Read Batak Angkola NEHEMIA 9 Bible Online

NEHEMIA 9 - Batak Angkola bible

NEHEMIA 9

¹Tanggal dua pulu opat laing di bagasan bulan i, marlagut ma halak Israel. Puaso ma halahi laho patuduhon manyosal halahi di angka dosa ni halahi. Madung asing halahi sian sude halak na asing. Songon tanda ni na marsak, mamake abit goni do halahi jana dipambaeni halahi ma tano tu ulu ni halahi. Dung salpu i jongjong ma halahi mangoku sude dosa ni halahi dohot dosa ni angka ompu ni halahi.

³Hira-hira tolu jom lolotna disise ma tu halahi buku Tona Ni TUHAN, Debata ni halahi jana tolu jom nari halahi mangoku angka dosa ni halahi. Dung salpu i manungkap ma halahi jana marsomba TUHAN, Debata ni halahi.

⁴Adong do dibaen disi podium baen di angka halak Levi jana jongjong ma di ginjangna i si Jesua, si Bani, si Kadmiel, si Banya, si Buni, si Serebya, si Bani dohot si Kenani. Martangiang ma halahi marsora na gogo tu TUHAN Debata ni halahi.

⁵Angka halak Levi do na mamungka ibadat di ari i, i ma si Jesua, si Kadmiel, si Bani, si Hasabneya, si Serebya, si Hodia, si Sebanya dohot si Petahya. Didok halahi ma, “Jongjong ma hamu, jana puji ma TUHAN Debatanta! Lehen ma tuSia pujian salolot-lolotna! Nipuji ma goarNa na gok hamuliaan, goar na hebat, na manyalpui sandok pujian!”

⁶Dung i martangiang ma rayat ni Israel songon on, “Ho do antong TUHAN, ho do na sun sasada: Dijadihon Ho do bintang dohot sude angkasa. Songon laut dohot tano maradu sude isina. Lalu dilehen Ho ngoluna jana manyarihonsa. Sude kuaso na di langit marsomba sujud. Tunduk halahi tu Ho jana mangunduk.

⁷Ho do Debata, TUHAN Na Sun Sasada. Dipili Ho do si Abram sian tonga-tonga ni bangsona. Ur di Babel madung tading dibaen ia, dibaen Ho sandiri do na mamimpinsa. Lalu dilehen Ho goar na imbaru disia: Mamungka sian i si Abraham noma dokkonon goarNia.

⁸Didapot Ho ia setia jana patu. Lalu dibaen Ho parjanjian dohot ia na togu. Tano Kanaan, Het dohot Amori. Tano Peris, Jebus dohot Girgasi. Sudena i giot lehenonmu ma disia: Na gabe inganan di sude pinomparnia. Madung digohi Ho antong janjiMu. Dibaen tigor do Ho jana na burju.

⁹Diligi Ho do parkancitan ni ompunami di hatiha na salpu: Ditangihon Ho do tangis ni halahi di Mesir dohot Laut Rara.

¹⁰Dibaen Ho do hahomangan tu raja i, maradopkon pagawe maradu sude rayat di luatna i, dibaen diboto Ho do bangsoMi na niparkancitan ni halahi, gabe tarbonggal ma lopus tu sadari on goarMi.

¹¹Laho mambaen dalan di bangsoMu, laut dibolahon Ho; di dalan na so maraek halahi dipataripar Ho. Marmogapan angka na mangkojar halahi di aek na bagas, songon batu na bonom di laut na jingar boti na ganas.

¹²Muda arian dipimpin Ho do halahi dohot tiang ombun, muda borngin torang boluson ni halahi hara ni tiang api na gara.

¹³Mijur Ho sian langit di Dolok Sinai na badia, lalu mangkobari Ho dohot bangsoMu sandiri. Dilehen Ho uhum, aturan dohot sipaingot na tigor, na denggan dohot na bonar boti marguna.

¹⁴Angkon pestahonon ni halahi do Ari Sabat na badia, jana marhite si Musa dilehen Ho uhumMi.

¹⁵Dompak male jana hurang mangan halahi, dipaijur Ho do roti sian langit i. Jana sian batu na himpal, na gogo jana na koras, dipadalan Ho aek na pasombu nguas maradu doras. Disuru Ho do halahi mangingani tano, na nijanjihonMu tu halahi mardongan sumpa.

¹⁶Hape siginjang roha do ompunami boti na jogal roha, angka parentaMu nada ra halahi mangoloisa.

¹⁷Nada ra patu halahi, sude hadenggananMu dihalupahon do, jana sude pambaenanMu hahomangan i sian parningotanna abis do. Sian ginjang ni rohana, dipili halahi ma sahalak ketua. Sai giot tu Mesir do halahi, mangulahi gabe hatoban. Hape Debata na sai mangampuni do Ho, silapang andora, na basa jana na sun paribo. Na sun do antong hasurungan ni holongMi: Nada Ho manadingkon halahi.

¹⁸Digana halahi do sombaon na marrupa lombu. Lalu didok halahi ma, ‘On ma da Debatamu, na maroban hamu sian Mesir, sian parhatobanMu.’ O, ale Debata, laing Ho sandiri ma na marlayas dibaen halahi!

¹⁹Hape nada ditadingkon Ho halahi di gurun pasir i, dibaen na gok holong ni roha do Ho antong. Nada diumpat Ho tiang ombun dohot api mangulahi, na patudu dalan ni halahi arian dohot borngin ni ari.

