Read Batak Angkola HARURUAR 29 Bible Online

HARURUAR 29 - Batak Angkola bible

HARURUAR 29

¹“Songon on ma carana baenon pabadiahon si Harun dohot angka dakdanaknia anso tarbaen halahi mangoloi Au songon malim. Buat ma sada lombu jantan na poso dohot dua biri-biri jantan na so martihas.

²Baen ma roti sian topung tarigu na dumenggan, ulang pake ragi. Baen ma deba roti na somal, deba roti na tingko marmiak zetun jana deba nari baen ma roti na nipis na nidaiskon miak saotik.

³Baen ma i di ampang jana haulkon ma i tu Au rap dohot lombu jantan dohot biri-biri jantan na dua i.

⁴Suruhon ma si Harun dohot angka dakdanaknia i ro tu pintu ni Bandar ParmiananKi jana paias diri ma halahi hombar tu upacara ni ugamo.

⁵Papakehon ma pakean malim i tu si Harun — kameja, efod dohot tutup ni andora dohot bobat i.

⁶Papakehon ma saroben tu ulunia jana tambatkon ma tanda na badia na manggorgahon ‘Nabadia di TUHAN’ di ulunia.

⁷Jadi buat muse miak na badia, duruskon ma i di ginjang ni ulunia jana miahi ma ia.

⁸Suru ma muse angka dakdanaknia ro jana papakehon ma kameja tu halahi,

⁹bobat dohot basaen jana kupiai ma halahi. Songon i ma baen carana mangangkat si Harun dohot angka dakdanaknia i. Angkon oloan ni halahi ma Au lopus tu pinompar ni halahi ro di salolot-lolotna songon malim.

¹⁰Oban ma lombu jantan i tu jolo ni Bandar ParmiananKu. Angkon ampehonon ni si Harun dohot angka anaknia i ma tangan ni halahi tu ulu ni lombu jantan i.

¹¹Angkon disi do nisambol lombu i, di jolo ni ingananKu na badia, di pintu ni Bandar Parmianan.

¹²Buat ma saotik mudar ni lombu i jana daiskon ma dohot jari-jarimu tu angka tanduk ni langgatan i.

¹³Dung i muse angkon buatonmu do sude tabo-tabo na manutupi butuhana i, bagian na dumenggan sian ate-atena dohot piana na dua i dohot tabo-tabo na lohot disi, payakkon ma i di langgatan jana tutung ma i songon haul tu Au.

¹⁴Anggo juhut, huling-kuling dohot isi ni butuha ni lombu jantan i, angkon di ruar ni Bandar Parmianan do i tutungon. On ma haul hasesaan ni dosa.

¹⁵Buat muse ma sada sian biri-biri jantan i. Angkon payakkonon ni si Harun dohot angka anaknia i do tangan ni halahi tu ginjang ni ulu ni biri-biri i.

¹⁶Dung i sambol ma binatang i, buat ma mudarna i jana pispiskon ma tu suhi-suhi na opat ni langgatan i.

¹⁷Sambol ma biri-biri i marbagi-bagi, dung i basu ma butuhana dohot patna, jana payakkon ma i di ginjang ni uluna rap dohot bagian-bagian na asing.

¹⁸Tutung ma sude biri-biri jantan i di ginjang ni langgatan i gabe haul na nitutung. Uap ni haul on ma na pasonang Au.

¹⁹Buat ma biri-biri jantan na sada nari i — i ma biri-biri sihaulkononkon. Suruhon ma anso dipayakkon si Harun dohot dakdanaknia i tangan ni halahi tu ulu ni pahan-pahanan i.

²⁰Lalu sambol ma i, buat ma saotik mudarna i jana daiskon ma tu pinggol siamun ni si Harun dohot dakdanaknia i, di inang ni tangan siamun dohot inang ni jari-jari ni pat siamun ni halahi. Angkon pispiskononmunu do lobi ni mudar i tu suhi na opat ni langgatan i.

²¹Buat ma saotik mudar na di langgatan i dohot miak na badia saotik, lalu pispiskon ma i tu si Harun dohot tu pakeannia, songon i tu dakdanaknia dohot tu pakean ni halahi. Jadi songon i ma carana si Harun dohot dakdanaknia bope pakean ni halahi dihaulkon tu Au.

²²Buat ma tabo-tabo ni biri-biri jantan i, ihurna na martabo-tabo i, tabo-tabo na sian butuhana i, bagian na dumenggan sian ate-atena i, piana na dua dohot tabo-tabo na lohot disi dohot hae-hae siamunna i.

²³Buat ma sada roti ganop macam sian karanjang ni roti na dung dihaulkon i tu Au: Sada ma i na nibaen marmiak zetun, sada na so marmiak jana sada nari roti na so marragi.

