Read Batak Angkola NEHEMIA 8 Bible Online

NEHEMIA 8 - Batak Angkola bible

NEHEMIA 8

¹Di bulan pitu madung hot halak Israel maringanan di kotana be. Di tanggal sada bulan i marlagut ma halahi sude di Jerusalem, di alaman parjolo ni Pintu Horbangan Aek. Dipangido halahi ma anso dibuat Malim Esra Buku Uhum. Si Esra, i ma sada halak na ahli salaho tu Uhum na nilehen ni TUHAN tu Israel marhite si Musa.

²Jadi dioban si Esra ma buku i tu adopan ni na marlagut i, i ma angka halaklahi, dadaboru dohot angka dakdanak na impas godang laho mangastui.

³Dung i dibasahon si Esra ma Uhum i tu halahi sian manyogot lopus arian. Sude do halahi manangihon sian situtu ni rohana.

⁴Jongjong ma si Esra di podium hayu na dibaen sipakeon di parlagutan i. Di siamunnia jongjong ma angka si Matica, si Sema, si Anaya, si Uria, si Hilkia dohot si Maaseya; jana di siambirangnia jongjong ma si Pedaya, si Misael, si Malkia, si Hasum, si Hasbadana, si Zakaria dohot si Mesulam.

⁵Gumincat do panggung jongjongan ni si Esra i sian halak na bahat i, jadi gabe sude halahi marnidasa. Disi dibuka ia buku i, manigor jongjong ma halahi sude.

⁶Didok si Esra ma, “Puji hamu ma TUHAN, Debata Na Bolon i!” Sude ma rayat i mangangkat tanganna tu ginjang jana didok halahi ma, “Amen, amen!” Dung i manungkap ma halahi marsomba Debata.

⁷Dung salpu i jongjong ma halahi di ingananna be, lalu adong ma sanga na piga halak Levi na patorangkon Uhum i tu halahi, i ma si Jesua, si Bani, si Serebya, si Jamin, si Akub, si Sabetai, si Hodia, si Maaseya, si Kelita, si Asarya, si Josabad, si Hanan dohot si Pelaya.

⁸Diterjemahkon halahi ma Tona Ni Debata[3] i jana dipatorang halahi anso laing mangarti rayat i di na disise i.

⁹Umbege Uhum na disise i, gok ma roha ni rayat i lalu martangisan halahi. Jadi gabe didok Gubernur Nehemia ma dohot Malim Esra Ahli Uhum i, maradu angka halak Levi na patorangkon Uhum i tu sude rayat i songon on, “Ari hapunjungan do ari sadari on di TUHAN Debatamu, jadi ulang hamu marsak sanga tangis.

¹⁰Saonnari mulak ma hamu di bagasan jop ni roha. Lehen hamu ma deba sian sipanganon dohot anggurmunu tu angka halak na marhahurangan. Ari na marhapunjungan do ari on di Tuhanta, antong ulang hamu marsak. Hamogaan na nilehen ni TUHANta di hamu, i ma na patogu rohamunu.”

¹¹Laing diapoi halak Levi muse ma rayat i jana didok halahi ma marpupu, “Ulang hamu marsak di ari na marhapunjungan on.”

¹²Jadi marmulahan ma rayat i sudena laho mangan dohot minum lalu mambagi-bagihon panganon tu angka donganna na asing. Marjop ni roha ma halahi hara ni na dung mangarti di astuan ni na disise na nibege ni halahi i.

¹³Ancogotna i marlagut ma angka kapala ni horong, angka malim dohot angka halak Levi, lalu kehe ma halahi mandapotkon si Esra laho marsiajar salaho tu angka pangajaran ni Uhum i.

¹⁴Dapot halahi ma bahaso na adong do di bagasan Uhum na nilehen ni TUHAN i tu si Musa, na disuru ni Tuhan halak Israel maringanan di bagasan undung-undung darurat salolot Pesta Undung-undung Bulung Rata.

¹⁵Jadi gabe dibaen halahi ma boa-boa di sude Jerusalem dohot di angka kota maradu angka huta songon on, “Kehe ma hamu tu dolok jana marsibuat ma sian i angka dangka ni tusam, zetun, hayu miak, mare-mare dohot angka hayu na asing laho mambaen undung-undung domu tu paraturan na di bagasan Buku Uhum i.”

¹⁶Jadi markehean ma rayat i mangalap angka dangka ni hayu i. Marsibaen ma halahi sude undung-undung di tarup ni angka bagas na hornop di ginjang bagasna, di alamanna, di alaman ni Bagas Ni TUHAN, di tano lapang na di lambung ni Pintu Horbangan Aek dohot di tano lapang na di lambung ni Pintu Horbangan Efraim.

¹⁷Sude do rayat na mulak sian habuangan i mambaen undung-undung, lalu tinggal disi ma halahi. On ma na parjolo situtu dipamasa mamungka sian hatiha ni si Josua anak ni si Nun. Jadi sude do halahi sonang jana marjop ni roha.

¹⁸Pitu ari honokna halahi na marpesta i. Ganop ari disise si Esra ma bagian-bagian ni Tona Ni Debata i. Di ari pasalapankon dipamasa ma panutupna, domu tu paraturan ni Uhum.