Read Batak Angkola ESTER 8 Bible Online

ESTER 8 - Batak Angkola bible

ESTER 8

¹Laing di ari i dilehen Raja Ahasweros ma tu Ratu Ester sandok sinadongan ni si Haman musu godang ni halak Jahudi i. Dipaboa si Ester ma tu raja i bahaso na iboto sian amantuania do si Mordehai. Jadi mamungka sian i dilehen ma hak tu si Mordehai laho mangadop tu raja i so pola jolo dipiohon.

²Ditalduskon raja i ma tintinnia na nibuatnia mangulahi sian si Haman jana dilehen ia ma i tu si Mordehai. Jana diangkat si Ester ma si Mordehai gabe na markuaso di arta ni si Haman.

³Dung i mangadop ma si Ester mangulahi tu raja i. Manungkap ma ia lalu tangis jana dipangido ia ma anso disesa raja i sangkap na jahat na nibaen ni si Haman maradopkon halak Jahudi i.

⁴Disurduhon raja i ma tungkot serenia i tu si Ester, lalu jongjong ma si Ester jana didok ia ma,

⁵“Muda lomo roha ni raja i jana holong rohamu di au, diparuar raja i ma sugari nian surat parenta laho mambuat angka surat ni si Haman i na marisi parenta laho mangabisi sude halak Jahudi na di harajaan on.

⁶Dia ma he lobas au paida-ida bangsongku dohot koum sisolkotku abis dibunu?”

⁷Jadi didok Raja Ahasweros ma tu Ratu Ester dohot si Mordehai, “Tutu nian anggo si Haman madung hugantung hara ni na giot abiskononnia halak Jahudi, jana sinadongannia pe madung hulehen tu ho Ester.

⁸Tapi anggo surat na dung dibaen mangasahon goar ni raja jana dibaen cap ni raja, nada bolas be i tarihon mangulahi. Tapi haru songon i pe, huisinkon ma hamu mambaen surat salaho tu bangso Jahudi sanga aha na denggan diida hamu. Baen hamu ma surat i mangasahon goarku mardongan cap ni harajaan.”

⁹Laing di na sadari i, i ma di tanggal dua pulu tolu, bulan Siwan, dipiohon si Mordehai ma angka sekretaris ni raja i jana diparentahon ia ma halahi mambaen surat tu angka gubernur, angka bupati maradu tu angka halak na godang na di propinsi na saratus dua pulu pitu i, mamungka sian India lopus tu Sudan. Dipambaeni ma surat i di bagasan kota dohot surat ni angka propinsi i be. Laing ditongos ia muse ma surat tu halak Jahudi di bagasan hata dohot surat Jahudi.

¹⁰Diteken si Mordehai do sude surat i di atas goar ni Raja Ahasweros jana dibaen dohot cap ni harajaan. Dung i disuru si Mordehai ma angka utusan na manaruhon angka surat i tu angka propinsi ni harajaan i mamake angka kudo na hipas nampuna ni raja i.

¹¹Dipaboa di angka surat i bahaso na bolas do halak Jahudi di sude kota laho marsada dohot mambela dirina. Muda hona serang halahi dibaen angka halak na marsinjata sian bangso sanga propinsi dia pe jadi, tola do halahi mangalosa dohot mambunu angka na mangaroro i bope dadaboruna dohot dakdanakna; tola do sambolon ni halahi angka musu i lopus abis dohot mangarampas sinadonganna.

¹²Angkon didalankon do parenta i di sude harajaan Persia di ari na dung ditontuhon si Haman laho mamunu angka halak Jahudi, i ma di tanggal tolu bolas bulan dua bolas, bulan Adar.

¹³Angkon songon undang-undang do surat i diharuarkon jana dipabotohon tu sude halak di sandok propinsi anso hobas halak Jahudi mangalo musuna muda dung dapot ari i.

¹⁴Jadi kehe ma angka suruan i manengget kudo ni raja i. Di Susan kota sabungan ni negara i pe disisehon do parenta i.

¹⁵Dung i ditadingkon si Mordehai ma bagas godang i mamake pakean hasangapan na rata langit dohot na bontar, juba ungu na sian linen na halus dohot hampu sere na lobi jeges. Marsurak-surak ma kota Susan marjop ni roha.

¹⁶Dabu jana sonang ma roha ni halak Jahudi, marmoga-moga jana margodang ni roha.

¹⁷Songon i muse di sandok kota dohot propinsi, sanga na di dia tehe disise surat parenta ni raja i, marjop ni roha ma angka halak Jahudi, marsonang-sonang maradu marpestai. Bahat muse dope sian jolma i na masuk gabe bangso Jahudi dibaen mabiar do halahi mida bangso i.