Read Batak Angkola HARURUAR 15 Bible Online

HARURUAR 15 - Batak Angkola bible

HARURUAR 15

¹Dung i diendehon si Musa dohot halak Israel ma ende on di TUHAN, “Giot marende ma au di TUHAN, hara ni na monang Ia marhasurungan. Kudo dohot na mangalombut diambungkon Ia tu bagasan laut.

²TUHAN do na gogo mangondihon au sasadaSa do na dung paluahon au. Ia do Debatangku, pujionku ma Ia, Debata ni daompung, huendehon ma hagodanganNa.

³TUHAN do panglima ni porang; TUHAN, i ma goarNa.

⁴Tentara ni Mesir dohot angka karetana diambungkon Ia tu laut, tentara pilian na jumingar bonom di Laut Rara.

⁵Laut na bagas mangalingkup halahi; songon batu, bonom di bagasan laut i.

⁶Tangan siamunMi ale TUHAN, tung na so tarpatudos hagogoanna, tangan siamunMi ale TUHAN mangaropuk angka musu.

⁷Marhite hatongamonMu na lumobi, dibalikkon Ho aloMu marpiar-piar hamuruhonMu, jana manutung halahi songon durame.

⁸Diombus Ho do laut i, jana marbalun songon dolok na gincat; jongjong tingkos songon panambok; gabe pir tandolan ni laut i.

⁹Ninna musu, ‘Ayakonku ma halahi anso hutangkup jana hubuat por ni rohangku. Sintahonku ma podangku jana hurampas ma sude arta ni halahi, hubagi-bagi jana di au ma i lopus sombu rohangku.’

¹⁰Hape, sangombus pe hosaMu, o TUHAN, halak Mesir i pe gabe marmogapan, bonom songon simbora di aek na magodang.

¹¹TUHAN, ise ma sian angka debata sileban na tudos dohot Ho? Di sangap dohot di habadiaan, ise manyalpui Ho? Ise tarbaen patupa angka hahomangan dohot angka karejo na godang songon na binaenMu?

¹²Dipahortang Ho tangan siamunMi, jana dibondut tano i ma musunami.

¹³Setia do Ho tu janjiMu manogu bangso na dung nipaluaMu, diiring Ho do halahi tu tanoMu na badia marhite hagogoonMu.

¹⁴Madung dibege angka bangso, jana humitir be halahi mabiar, halak Pilistin pe gabe manyogar.

¹⁵Angka pamimpin ni Edom gabe manyogar halak Moab na gogo i gabe manyikur, angka halak Kanaan pe marroha heput.

¹⁶Biar dohot sursar mandondoni halahi; O TUHAN, paida-ida gogoMi, jana umpe margogo be jongjong hara ni na humitir halahi lopus mamolus bangsoMi — bangso na nipaluaMu sian parhatobanan i.

¹⁷Ho do pataruhon halahi masuk, jana pahotkon halahi di ginjang ni dolokMu, inganan na nitodoMu gabe inganan parmiananMu; bagas na nipajongjongMu.

¹⁸Mamarenta ma Ho, ale TUHAN salolot-lolotna.”

¹⁹Di na nitariparan ni halak Israel laut i, mardalan di tano na mahiang do halahi. Tapi dung masuk angka kareta ni halak Mesir bope kudo dohot na manjuguhisa tu laut i, dipadalan TUHAN ma mulak aek i, gabe bonom halahi.

²⁰Dung i dibuat si Miryam, i ma sada panurirang, iboto ni si Harun ma rapanonia jana sude dadaboru rap mamalu rapano lalu manortor.

²¹Marende ma si Miryam di halahi, “Marende ma di TUHAN, dibaen tarlobi do hamonanganNia kudo dohot na manenggetsa diambungkon Ia tu bagasan laut.”

²²Dung i dioban si Musa ma bangso Israel sian Laut Rara adop Parhorsihan Sur. Tolu ari halahi mardalan mamolus parhorsihan i nada ungada marsuo dohot aek.

²³Jadi bolkas ma halahi tu sada inganan na margoar Mara, adong do aek disi tapi na lobi paet, jabat nada tarinum. Hara ni i do digoari ma inganan i Mara,[6] astuanna: paet.

²⁴Gabe mungut-ungut ma halahi tu si Musa, marsapa, “Aha noma inumonta?”

²⁵Dung i martangiang ma si Musa marsitutu tu TUHAN, dung i gabe dipatidahon TUHAN ma tu si Musa samponggol hayu. Diambungkon si Musa ma hayu i tu aek i, gabe tarinum ma aek i. Di inganan i ma dilehen TUHAN angka paraturan tu halahi, jana disi ma diuji Ia halahi.

²⁶Ninna TUHAN ma, “Angkon oloanmunu do Au sian sude rohamunu, marhite na patupahon sanga aha na denggan di Au bope patulus sude na Huparentahon. Muda dikarejohon hamu do i, nada uhumanKu hamu marhite angka nyae songon na dung Hubaen tu halak Mesir i. Au do TUHAN na pamalum hamu.”

²⁷Dung i lalu ma halahi tu huta Elim. Adong do disi dua bolas mual ni aek dohot pitu pulu bona ni kurma. Marbandar di lambung ni aek i ma halahi.