Read Batak Angkola HARURUAR 33 Bible Online

HARURUAR 33 - Batak Angkola bible

HARURUAR 33

¹Didok TUHAN ma tu si Musa, “Mardalan ma ho sian on rap dohot bangso na niuluhonmu ruar sian Mesir, tu luat na Hujanjihon mardongan sumpa tu si Abraham, si Ishak dohot si Jakob dohot tu pomparan ni halahi.

²SuruonKu do sahalak surusuruan mardalan di jolomu jana paorotonKu halak Kanaan, halak Amori, halak Het, halak Peris, halak Hewi dohot halak Jebus.

³Masuhanmunu ma tano na gok susu dohot aer ni loba. Harana nada ra Au mardalan di tonga-tongamunu dibaen bangso sijogal rungkung do hamu anso ulang abis hamu lalu Hubaen di tonga dalan i.”

⁴Umbege ondam-ondam na jorbut i, marhabot ni roha ma halahi, umpe sahalak be na mamake barang parhiasanna.

⁵Madung diparentahon TUHAN tu si Musa anso didok ia tu bangso i, “Bangso sijogal rungkung do hamu. Muda mardalan Au di tonga-tongamunu hum sangombas pe tontu sun ma hamu mago baenonKu. Jadi hara ni i bukai hamu ma angka barang parhiasanmunu i anso Huida jolo sanga aha na giot sibaenonKu tu hamu.”

⁶Songon i ma dalanna nada mamake barang parhiasan be halak Israel mamungka sian Dolok Sinai.

⁷Dung i dibuat si Musa ma bandar i jana dipahirbang ia ma dao di ruar ni parbandaran i jana digoari ia ma i Bandar Parmianan Ni TUHAN. Sanga ise halak na manjalahi TUHAN, ro ma ia tu Bandar Parmianan Ni TUHAN na di ruar ni parbandaran i.

⁸Muda hatiha ruar si Musa jana kehe tu bandar i, ngot ma sude bangso i jana jongjong di pintu ni bandarna be jana diihutkon halahi ma dohot mata ni halahi lopus masuk ia tu bandar i.

⁹Muda dung masuk si Musa tu bandar i mijur ma tiang ombun i jana so ma i di pintu ni bandar i jana manghatai ma TUHAN dohot si Musa sian ombun i.

¹⁰Jadi muda dung diida halahi so tiang ombun i di pintu i, marsomba ma halahi di pintu ni bandarna be.

¹¹Jana marsiadopan bohi do TUHAN manghatai dohot si Musa songon sada halak na manghatai dohot donganna; dung sidung, mulak ma ia mangulahi tu parbandaran. Tapi anggo pangoloinia si Josua anak ni si Nun, na poso dope. Anggo ia nada morot sian bandar i.

¹²Jadi didok si Musa ma sanoli tu TUHAN, “Tutu do disuru TUHAN au maroban bangso on tu tano na nijanjihonMi, tapi nanggo adong dipaboa Ho tu au sanga ise sisuruonMu mandongani au. Tapi haru songon i pe laing didok Ho do, na nitandaMu goarku jana lomo rohaMu di au.

¹³Antong paboa ma sugari sangkapMu tu au, anso taroloi au Ho jana anso sai tongtong lomo rohaMu mida au. Laing ingot ma, Ho muse do mamili bangso on anso Ho nampunasa.”

¹⁴Jadi didok Ia ma, “Sai dongananKu do hamu jana lehenonKu hamonangan di hamu.”

¹⁵Didok si Musa ma tuSia, “Anggo inda Ho sandiri na manguluhon hami, indangkon ma sai suru hami kehe sian on.

¹⁶Sian dia ma antong parbinotona bahaso na lomo rohaMu di bangsoMon dohot tu au anggo na so dongananMu hami? Nada he hara ni na rap do Ho dohot hami umbaen na markoti bangsoMi sian angka bangso na asing di tano on?”

¹⁷Didok TUHAN ma tu si Musa, “Huoloi pe pangidoanmi hara ni na lomo rohangKu di ho jana Hutanda ho tangkas.”

¹⁸Tapi dialusi si Musa ma, “Antong patuduhon ma jolo tu au sinondang ni parmiananMi.”

¹⁹Dialusi Ia ma, “Hupatidahon pe sude sinondang ni hasangapanKu sian jolomu jana Hupaboa pe goarKu na badia i. Hulehen pe asi ni roha sanga na tu ise silehenonKu asi ni roha jana Huhaholongi ma sanga ise sihaholonganKu.”

²⁰Laing didok Ia dope, “Anggo bohingKu nada Hupatola ligionmu, angke nada adong na tarbaen mangolu sanga ise na marnida bohingKu.

²¹Adong do di lambungKon sada inganan, tarbaen ho do jongjong di batu i;

²²muda mamolus sinondang ni hasangapanKu, Hubaen pe ho tu holang-kolang ni batu i jana Hugupgupi pe ho dohot tanganKu lopus salpu Au.

²³Dung salpu i, Huela ma tanganKi jana idaonmu ma Au sian pudingKu tapi nada idaonmu anggo bohingKu.”