Read Batak Angkola HARURUAR 17 Bible Online

HARURUAR 17 - Batak Angkola bible

HARURUAR 17

¹Dung i kehe ma sude halak Israel maninggalkon Parhorsihan Sin, jana marpinda-pinda ma halahi sian inganan na sada tu inganan na asing mangihutkon parenta sian TUHAN. Sanoli marbandar halahi di Rafidim, tapi nada adong aek inumon disi.

²Dung i marungut-ungut ma halahi tu si Musa, ninna ma, “Lehen di hami aek inumon.” Dialusi si Musa ma, “Biasi marungut-ungut jana diuji hamu TUHAN?”

³Tapi sun do nguas ni angka jolma i jana sai torus do halahi marungut-ungut tu si Musa. Ninna halahi ma, “Biasi dioban ho hami haruar sian Mesir? Giot padiaronmu ma hami, dohot angka dakdanaknami maradu pahan-pahanannami mate manguas?”

⁴Pio-pio ma si Musa tu TUHAN, ning ia ma, “Aha ma baenonku tu angka halak on? Ligi ma, madung marhobas halahi giot mandangguri au dohot batu.”

⁵Didok TUHAN ma tu si Musa, “Piohon ma sanga piga-piga halak pamimpin ni halak Israel jana joloi hamu ma mardalan bangso i. Laing oban ma tungkot na nipakemu mangalipat Batang aek Nil i.

⁶Jongjong pe Au di jolomu di sada batu di Dolok Sinai. Lipat ma batu i, gabe haruar ma aek sian batu i, anso minum halahi.” Dibaen si Musa ma songon i disaksihon angka pamimpin ni Israel i.

⁷Digoari ma inganan i Masa,[8] angke di inganan i ma diuji halak Israel TUHAN, di na nisapaan ni halahi, “Rap dope ulaning TUHAN, dohot hita sanga nada?” Laing margoar do inganan i Meriba,[9] angke di inganan i ma marungut-ungut halahi.

⁸Jadi ro ma da halak Amalek mangaroro halak Israel di kota Rafidim.

⁹Didok si Musa ma tu si Josua, “Pilii ma jolo sanga na piga-piga halak anso kehe marporang mangalo halak Amalek ancogot. Anggo au, jongjong di puncut ni dolok do maniop tungkot na nisuru oban ni TUHAN tu au.”

¹⁰Jadi dipatulus si Josua ma sanga songon dia na niparentahon ni si Musa i tusia. Kehe ma ia mamorangi halak Amalek; tapi anggo si Musa, si Harun dohot si Hur manangkok ma tu dolok lopus tu puncutna an.

¹¹Salolot dipahortang si Musa tangannia i, monang ma halak Israel. Tapi muda hum madabu tangannia i, monang ma halak Amalek.

¹²Jadi dung loja tangan ni si Musa, dibuat si Harun ma dohot si Hur sada batu juguhan ni si Musa; jongjong ma si Harun dohot si Hur di siamun siambirang ni si Musa laho manungkol tangannia i anso hot toltol lopus sundut mataniari.

¹³Ujungna talu ma sude halak Amalek i dibaen si Josua.

¹⁴Dung i didok TUHAN ma tu si Musa, “Suratkon ma taringot tu hamonangan on, anso sai tongtong dipaingot-ingot. Dok tu si Josua, na giot lantuhanKu do sude halak Amalek on.”

¹⁵Jadi dipajongjong si Musa ma sada langgatan, jana dibaen ia ma goarna, “TUHAN do Manderangku.”

¹⁶Didok si Musa ma, “Tiop hamu ma mandera ni TUHAN, timbo-timbo! Marporang do TUHAN mangalo halak Amalek ro di salolot-lolotna!”