Read Batak Angkola NEHEMIA 4 Bible Online

NEHEMIA 4 - Batak Angkola bible

NEHEMIA 4

¹Di na nibege ni si Sanbalat na padenggankon tembok ni kota hami, halak Jahudi, gabe biraraon ma ia muruk jana dipungka ia ma mangincahi hami.

²Didok ia ma di jolo ni angka dongannia dohot tentara ni Samaria, “Aha do na dikarejohon ni halak Jahudi na gale i? Na giot bangunon ni halahi ma lakna mangulahi kota on? Diambang halahi do lakna tarpasidung di bagasan sadari karejo i, hara ni na manghaulkon haul sajo? Tarbaen halahi ma he lakna timbunan ni rompak-rompak i gabe batu tembok?”

³Si Tobia na jongjong di lambungnia i pe, mandok hata muse ma, “Ligi hamu ma tembok na nibangun ni halahi i! Anjing harangan pe, tarrumpakkonsa do i!”

⁴Jadi gabe martangiang ma au, “Ale Debata, tangihon ma sanga bia hami dipalayas. Tu ginjang ni ulu ni halahi sandiri ma timpalkon halayason i. Sugari hona rampas ma nian sude sinadongan ni halahi i jana hona oban nian halahi gabe taban tu tano na asing.

⁵Ulang ampuni hajahatan ni halahi jana ulang halupahon dosa ni halahi, dibaen madung dipabile halahi hami na mambangun on.”

⁶Anggo hami laing hami toruskon do na padenggankon tembok i, jana nada sadia honok nari dung i, sidung ma dipadenggan sude tembok i lopus satonga gincatna, harana marsemangat do antong rayat i na mangharejohon i.

⁷Di na tarbege tu si Sanbalat, si Tobia dohot angka halak na sian Amon dohot Asdod maradu angka halak Arab bahaso na dung mur maju na padenggankon tembok ni Jerusalem i jana na dung mamungka ditutup angka lubang-lubang na di tembok i, gabe sun ma muruk ni halahi.

⁸Marpokat ma halahi giot mangaroro Jerusalem laho patubu hagaoron.

⁹Jadi hara ni i gabe martangiang ma hami tu Debatanami jana hami jagoi ma kota i arian dohot borngin.

¹⁰Tapi mamungka ma halak Juda mangendehon ende humolos songon on: “Ma abis gogonta maroban boban, hapengani laing bahat dope rompak martibalan. Songon na so margogo be nihilala karejo songon on na mambangun tembok ni kota on.”

¹¹Di hatiha i ditahi roha ni angka musunami i ma laho mangaroro hami tompu, lalu mamatehon hami anso gabe mantak karejonami i.

¹²Tapi marpupu do halak Jahudi na maringanan di lambung ni halahi i ro mandapotkon hami laho paboahon sangkap ni musu i.

¹³Jadi gabe hubagi-bagihon ma podang, tombak, dohot panah tu rayat i, lalu hubaen ma inganan ni halahi mangihutkon horongna be di balik ni tembok i di angka inganan na so sidung dope dipadenggan.

¹⁴Di na huida mabiar rayat i, hudok ma tu halahi dohot tu angka hatobangon maradu tu angka pamimpin, “Ulang hamu mabiar mida musu! TUHAN na gogo jana na markuaso i ma ingot hamu, jana parjuangkon hamu ma angka kahanggimunu, angka dakdanak, dongan saripe dohot bagasmunu!”

¹⁵Tarbege ma tu angka musunami bahaso na dung habotoan tu hami sangkap ni halahi i. Jadi gabe sadar ma halahi bahaso na dung disundati Debata sangkap ni halahi. Dung i karejo ma hami sude mangulahi padenggankon tembok i.

¹⁶Tapi mamungka sian ari i satonga noma sian anak buangki na markarejo, tapi anggo na satonga nari marjago-jago noma mamake baju porang dohot marsinjata tombak, parince dohot panah. Dilehen angka pamimpin ni rayat i sandok bantuan tu rayat i,

¹⁷na mangkarejohon tembok i. Angka panaru bahan ni bangunan i, sada tangan noma dibaen mangkarejohon karejona, jana tangan na sada nari maniop sinjata.

¹⁸Angka tukang batu na markarejo, alit do podang ni halahi di gontingna. Angka siombus sarune tanda ni bahaya, torus do di lambungku.

¹⁹Jadi hudok ma tu rayat i, tu angka hatobangon dohot tu angka pamimpin, “Ma mabidang dao sajo karejo on, gabe marserak hita saginjang ni tembok on, padao-dao na sada sian donganna.

²⁰Jadi muda dibege hamu sora ni sarune, manigor marlagut ma manghaliangi hami dison. Debatanta do na giot marporang humopkop hita.”

²¹Sai songon i ma hami markarejo mamungka sian manyogot lopus tarida bintang di langit. Satonga ma rayat i padenggankon tembok i, jana na satonga nari ma marjago-jago maniop tombak di tanganna.

²²Salolot na masa i, husuru ma sude partugas dohot angka pambantu ni halahi marborngin di Jerusalem. Jadi songon i ma pangalahona gabe tarjago hami kota i borngin-borngin jana arianna i mambangun tembokna.

²³Au sandiri, angka donganku angka pangoloi dohot angka pangawalku tongtong do marpakean sabuk, arian bope borngin. Sai torus do hami di bagasan na hobas, maniop sinjata di tangan.