Read Batak Angkola ESTER 6 Bible Online

ESTER 6 - Batak Angkola bible

ESTER 6

¹Laing di borngin i nada tarpodom raja i. Jadi hara ni i, dipangido ia ma anso dibuat catatan Sejarah Ni Harajaan i jana disuru ia ma halak manyisesa.

²Dapot ia ma di bagasan catatan bahaso na dung dipaboa si Mordehai do na marusaho laho mamunu raja i na nisangkaphon ni si Bigtan dohot si Teres, sidua halak pangoloi panjago ni kamar ni raja.

³Disapai raja i ma, “Aha do dibaen laho pasangapkon dohot mambalos jasa ni si Mordehai i?” Dialusi angka pangoloi i ma, “Nada adong dijagit ia sanga na aha.”

⁴Jadi mangkuling ma raja i, “Ise do sian angka pagawengku saonnari na adong di bagasan bagas godang?” Topet na baru masuk dope si Haman tu alaman na di bagasan bagas godang i; na laho mangido isin do ia tu raja i laho manggantung si Mordehai di tiang na dung dipajongjongnia i.

⁵Dialusi angka pangoloi i ma, “Di bagasan bagas godang do si Haman jana na giot mangadop do ia tu raja i.” “Suru ia masuk,” ning raja i.

⁶Dung masuk si Haman, didok raja i ma tusia, “Adong bayo na giot silehenonku hasangapan na godang. Aha do na giot sibaenonku tu halakna i?” Didok roha ni si Haman di bagasan, “Ise dope he halakna na giot lehenon hasangapan na songon i godangna baenon ni raja i anggo so tu au? Pasti au!”

⁷Jadi gabe dialusi ia ma, “Sugari antong dibuat ma pakean hasangapan na somal dipake raja i sandiri jana dipapakehon tusia. Kudo ni raja i pe dihias ma dohot angka tanda ni harajaan on.

⁹Adong ma sada halak na marsangap di negara on na sian golongan ni raja-raja papakehon i tu halakna na giot pasangapon ni raja i, lalu diudurkon ma antong bayo i manengget kudo ni raja i mamolus di tano lapang ni kota on. Mardalan ma di jolo halak na sangap i manggora-gora, ‘Songon on ma da pangalehen ni raja mangargahon halak na niparsangapannia!’ ”

¹⁰Jadi didok raja i ma tu si Haman, “Patibu, buat ma pakean dohot kudo i jana lehen ma angka tanda hasangapan i tu si Mordehai, halak Jahudi i. Baen ma songon na nidokmu nangkin, ulang urahi hum sada pe. Bolas do dapotonmu ia juguk-juguk di jolo ni pintu horbangan ni bagas godang on.”

¹¹Jadi dibuat si Haman ma pakean dohot kudo i jana dipapakehon ia ma pakean i tu si Mordehai. Dung manengget si Mordehai tu kudo i, diudurkon si Haman ma ia mamolus tano lapang ni kota i, marsurak-surak, “Ligi hamu bo, songon on ma pangalehen ni raja i laho mangargahon halak na niparsangapanna!”

¹²Dung i mulak ma si Mordehai tu pintu horbangan ni bagas godang i. Tapi anggo si Haman diompoti ia noma mulak. Nada ringkot rohania diida halak hara ni santakna ila ni rohania, jadi gabe ditutupi ia ma bohinia i.

¹³Dicaritohon ia ma tu dadaborunia dohot angka dongannia na nitaonnia i. Dung i didok dadaborunia dohot angka dongannia na malo-malo i ma, “Ma mamungka gumale gogomu sian si Mordehai. Halak Jahudi do bayo i jana indangkan na taralo ho i. Pasti taluhononnia ho.”

¹⁴Dompak na manghobari i dope halahi dohot si Haman, ro ma angka pangoloi i mopop laho manaruhon si Haman tu parjamuan na ni patupa ni si Ester i.