarejohon karejona be do, hombar tu aturan na nibaen ni Raja Daud dohot anakna si Salomo.

⁴⁶Mamungka sian hatiha ni Raja Daud dohot si Asap parmusik i, na dung diendehon ni angka parende do angka logu pujian tarimakasi di Debata.

⁴⁷Di hatiha ni si Zerubabel jana songon i muse di hatiha ni si Nehemia, mangalehen haul do sude halak Israel laho manggohi haporluan siganop ari di angka parende i dohot di panjago horbangan ni Bagas Ni TUHAN. Dilehen rayat i ma haul na mardohonan tu angka halak Levi jana dilehen halak Levi muse ma i tu angka malim bagian na ditontuhon humani.