Read Batak Angkola NEHEMIA 2 Bible Online

NEHEMIA 2 - Batak Angkola bible

NEHEMIA 2

¹Sanoli, dung opat bulan, i ma di bulan Nisan, dompak hatiha mangan Kesar Artahsasta, huparade ma anggur disia, bohingku songon na sego. Na so unjung dope songon na sego bohingku anggo di adopan ni raja i songon na sadari i.

²Jadi gabe disapai ia ma, “Biasi songon na marsak sajo ho idaon, hape nada na marun ho? Pasti adong sanga na aha na niarsakkonmu.” Tarsonggot ma au,

³jana hualusi ma, “Sai horas ma da raja i sapanjanna! Bia ma he so marsak iba, anggo laing na tinggal maropuk do kota inganan ni kuburan ni angka daompung boti angka pintu horbanganna i pe madung abis dipangan api.”

⁴Marsapa ma raja i, “Antong, aha do giotmu?” Martangiang ma au di bagasan rohangku tu Debata na markuaso di banua ginjang i,

⁵lalu hudok ma tu raja i, “Anggo tumbuk do di roha ni raja i jana muda ra raja i mangoloi pangidoanniba, disuru raja i ma au tu tano Juda laho mambangun kota inganan ni kuburan ni angka daompung i mangulahi.”

⁶Jadi dioloi raja i ma na topet juguk palambung dohot permaisuri i pangidoanki! Disapai ia ma sanga na sadia lolot au giot tinggal disi jana sadihari mulak, jadi hupaboa ma tusia.

⁷Dung i hupangido ma surat sipasahaton tu angka gubernur na di propinsi Efrat Hasundutan, anso laing diurupi halahi pamomohon pardalananku lopus lalu tu Juda.

⁸Tamba ni i, laing hupangido dope surat tu si Asap panjago ni harangan harajaan, anso dipasingkop ia hayu sibaenon tu pintu horbangan ni benteng na manjagohon Bagas Ni TUHAN, dohot sipakeon di tembok ni kota dohot bagas na giot ingananku. Dioloi raja i do sude pangidoanki, dibaen ditolong Debata do au.

⁹Kehe ma au tu Efrat Hasundutan, rap dohot piga-piga halak tentara na marpangkat dohot angka tentara na markudo na niparentahon ni raja i mangudurkon au. Hupasahat ma disi surat ni raja i tu angka gubernur.

¹⁰Tapi di na tarbege tu si Sanbalat halak Bet-Horon i dohot tu si Tobia halak Amon i bahaso na dung ro au i ma taringot tu haporluan ni bangso Israel, gabe lebak sajo ma dihilala halahi.

¹¹Hupatorus ma pardalananku jana lalu ma au tu Jerusalem, lalu maradian ma au tolu ari.

¹²Salolot na tolu ari i nada hupaboa sanga na tu ise pe bahaso na nilehen ni Debata boa-boa tu au laho mambangun kota Jerusalem mangulahi. Borngin-borngin ancogotna i ngot ma au jana hupiohon ma angka dongan sanga na piga halak kehe tu ruar ni kota. Asing sian halode na hutengget i, nada adong hami oban pahan-pahanan sitenggeton na asing.

¹³Borngin dope ari di na lalu hami tu kota i mamolus sian Pintu Horbangan Lombang na di sabola Hasundutan. Adop Selatan ma hami kehe tu Pintu Horbangan Rompak mamolus sian Mata Mual Naga. Hupareso ma di pardalanan i na dung gabe ropuk-ropuk noma tembok ni kota i dohot angka pintu horbanganna i madung abis dipangan api.

¹⁴Jadi sian bagian Habincaran ni kota i torus ma hami tu Utara, tu Pintu Horbangan Sampuran dohot Tobat Raja. Tapi nada adong disi be dalan na tarbolus halode na hutengget i, hara ni bahatna na magargar i.

¹⁵Jadi gabe manuat ma hami tu Rura Kidron jana torus ma hami mardalan borngin i lalu paresohon tembok ni kota i. Dung i mambelok ma hami tu kota mamolus sian Pintu Horbangan Lombang.

¹⁶Sada halak pe sian hatobangon ni rayat i nada adong umboto sanga na tu dia au kehe jana nada diboto halahi sanga aha na husangkaphon. Angke lopus tu hatiha i laing na so hupaboa dope sanga na aha tu angka dongan sabangsongku, bope tu angka malim dohot tu angka hatobangon sanga pe tu angka pagawe dohot tu sanga ise pe na giot dohot mambangun kota Jerusalem i.

¹⁷Tapi dung i hudok ma tu halahi, “Ligi hamu ma pangalaho ni pardangolanta on! Tinggal na magargar noma Jerusalem dohot angka pintu horbanganna pe ma abis dipangan api. Tole ma tabangun mangulahi angka tembok ni kota Jerusalem on anso ulang marlayas be hita.”

¹⁸Lalu hucaritohon ma tu halahi sanga na bia dibaen Debata mangurupi au dohot na nidok ni raja i tu au. Dialusi halahi ma, “Tole ma da tapungka mambangun!” Lalu marhobas-hobas ma halahi laho mangkarejohon.

¹⁹Di na tarboto sangkapnami i tu si Sanbalat, si Tobia dohot si Gesem halak Arab i, dipartatai halahi ma hami mangincahi hami. Didok halahi ma, “Aha dehe na giot baenonmunu? Na giot mangalo dehe hamu tu raja?”

²⁰Hualusi ma, “Baenon ni Debata na markuaso di banua ginjang i do marhasil karejonami on. Angka naposoNia do hami na giot mamungka mambangun on. Tapi anggo hamu nada marhak marnampunahon sanga na aha anggo di Jerusalem on. Antong goarmunu pe nada dokkon-dokkonon muda manghobari halak salaho tu Jerusalem.”