Read Batak Angkola NEHEMIA 6 Bible Online

NEHEMIA 6 - Batak Angkola bible

NEHEMIA 6

¹Tarbege ma tu si Sanbalat, si Tobia, si Gesem halak Arab i dohot angka musunami na asing i na dung sidung hami padenggankon tembok i jana na dung martutup sude lubangna i, haru pe na so hami pasang dope di hatiha i angka bulung ni pintuna di angka pintu horbangan ni kota i.

²Jadi martona ma si Sanbalat dohot si Gesem tu au anso ro au mambaen parsuoan dohot halahi di sada huta di Rura Ono. Tapi huboto do bahaso na giot mambaen mara do halahi tu au,

³jadi gabe hutongos ma alus tu halahi songon on, “Nada tarbaen dibaen adong topet karejongku na penting. Nada ringkot rohangku palambatkon karejo i hum hara ni na giot marsuo dohot hamu.”

⁴Jabat opat noli ditonahon halahi laing sarupa tonana i tu au, jana laing sarupa muse antong alusna hubaen.

⁵Palima nolihon ro ma naposo ni si Sanbalat maroban surat na talak[2]

⁶isina songon on: “Dipaboa si Gesem tu au na adong barita-barita di tonga-tonga ni angka bangso na humaliang on na mandok bahaso na giot mambaen pamberontakan ho dohot sude halak Jahudi, jana hara ni i do umbaen na dipadenggan ho tembok i. Didok ia dope, bahaso na giot angkatonmu sandiri ho gabe raja ni Juda,

⁷jana madung ditodo ho angka panurirang laho manabalkon ho di Jerusalem. Pasti lalu do tu raja barita-barita i. Antong ro ma ho anso tahatai salaho tusi.”

⁸Tapi hutongos ma alusna songon on, “Gabusmu do sude na nidokmi jana tubu-tubu ni rohamu sandiri do i.”

⁹Na mancubo mambiar-biari hami ma halahi anso hami antak karejo i. Martangiang ma au, “Ale Debatangku, pargogoi ma au!”

¹⁰Laing hira-hira di hatiha i, kehe ma au tu bagas ni si Semaya anak ni si Delaya jana pahompu ni si Mehetabeel, dibaen adong halangannia mandapotkon au. Didok ia ma tu au, “Beta hita na dua martabuni tu Bagas Ni TUHAN. Takunci sude pintuna i, dibaen adong do halak na giot mamunu ho di borngin on.”

¹¹Tapi hualusi ma, “Anggo au, nada huhagioti na maporus. Diambang ho ma lakna na giot palua diri au muda masuk martabuni di Bagas Ni TUHAN? Nada, nada ra au!”

¹²Dung hutimbangi pangalaho i, sadar ma au bahaso na so sian Debata do hata ni si Semaya i tapi na sian si Tobia dohot si Sanbalat do. Na hona sogok ni halahi do si Semaya laho palaluhon alatan i tu au,

¹³dohot laho mambiar-biari au anso huihutkon usul ni halahi i mambaen dosa. Jadi muda songon i gabe adong ma dalan ni halahi pajatjat-jatjatkon goarku anso gabe sihata-hataan ni halak iba.

¹⁴Martangiang ma au, “Ale Debata, sai ingot ma na nibaen ni si Tobia dohot si Sanbalat i. Uhumi ma halahi! Songon i panurirang dadaboru na margoar si Noaja dohot angka panurirang na asing i na mambiar-biari au.”

¹⁵Lima pulu dua ari honokna na padenggan tembok i jana sidung ma di tanggal dua pulu lima bulan Elul.

¹⁶Dung tarbege pangalaho i tu angka musunami sian tonga-tonga ni angka bangso na humaliang i, mabiar ma halahi martilako, angke sude do halak umbotosa bahaso na niurupan ni Debata do karejo i dipatulus.

¹⁷Di hatiha i laing na marsitongosan surat dope angka pamimpin ni Jahudi i dohot si Tobia.

¹⁸Bahat do dongannia di Juda, harana hela ni si Sekanya anak ni si Arah do ia. Boti muse anaknia si Johanan mambuat boru ni si Mesulam anak ni si Berekia.

¹⁹Haru pe didatdati si Tobia mambaen surat tu au mambiar-biari au, laing didokkon-dokkon angka pamimpin ni Jahudi i dope di jolongku sandok hadengganan ni si Tobia. Tamba ni i, sude na hudokkon dipalalu halahi do i tusia.