Read Batak Angkola ESTER 2 Bible Online

ESTER 2 - Batak Angkola bible

ESTER 2

¹Dung adong sanga na sadia lolot, haru pe na dung mombun roha ni raja i, laing tongtong do dipikiri ia parbuatan ni Ratu Wasti i dohot tindakan na nibaen i maradopkon ia.

²Jadi hara ni i gabe mambaen usul ma angka panuturinia na sumolkot tu raja i songon on, “Sugari dumenggan ma nian nijalahan angka bujing-bujing na jeges-jeges di raja i.

³Diangkat raja i ma nian sugari angka pagawe di sude propinsi ni harajaan on laho manjalahi bujing-bujing na jeges laho marobansa sude tu bagas godang ni dadaboru na di Susan on. Si Hegai kapala ni pangoloi na di inganan ni dadaboru ma mangurus halahi dohot na mangarawat hajegeson ni halahi.

⁴Dung i, dipili raja i ma antong sian bujing-bujing i sanga ise na umpor roha ni raja i jana dibaen ma ia gabe ratu songon panggonti ni Ratu Wasti.” Dijagit raja i do usul i jana didalankon ia.

⁵Di kota Susan i adong do sada halak Jahudi na margoar si Mordehai anak ni si Jair. Pomparan ni si Kis dohot si Simei na sian Marga Benyamin do ia.

⁶Na hona taban do si Mordehai hatiha na talu Jerusalem dibaen si Nebukadnesar, raja ni Babel i. Dibuang ma si Mordehai tu Babel rap dohot si Joyakin raja ni Juda, songon i dohot tahanan na asing bahat dope.

⁷Adong do ibotonia, boru ni udana, sada bujing-bujing na jogi boti na lele si Ester goarna, tapi goarna di hata Ibrani si Hadasa. Anggo simatobang ni si Ester madung jumolo jana gabe songon anak angkat ni si Mordehai ma ia jana dipagodang-godang ma ia songon anak kandungna sandiri.

⁸Dung dipabotohon parenta ni raja i, bahat ma bujing-bujing dipalagut di kota Susan jana dohot ma si Ester disi. Dioban ma ia tu bagas godang ni raja i jana dipasahat ma ia tu si Hegai kapala ni bagas inganan ni dadaboru.

⁹Lomo do roha ni si Hegai mida si Ester jana jop rohana tusia. Manigor ma dirawat ia hajegesonna jana dilehen ia muse panganon na tamana. Dipapinda ma si Ester tu kamar na dumenggan di inganan ni angka dadaboru i dohot pitu halak nari bujing-bujing na lumingkas sian bagas godang ni raja i na ditugaskon laho mangoloi ia.

¹⁰Hara ni na nipodaan ni si Mordehai, nada dipaboa si Ester bahaso na boru Jahudi ia.

¹¹Ganop ari mardalan-dalan do si Mordehai di alaman jolo ni inganan ni dadaboru i anso diboto ia pangalaho na masa tu si Ester jana sanga aha na giot tarjadi tusia.

¹²Mangihutkon paraturan, dilehen do sataon lolotna laho mangarawat hajegeson ni angka dadaboru: onom bulan ma i dohot miak campur hamonyan, jana onom bulan nari dohot miak na marcampur angka na huskus na asing i. Dung salpu i, dapot geleran ma bujing-bujing i laho mangadop tu Raja Ahasweros.

¹³Di hatiha mangadop tu raja i sada bujing-bujing, tola do pakeonna sanga aha marguru tu giot ni rohana.

¹⁴Dioban ma ia tu bagas godang ni raja i borngin-borngin, jana ancogotna i dioban ma tu inganan na asing jana si Saagas noma mangurus disi, i ma sada halak pangoloi na mangurus angka rading ni raja i. Nada be mangadop anak boru i tu raja mangulahi, asing rupani muda dipangido roha ni raja i jana dipiosa marhite na mandok goarna.

¹⁵Jadi dapot geleran ma si Ester laho mangadop tu raja i — si Ester boru ni si Abihail jana boru ni uda ni si Mordehai na mangangkat ia gabe anakna sandiri: Sude do halak na mangaligi si Ester manghalomohon ia. Di na kehe ia mangadop tu raja i, marpakean ma si Ester mangihutkon na niatur dohot na nidok ni si Hegai, pangoloi na mangapalai inganan ni dadaboru i.

¹⁶Songon i ma pangalahona di taon papituhon mamarenta si Ahasweros di bulan sampulu, i ma bulan Tebet, dioban ma si Ester mangadop tu Raja Ahasweros di bagas godang ni raja i.

¹⁷Sumurung ma sonang ni roha ni raja i dohot mogana dibaen si Ester martimbangkon angka bujing-bujing na asing i. Jadi gabe humolong ma roha ni raja i disia. Gabe dipapakehon raja i ma jarunjung harajaan tu ulu ni si Ester jana ia ma na manggontihon Ratu Wasti.

¹⁸Dung i dibaen raja i ma horja godang songon na pasangapkon si Ester jana diontang raja i ma sude pagawe dohot angka na sangapna. Dipabotohon ia ma ari paradianan di sandok harajaan i jana dibagi-bagihon ia ma silua marlobi-lobi.

¹⁹Jadi di hatiha i madung diangkat raja i si Mordehai gabe pagawe negeri.

²⁰Anggo si Ester laing na so dipaboa ia dope na boru Jahudi ia, harana dilarang si Mordehai ia. Dioloi si Ester do si Mordehai laing songon di hatiha hamenehannia jana di na nirawat ni anak ni amantuania i ia.

²¹Sanoli dompak na martugas si Mordehai di bagas godang, martahi na jat ma dua halak pangoloi ni raja i, i ma si Bigtan dohot si Teres giot mamunu Raja Ahasweros, dibaen santakna goyak ni roha ni halahi di raja i.

²²Tarboto si Mordehai ma sangkap i jana manigor dipaboa ia ma i tu si Ester. Nada be marlambat-lambat, dicaritohon si Ester ma tu raja i sanga aha na niboto ni si Mordehai i.

²³Disihiri ma parkaro i, gabe torang ma antong na tutu lapuran i. Diuhum gantung ma sidua halak i. Hombar tu parenta ni raja i, disuratkon ma na masa i di bagasan Buku Sejarah Ni Harajaan i.