Read Batak Angkola ESTER 5 Bible Online

ESTER 5 - Batak Angkola bible

ESTER 5

¹Di ari patoluhon si Ester na puaso i, dipake ia ma pakean ratunia, lalu kehe ma ia tu alaman na di bagasan bagas godang i jana jongjong ma ia di jolo ni pintu ni balerongna i. Topet do juguk raja i di ginjang ni habangsa na mangadop tu pintu i.

²Di na niidania Ratu Ester jongjong di ruar, holong ma rohania marnidasa jana disurduhon ia ma tungkot serenia i tusia. Jadi maju ma antong si Ester lalu dijama ia ujung ni tungkot i.

³Dung i marsapa ma raja i, “Aha do ulaning, na diharohon ni boru ni raja i? Aha do giotmu? Dokkon ma! Haru pe satonga sian harajaanku dipangido ho, sai na lehenonku ma i.”

⁴Dialusi si Ester ma, “Muda tumbuk do di roha ni raja i, sugari nian di borngin on ro ma raja i dohot si Haman tu parjamuan na hupatupa di raja i.”

⁵Disuru raja i ma si Haman tibu ro, anso laing tarbaen halahi manggohi undangan ni si Ester i.

⁶Di hatiha na minum anggur marsapa ma raja i, “Saonnari paboa ma sanga aha giot ni rohamu. Sanga aha pe na nipangidomu hulehen pe, haru pe satonga sian harajaanku.”

⁷Dialusi si Ester ma,

⁸“Muda lomo do roha ni raja i mangoloi pangidoanku, sugari laing ro ma nian raja i dohot si Haman mangulahi tu parjamuan sibaenonku ancogot borngin. Di parjamuan i ma hupasahat pangidoanku tu raja i.”

⁹Mulak ma si Haman sian parjamuan ni Ratu Ester di bagasan jop ni roha. Tapi lalu di pintu horbangan ni bagas godang i diida ia ma si Mordehai na so marhusor i laho mangalehen sangap tusia, gabe gilap ma ia.

¹⁰Tapi laing ditahan ia ma dirinia torus ia mulak tu bagasnia. Disi lalu di bagas disuru ia ma ro angka dongannia jana didokkon ia ma si Zeres dadaborunia i anso rap juguk-juguk dohot halahi.

¹¹Jadi manggambung ma si Haman tu halahi mambonggalkon sinadongannia, bahat ni anaknia halaklahi, jabatannia na penting na nijagitnia sian raja dohot pangkatnia na gumincat sian angka pagawe na asing i.

¹²Didok ia muse dope, “Salang Ratu Ester pe hum raja i do dohot au na niundangnia tu parjamuan na nibaennia di hami, jana ancogot borngin laing diundang ia muse dope hami.

¹³Tapi sudena i nada bagi aha dope arti ni i, salolot laing huida dope si Mordehai halak Jahudi na sai juguk di pintu ni horbangan ni bagas godang i.”

¹⁴Umbege i gabe diusulkon dadaborunia i ma dohot angka dongannia i songon on, “Anggo suru sajo pe mambaen tiang gantungan gincatna dua pulu dua meter. Dung i ancogotna i pangido ma isin sian raja i laho manggantungkon si Mordehai tu tiang i. Anggo dung songon i, tarbaen ho ma sonang rohamu kehe tu parjamuan i.” Denggan sajo ma antong usul i dipikiri si Haman, jadi manigor disuru ia ma mambaen tiang gantungan i.