Read Batak Angkola NEHEMIA 5 Bible Online

NEHEMIA 5 - Batak Angkola bible

NEHEMIA 5

¹Dung adong sadia honok, bahat ma sian halak Jahudi, halaklahi dohot dadaboru na humolos salaho tu angka dongan sabangsona.

²Adong ma na mandok, “Anakku bahat. Porlu gandum anso mangolu.”

³Adong muse na mandok, “Tarpaksa noma hugadehon ladang, kobun anggur dohot bagasnami baen panobusi ni gandum anso ulang mate tangkuraparon.”

⁴Jana adong muse dope na mandok, “Ma manginjam hepeng hami laho palunaskon pajak na nitontuhon ni raja, i ma pajak ni ladang dohot kobun anggurnami.

⁵Nada he laing halak Jahudi hami? Nada he dos dakdanaknami dohot angka dakdanak Jahudi na asing i? Haru songon i pe tarpaksa hami padiar angka dakdanaknami i gabe hatoban. Adong dope tehe sian angka borunami na gabe hatoban sigadison. Nada adong be gogonami harana ladang dohot kobun anggurnami madung hami gadehon.”

⁶Pabege-bege holos ni halahi i, gabe sun ma murukku,

⁷jana huputuskon ma laho mambaen tindakan. Jadi hugorahon ma angka hatobangon dohot pamimpin ni rayat i. Hudok ma, “Dipisat hamu do angka kahanggimunu sandiri!” Dung i hubaen ma sada rapot godang laho mangurus pangalaho i,

⁸jana hudok ma, “Sagogonami do hami baen manobus angka kahangginami halak Jahudi na tarpaksa manggadis dirina tu bangso na asing. Hape saonnari hamu muse noma mamaksa halahi manggadis dirina tu hamu, haru pe nian laing halak Jahudi do halahi!” Nada taralusi angka pamimpin i sangkababa hata pe.

⁹Jadi hudok muse ma, “Nada denggan parbuatanmunu i! Angkon mabiar hamu nian sugari tu Debata di ngolumunu. Sugari songon i ma baenonmunu anso ulang dilehen hamu dalan di musunta na so martuhan i laho palayaskon hita.

¹⁰Au sandiri angka kahanggingku dohot angka donganku, hami painjamkon do hepeng dohot gandum tu rayat i. Ulang be tapangido i mulak.

¹¹Sesahon hamu ma antong angka utang ni rayat i tu hamu, bope na marrupa hepeng sanga na gandum, bope anggur sanga miak zetun. Manigor paulak hamu ma ladang, kobun anggur, kobun zetun dohot bagas ni halahi!”

¹²Dialusi angka pamimpin i ma, “Ihutkononnami ma sipaingot i. Paulahonnami ma sudena jana nada tuntutonnami garar ni sanga aha sian halahi.” Jadi hupiohon ma angka malim i, jana husuru angka pamimpin sinangkin marsumpa di jolo ni angka malim i paboa na tutu situtu patuluson ni halahi sanga aha na nidok ni halahi i.

¹³Dung i hubuka ma basaen na di gontingku[1] lalu huhirpaskon jana hudok ma, “Sai songon on ma nian dihirpaskon Debata ganop halak na so patuluskon janjina. Malarat ma halakna i, dibuat Debata ma bagas dohot sude sinadonganna!” Sude ma na marlagut i mangalusi, “Amen!” lalu mamuji TUHAN. Jadi dipatulus angka pamimpin i ma janji ni halahi i.

¹⁴“Madung gabe gubernur ni Juda au dua bolas taon honokna, mamungka ma i sian taon paduapuluhon lalu tu taon patolupuluhon mamarenta Raja Artahsasta. Salolot ni i, nada jungada hubuat dohot angka kahanggingku gajingku songon gubernur.

¹⁵Anggo angka gubernur painte so au, na gabe boban do di rayat harana dituntut halahi do opat pulu hepeng perak sadari biaya ni sipanganon dohot anggur. Salang angka hatoban ni halahi pe antong dohot do mamisat rayat i. Tapi anggo au nada hubaen na songon i dibaen mabiar do au mida Debata.

¹⁶Sude gogongku huusehon do tu pambangunan ni tembok i jana saotik pe nada hubuat tano gabe balosna, haru pe sude pambantungku dohot markarejo di pambangunan i.

¹⁷Saratus lima pulu halak Jahudi, dohot angka hatobangon ni halahi, somal do hujamu mangan di bagasku, nada nietong dope angka tamu na sian angka bangso hombarnami.

¹⁸Ganop ari angkon paradeonku sian harugianku sandiri sada lombu, onom biri-biri na mokmok dohot manuk bahat. Tamba ni i, ganop sanoli sampulu ari angkon adong anggur simpanan na imbaru. Haru songon i pe nada ra au manuntut gaji ni jabatan gubernur, angke huboto do na maborattu na songon i di rayat i.

¹⁹Pangidoanku ale Debata, ingot ma sasude na dung hubaen i di bangso on jana pasupasu ma au.”