Read Batak Angkola HARURUAR 28 Bible Online

HARURUAR 28 - Batak Angkola bible

HARURUAR 28

¹“Piohon ma angkangmu si Harun dohot angka dakdanaknia i si Nadab, si Abihu, si Eleasar dohot si Itamar. Paasing ma halahi sian halak Israel, anso tarbaen halahi mangoloi Au songon malim.

²Baen ma pakean malim di angkangmu si Harun, anso tongam ia idaon jana sangap.

³Piohon ma tukang jait na malo, na dung Hupasahat hamaloonna. Dok ma tu angka tukang i anso dibaensa pakean ni si Harun; anso tumbuk ia marhapunjungan di Au, bope anso dioloi ia Au songon malim.

⁴Dok ma anso dibaen angka tukang i panutup ni andora, sada baju efod, sada mantel, sada baju na nisulam, sada saroben dohot bobat. Angkon baenon ni halahi do pakean malim on di si Harun angkangmi dohot di angka dakdanaknia, anso taroloi halahi Au songon pangoloi ni malim.

⁵Angkon sian wol na rata langit, na bunga torung dohot na rara, sian bonang sere dohot linen na halus do baenon ni angka tukangna i pakean i.

⁶Dok ma dibaen angka tukangna i baju efod sian wol na rata langit, na bunga torung dohot na rara, bonang sere dohot linen na halus, na ni pajeges dohot sulam-sulaman.

⁷Angkon baenon sidua ihot tali abara padomuhon abarana na dua i.

⁸Nibaen ma bobatna sian abit na halus panonunna na nitonun sian bonang na sarupa na niudut tu baju efod[13] i anso gabe sada.

⁹Nibuat ma dua mata intan krisopras jana gorgahon ma tu mata intan i goar-goar ni anak ni si Jakob na dua bolas i

¹⁰marguru tu parjojor ni umurna, onom be ganop batu.

¹¹Pabaenkon ma i tu tukang sere na malo manggorgahon goar-goar ni anak ni si Jakob na dua bolas i tu batu intan i. Dung i, angkon marbingke sere do baenon batu intan i.

¹²Baen ma batu intan i tu tali abara ni efod i, songon na mangwakili marga ni Israel na dua bolas i. Songon i ma carana baenon ni si Harun paoban-oban goar ni halahi di abarania, anso Au, TUHAN marningot tongtong di halahi.

¹³Baen ma dua bingke

¹⁴dohot dua rante sian sere na polin na nidandan songon tali. Jadi padomu ma rante i tu bingke sere sinangkinan i.”

¹⁵“Baen ma sada tutup ni andora ni Malim Godang, i ma na angkon sipakeonnia muda giot botoonnia sanga aha na nipangido ni roha ni Debata. Angkon sarupa do bahan ni tutup ni andora i dohot bahan ni baju efod dohot panyulamna.

¹⁶Marsogi opat ma i nibaen jana nilompit dua, 22 sentimeter ma ginjangna jana 22 sentimeter bidangna.

¹⁷Baen ma opat baris batu intan di tutup ni andora i. Di baris na parjolo sian batu jakut, batu manikam dohot sada batu dalimo.

¹⁸Di baris na paduahon, baen ma batu zamrud, batu intan nilam dohot berlian.

¹⁹Di baris patoluhon, sada batu intan na rata langit, batu intan akik dohot batu intan amestist.

²⁰Di baris na paopatkon baen ma batu intan na rata poso, batu intan krisopras dohot batu intan na gorsing. Angkon marbingke sere do baenon batu intan na dua bolas i.

²¹Di batu intan na dua bolas i angkon nigorgahon do sada be goar ni anak ni si Jakob na dua bolas i, laho mangwakili angka marga ni Israel.

²²Angkon marrante sere polin do baenonmu tutup ni andora on, na nijalin songon tali.