²⁰Marhite kuasoMu na denggan i, diajar Ho do halahi. Mangan manna halahi jana minum aek tuk disi.

²¹Salolot opat pulu taon di padang halongonan, dipatuk Ho do di halahi haporluan. Nada sego pakean ni halahi, nada hancit pat ni halahi sanga marbosari.

²²Dilehen Ho di halahi hamonangan maradopkon bahat bangso dohot harajaan, songon i maradopkon sandok luat, huta dohot tano na marbalokkon tano ni halahi sandiri. Hesbon tano ni Raja Sihon dirampas halahi; Basan tano ni Raja Og diingani halahi.

²³Dijadihon Ho do pomparan ni halahi, sabahat ni angka bintang na di langit i. Dilehen Ho do tano di halahi baen siingananna, tano na nijanjihonMu tu angka ompuna.

²⁴Tano Kanaan ditaluhon halahi, dipatunduk Ho halak na maringanan disi. Dilehen Ho do kuaso mambaen lomo ni rohana, maradopkon angka bangso Kanaan dohot angka rajana.

²⁵Dirampas bangsoMi do angka benteng partahanan, tano na napu bope bagas na gok sinadongan. Inganan ni aek na nihalojahon ni halak, dirampas halahi kobun anggur, bona ni zetun dohot parbatu na asing i. Mamokmok halahi hara ni na mangan marroha-roha. Sandok na denggan na nilehenMu didaisa.

²⁶Hape mangalo do bangsoMi jana nada mangoloi tu Ho, uhumMu dohot aturanMu dipasiding do, dibunu do angka panurirang na paingotkon halahi, anso mulak tu Ho Debatana, nian halahi. O Tuhan, laing marpupu ma i Ho dipalayas halahi.

²⁷Jadi gabe dipasahat Ho ma halahi tu musuna. Na mangarajai dohot mamisat halahi dohot hakejamonna. Tapi di na nidondonan ni hasusaan i, pio-pio ma halahi tu Ho mangido pangurupi. Sian banua ginjang Ho manangihonsa; mardongan holong ni roha na gok dilehen Ho alusna. Ditongos Ho pamimpin dohot na barani, na paluahon halahi sian na mamusui.

²⁸Tapi dung sonang mangulahi luatna i, manigor do halahi mardosai mangulahi. Gabe dipasahat ma mangulahi halahi, tu musu na mamisat i. Tapi di na sadar halahi jana manyosak situtu rohana gabe pio-pio tu Ho mangido dipalua. Ditangihon Ho do halahi sian banua ginjang; jana ditolong Ho marpupu, dibaen ibo do rohaMu mida halahi jana holong situtu.

²⁹Digorahon do halahi anso mangoloi tu ajaranMu, tapi ditulakkon halahi do sian ginjang ni rohana uhumMu. Hape nian sugari dipatulus uhumMi, na pasti tarjamin do ngolu ni halahi. Sijogal rungkung do halahi jana na tangkang marroha, na so ra tumangihon, na sai manggaga.

³⁰Sian taon tu taon sai sobar Ho paingotkonsa; marhite panurirang, didok TondiMu tu halahi. Hapengani ditutup bangsoMi do pinggolna, lalu dipasahat Ho ma tu angka bangso sude tanona.

³¹Tapi hara ni holong ni rohaMu na so marparsuhatan, nada halahi ditadingkon Ho sanga dironcohon. Tutu ma da antong, Ho do Debata na so marpartudosan; na godang holong ni rohaMu, gok paribo ni rohaan!

³²O Debata, Debatanami na gogo! Debata na godang jana na jorbut! Sai na setia do Ho maniop sumpa dohot janji, digohi Ho do sandok janjiMu jana dipatulus Ho do i. Mamungka sian na nipisat ni raja Asur hami, lopus saonnari, ma bahat pardangolan hami alami. Angka raja, malim, panurirang maradu hatobangonnaMi, bope ompu dohot rayat madung sude manaonkon i. Ulang halupahon sude na hancit i! Ulang nian agohon i sian parningotanMi!

³³Bonar do pambaenanMu, hami na mardosa diuhumi Ho laing setia do Ho haru pe hami gok tilako.

³⁴Angka ompunami, raja, malim dohot angka hatobangonna, sude do mangalanggar uhumMu jana palayaskonsa. Parenta dohot gora na nilehenMu sude, umpe diterge jana nada dibege.

³⁵Dipasupasu Ho do angka raja ni bangsoMu lopus makmur, dilehen Ho di halahi luat na bolak, tano napu. Hape nada ditadingkon halahi ngoluna na so ture i, umpe ra halahi mangoloi tu Ho bope maribadat.

³⁶Jadi gabe hatoban ma hami saonnari, di tano na gabe pusako na nilehenMi. Napu do nian tano on, bahat suhana, na patut nian hami mangarasoina.

³⁷Sude suha na dapot sian tano on, angkon pasahaton do tu angka raja ni luat on. Ho do mangangkat angka na markuaso i di bangsoMu, gabe uhuman ni dosa ni rayat i maradopkon Ho. Marroha-roha mamarenta halahi, tu hami dohot tu pahan-pahanannami. Jadi gabe marhancit hami saonnari, gok na manyosak dohot na mangarsahi!”

³⁸Marharoroan sian sasude na masa i, mambaen parjanjian ma hami rayat Israel, parjanjian na togu jana tarsurat, dicap angka pamimpinnami, angka halak Levi dohot angka malimnami.