²⁴Pasahat ma sude panganon i tu tangan ni si Harun dohot angka anakna i jana suruhon ma halahi manghaulkon roti i tu Au gabe haul na mardohoan tu Au.

²⁵Jadi buat ma roti i sian halahi lalu tutung ma di ginjang ni langgatan i, di ginjang ni haul situtungon sinangkinan gabe haul panganon di Au. Uap ni haul on ma na pasonang rohangKu.

²⁶Buat ma andora ni biri-biri jantan i jana haulkon ma i tu Au gabe haul na mardohoan. Bagianmu ma andora ni biri-biri i.

²⁷Di upacara pangangkatan ni malim, andora dohot hae-hae ni biri-biri na nipake di upacara i angkon nihaulkon tu Au gabe haul na mardohoan jana nipainding ma i bagian ni malim.

²⁸HaputusanKu do on na so tola ubaon: Di na ro bangsongKu manghaulkon haul pardonganan, andora dohot hae-hae ni pahan-pahanan i, gabe bagian ni angka malim. I ma haul ni bangsongKu di Au, TUHAN.

²⁹Pakean hapunjungan ni malim, angkon pateankonon ni si Harun do i tu angka anakna di na laho mate ia, anso tarpake na manggontisa di na mangangkatsa gabe malim.

³⁰Sanga ise sian anak ni si Harun na manggonti amangna i gabe malim jana masuk tu Bandar ParmiananKu laho maribadat di Inganan Na Badia, angkon pakeonnia do pakean i pitu ari honokna.

³¹Buat jana lompa ma juhut ni biri-biri jantan na nipake di upacara pangangkatan ni si Harun dohot dakdanaknia i gabe malim, di sada inganan na badia.

³²Angkon di pintu ni Bandar ParmiananKu do panganon ni si Harun dohot angka anaknia i juhut i rap dohot roti na teba di ampang i.

³³Angkon panganon ni halahi do sipanganon na nihaulkon di upacara panyesaan ni dosa di pangangkatan ni halahi gabe malim. Hum malim sajo do na tola mangankon sipanganon on, hara ni na dung diparbadiai i.

³⁴Ancogotna i manyogotna, ampot sai adong dope lobi juhut i sanga roti i, angkon nitutung do i lopus abis, jana nada tola nipangan be i angke madung diparbadiai do i.

³⁵Upacara pangangkaton ni si Harun dohot angka anaknia i, angkon gok pitu ari patupaon, songon na Huparentahon tu ho.

³⁶Ganop ari angkon nihaulkon lombu jantan baen hasesaan ni dosa dohot pabadiahon langgatan. Lalu miahi ma langgatan i dohot miak zetun anso gabe badia.

³⁷Baen ma songon i ganop ari salolot pitu ari. Jadi gabe badia ma sude langgatan i jana sanga ise bope sanga aha sajo pe na manondongsa marmara ma i baenon ni hagogoan ni habadiaanna.”

³⁸“Ganop ari tu joloan on, angkon haulkonon dua biri-biri na marumur sataon di ginjang ni langgatan i.

³⁹Sada ma i haul manyogotna jana na sada nari ma i tu andospotang.

⁴⁰Rap dohot biri-biri na parjolo i angkon nihaulkon ma sakilo topung tarigu na dumenggan nicampur dohot miak zetun na polin saliter. Laing haulkon muse ma saliter anggur.

⁴¹Anak ni biri-biri na paduahon i nihaulkon ma i andospotang rap dohot sakilo topung, saliter miak zetun dohot saliter anggur. On ma na gabe haul panganon di Au, TUHAN jana uapna i ma na pasonang rohangKu.

⁴²Tu joloan on sapanjangna, angkon nihaulkon ma haul situtungon di adopanKu di pintu ni Bandar ParmiananKu. Disi ma Au, marsuo dohot bangsongKu jana mangkobari tu hamu.

⁴³Disi ma Au marsuo dohot bangso Israel, jana gabe badia ma inganan i baenon ni sinondang na sumirlak hara ni na ro Au disi.

⁴⁴Gabe badia ma Bandar Parmianan dohot langgatan i baenonKu. PaasingonKu ma si Harun dohot angka dakdanaknia sian halak na asing anso gabe malim halahi mangoloi Au.

⁴⁵Maringanan ma Au di tonga-tonga ni halak Israel, jana Au ma Debata ni halahi.

⁴⁶Gabe botoon ni halahi ma bahaso Au do TUHAN Debata ni halahi na maroban halahi ruar sian Mesir, anso tarbaen Au maringanan di tonga-tonga ni halahi. Au ma da TUHAN Debata ni halahi.”