Read Batak Angkola ESTER 9 Bible Online

ESTER 9 - Batak Angkola bible

ESTER 9

¹Ujungna dapot ma tanggal tolu bolas bulan Adar, i ma di ari na ditotopkon laho patuluskon parenta ni raja i tu halak Jahudi. Madung intean hian angka musu ni bangso Jahudi i laho mangkuasoi bangso i. Hapengani halak Jahudi do na manaluhon halahi.

²Marlagut ma halak Jahudi di ganop kota jana marsada laho mangalo sude halak na marroha jahat tu halahi. Mabiar be ma angka bangso sanga na di dia pe tu halahi gabe umpe adong sada halak pe na barani mangadopi halahi.

³Dohot muse noma sude angka halak na sangap-sangap di propinsi, angka gubernur, bupati maradu angka na marjabatan di harajaan i manyokong halak Jahudi dibaen mabiar do sudena tu si Mordehai.

⁴Sude do halak na di harajaan i mamboto sanga songon dia pangaruh ni si Mordehai di bagas godang jana mur martamba-tamba do kuasonia.

⁵Songon i ma pangalahona gabe tarbaen halak Jahudi mambaen sanga aha hagiot ni rohana maradopkon musu ni halahi, dialo halahi ma dohot podang lalu dibunui halahi.

⁶Di Susan kota sabungan ni negara i, dibunu halahi do lima ratus halak.

⁷Dohot ma disi sampulu halak anak ni si Haman, anak ni si Hamedata, i ma musu godang ni halak Jahudi. I ma si Parsandata, si Dalfon, si Aspata, si Porata, si Adalya, si Aridata, si Parmasta, si Arisai, si Aridai dohot si Waisata. Tapi anggo arta nada adong dirampas halak Jahudi.

¹¹Laing di na sadari i dilapurkon halak ma tu raja i bahat ni angka jolma na hona bunu di kota Susan.

¹²Didok raja i ma tu Ratu Ester, “Hum di kota Susan sajo ma lima ratus halak dibunu halak Jahudi, dohot ma i anak ni si Haman na sampulu halak i. Mur ma di angka propinsi! Nada binoto be i, sanga na aha dipambaeni halahi disi! Aha dope na nipangidomu saonnari? Dokkon ma, pasti dapot ho ma i!”

¹³Dialusi si Ester ma, “Muda lomo roha ni raja i, sugari nian laing dipaloas ma ancogot mangulahi baenon ni halak Jahudi na maringanan di Susan on na nibaen ni halahi sadari on. Sada muse, digantung ma nian bangke ni angka anak ni si Haman i di angka tiang gantungan.”

¹⁴Dung i dilehen raja i ma parenta laho patuluskon pangidoan ni si Ester i; diparuar ma surat parenta tu kota Susan jana digantung ma bangke ni angka anak ni si Haman i.

¹⁵Jadi di tanggal opat bolas bulan Adar, marlagut ma halak Jahudi na di Susan mangulahi jana dibunu halahi ma tolu ratus halak nari di kota i. Jana dison pe nada dirampas halahi anggo arta sanga na aha pe.

¹⁶Angka halak Jahudi na maringanan di Propinsi pe marlagut do halahi mambela diri. Talu do musu i dibaen halahi jana hona bunu 75.000 halak angka na magigi mida halahi. Tapi anggo arta nada dirampas halahi sanga na aha.

¹⁷Di tanggal tolu bolas bulan Adar ma i tarjadi. Ancogotna i di tanggal opat bolas, nada dibunu halahi be sanga na ise pe, tapi marpesta ma halahi di ari i marmoga-moga.

¹⁸Tapi anggo halak Jahudi na di Susan di ari lima bolas dirayahon halahi gabe ari na godang, dibaen madung dibunu halahi musu di tanggal tolu bolas dohot opat bolas jana maradian di tanggal lima bolas.

¹⁹I ma dalanna umbaen na tanggal opat bolas bulan Adar gabe ari jop ni roha di halak Jahudi na maringanan di angka kota na menek-menek na gabe ari pesta siriaon lalu marsipiringan silua na marrumang sipanganon.

²⁰Dung i disuratkon si Mordehai ma sude na masa i jana ditongoskon ia ma surat tu sude halak Jahudi di sude harajaan Persia tu na dao dohot tu na donok pe.

²¹Isi ni surat i, i ma parenta anso dirayahon tanggal opat bolas dohot lima bolas bulan Adar ganop taon.

²²Harana di ari i ma antong halahi manaluhon angka musu ni halahi, gabe muba ma pardangolan dohot hapariron ni halahi gabe jop ni roha dohot hamogaan. Jadi hara ni i angkon rayahonon ni halahi do angka ari i marhite pesta dohot parjamu-jamuan lalu marsipiringan sipanganon dohot mangalehen sidoka tu halak na miskin.

²³Dioloi halak Jahudi do parenta ni si Mordehai i jana songon i ma ari parayaan i gabe hasomalan ni adat ganop taon.

²⁴Di na giot manyambol halak Jahudi i si Haman anak ni si Hamedata, pomparan ni si Agag i, dibaen ia do undi na nigoaran muse “Purim” ma jabat disangkaphon ia mamusa halahi.

²⁵Tapi kehe si Ester mangadop tu raja, jana dilehen raja i parenta na tarsurat, patunda ni i ma umbaen na madabu tu si Haman sangkapnia sandiri na jahat i, gabe lopus hona gantung ia dohot angka dakdanaknia di tiang gantungan.

²⁶Hara ni i ma umbaen na margoar ari na godang i Purim. Surat ni si Mordehai dohot sude na nitaon ni halak Jahudi i,

²⁷i ma dalanna gabe dibaen halahi sada paraturan di halahi sandiri, di pomparan ni halahi dohot di sude halak na giot gabe anggota ni bangso Jahudi. Mangihutkon paraturan i, ganop taon angkon rayahonon ni halahi do sudena ari na nitontuhon ni si Mordehai i.

²⁸Laing dipahot muse do salolot-lolotna do angkon ingoton Ari Purim i jana dirayahon sandok ripe ni halak Jahudi sian ganop sundut di sude propinsi dohot di sandok kota.

²⁹Tamba ni i, dibaen si Ester boru ni si Abihail i do surat paduahon rap dohot surat ni si Mordehai i, na pagomoskon surat ni si Mordehai i salaho tu Purim i.

³⁰Ditongos do surat i tu sude halak Jahudi, jana salinanna ditongos tu luat na 127 i di harajaan Persia mardongan hata dame dohot hasetiaon.

³¹Anso dipestahon ma angka Ari Purim i di hatiha na tumbuk, songon na dung diaturkon tu halahi marhite si Mordehai, halak Jahudi i, dohot si Ester, jana songon na dung diaturkon halahi tu diri ni halahi sandiri dohot tu pomparan ni halahi taringot tu na marpuaso dohot na marsiluluton.

³²Disuratkon do di bagasan buku, parenta ni si Ester na pahotkon paraturan Purim i.