Read Batak Angkola HARURUAR 31 Bible Online

HARURUAR 31 - Batak Angkola bible

HARURUAR 31

¹Didok TUHAN ma tu si Musa,

²“Madung Hutodo si Besaleel anak ni si Uri, pahompu ni si Hur sian Marga Juda,

³jana Hugohi ia dohot Tondi Ni Debata. Madung Hulehen disia pangastuion, hamaloan dohot hagogoan domu tu sandok ragam ni hamaloan, hajegesan:

⁴laho mambaen rangrangan na manghaporluhon hamaloan lalu mangkarejohonsa sian sere, perak dohot tumbaga;

⁵laho manggarut simata na giot sipakeon; laho manggorga hayu bope sude ragam ni sude parkarejoan hajegesan na asing.

⁶Boti madung Hutodo si Oholiab, anak ni si Ahisamak sian Marga Dan laho mangurupi ia. Madung Hulehen muse hamaloan godang tu angka tukang na malo, anso laing tarpature halahi sanga aha na Huparentahon:

⁷Bandar ParmiananKu, Poti Parjanjian dohot tutupna, sude panjamaan ni Bandar Parmianan,

⁸meja dohot angka panjamaanna, parlampuan dohot panjamaanna, dohot langgatan panutungan i,

⁹langgatan panutungan dohot angka panjamaanna, sambong pamasuan dohot jongjonganna,

¹⁰pakean malim na tumbuk di si Harun dohot angka dakdanaknia, i ma sipakeon ni halahi muda hatiha mandalankon karejo songon malim,

¹¹miak upacara, dohot hamonyan na huskus di Inganan Na Badia. Sasudena i angkon tumbuk do songon na Hudok tu ho baenon ni halahi.”

¹²Diparentahon TUHAN ma si Musa,

¹³paboahon tu bangso Israel, “Pagodang hamu ma Ari Sabat i, ari na dung Hutotopkon songon Ari Paradianan. Ari i ma na gabe tanda ni parjanjianKu dohot hamu ro di pinomparmunu, anso diboto hamu, Au do TUHAN na mambaen hamu gabe bangsongKu sandiri.

¹⁴Angkon pasangapanmunu do Ari Sabat, angke ari na badia do i di hamu; sanga ise mangalanggar habadiaan ni Ari Sabat i, simatehonon noma i; angke sanga ise na mambaen karejo di ari i, siagohononkon do i sian tonga-tonga ni bangsomunu.

¹⁵Onom ari lolotna tola markarejo, tapi anggo ari papituhon angkon marari Sabat do, i ma Ari Paradianan na gok, ari na badia di TUHAN: Sanga ise na mambaen karejona di Ari Sabat, nimatehon do uhuman ni i.

¹⁶Jadi angkon pasangapan ni halak Israel do Ari Sabat, markite-hite na manghagodangkon Ari Sabat i marsundut-sundut angke i ma parjanjian na manongtong.

¹⁷I ma sada tanda parjanjian antara Au dohot bangso Israel ro di salolot-lolotna; angke di bagasan onom ari do ditompa TUHAN langit dohot tano, jana maradian do Ia di ari papituhon i.”

¹⁸Dung sidung Debata manghatai dohot si Musa di Dolok Sinai, dilehen Ia ma tu si Musa batu panyuratan ni uhum ni Debata, batu sidua-dua na nisurat ni tangan ni Debata sandiri.