²³Baen ma dua golang sere jana nibaen ma i tu suhi-suhi na dua bagian parginjang ni tutup andora i

²⁴jana pamasuk ma rante sere na dua i tu golang na dua sinangkin.

²⁵Angkon nirahut do ujung ni rante na dua nari i tu bingke na dua i. Jadi gabe mardomu ma tutup ni andora i sian jolo dohot tali abara ni baju efod i.

²⁶Baen muse ma dua golang sere, pasang ma i tu suhi-suhi partoru ni tutup andora i di bagasan na dais tu efod i.

²⁷Baen muse ma dua golang sere jana tar tu toru sian jolo ni tali abara ni baju efod i di lambung ni pangkilimanna i, di ginjang ni bobat na nitonun na halus i.

²⁸Anggo golang ni tutup andora i angkon nipadomu do tu golang ni baju efod i dohot tali na rata langit. Jadi gabe tongtong ma tutup andora i di ginjang ni bobat i jana nada ra taldus.

²⁹Jadi muda masuk si Harun tu Inganan Na Badia, angkon pakeonnia do tutup andora na nigorgaan dohot goar ni marga-marga ni halak Israel, anso Au TUHAN, marningot tongtong di bangsongKu.

³⁰Pasang ma Urim dohot Tumim[14] di tutup andora i anso tarpake si Harun i muda ro ia mangadop tu ingananKu na badia. Muda di hatiha na songon i, angkon pakeonnia tongtong tutup andora i, anso diboto ia sanga aha giot ni rohangKu di bangsongKu Israel.”

³¹“Mantel na nipake di ginjang ni baju efod i angkon sian wol na rata langit do i sude nibaen.

³²Nibibiran ma parrungkunganna i, anso ulang momo masibak.

³³Angkon baenonmu do batu ni dalimo sian abit wol na bunga torung, abit na rata langit dohot abit kirmisi tu ujung ni gamis i humaliang, jana parsolotkon ma giring-giring sere i marantara-antara,

³⁴anso sada giring-giring sian sere dohot sada batu ni dalimo tongtong marantara-antara di ujung ni gamis i.

³⁵Angkon pakeon ni si Harun do mantel on muda hatiha markarejo ia songon malim. Muda hatiha ro tu adopanKu di Inganan Na Badia sanga laho kehe sian i, tarbege ma sora ni giring-giring i, gabe nada be bunuon ia.

³⁶Baen ma sada parhiasan sian sere na polin na nigorga dohot pandohan, ‘Nabadia di TUHAN’.

³⁷Tambatkon ma i tu saroben i dohot tali na rata langit.

³⁸Angkon pasangon ni si Harun do parhiasan sere i di bohinia anso ra Au TUHAN manjagit sude haul na nioban ni halak Israel tu Au, haru pe umpamana madung adong saotik na sala dibaen halahi.

³⁹Anggo kameja ni si Harun, angkon sian abit linen na halus do partonunna baenon. Baen muse ma sada saroben sian abit linen na halus dohot bobat na nisulam.

⁴⁰Baen ma kameja, bobat dohot kupia di angka dakdanak ni si Harun anso toman boti jeges idaon.

⁴¹Papakehon ma pakean i tu angkangmu si Harun dohot tu angka dakdanaknia i. Miahi ma halahi dohot miak zetun; jadi sah ma halahi gabe malim jana dipasahat laho mangoloi Au.

⁴²Baen ma saraor pendek sian abit linen di halahi, ginjangna mamungka sian gonting lalu tu hae-haena, anso ulang haidaan na niabitanna i.

⁴³Angkon tongtong do marsaraor si Harun dohot angka dakdanaknia i muda masuk halahi tu bagasan Bandar ParmiananKu sanga donok tu langgatan laho maribadat songon malim di Inganan Na Badia. Jadi gabe nada hona bunu be halahi hara ni na tarida na niabitan ni halahi. Hot do aturan on tu si Harun dohot pomparannia.”