Read Batak Angkola HARURUAR 34 Bible Online

HARURUAR 34 - Batak Angkola bible

HARURUAR 34

¹Didok TUHAN ma tu si Musa, “Tuhil ma jolo dua batu sarupa dohot na parjolo i, giot suratonKu di batu i sude hata na adong di batu na parjolo na nitaporkonmi.

²Markobas ma ho marayak manyogot jana manangkok ma ho manyogot i tu Dolok Sinai; jongjong ma ho disi adop Au di ambubu ni dolok i.

³Tapi ulang ho mardongan sahalak pe manangkok tusi jana ulang adong sahalak pe na tarida di dolok i sude, salang hambeng biri-biri pe dohot lombu nada tola manjampal humaliang dolok i.”

⁴Jadi dituhil si Musa ma dua lambar batu sarupa dohot batu na parjolo i; ngot ma ia sogot manyogot i jana manangkok ma ia tu ginjang ni Dolok Sinai songon na niparentahon ni TUHAN i tusia jana dioban ia ma di tangannia batu na dua i.

⁵Mijur ma TUHAN di bagasan ombun, lalu jongjong di jolo ni si Musa jana digoari Ia ma goarNia na badia i, i ma TUHAN.

⁶Dung i mardalan ma TUHAN mamolus sian jolo ni si Musa jana pio-pio, “Au, TUHAN, Au do Debata parholong jana paribo roha. Na gok holong do Au, setia jana na lambok.

⁷Hupatulus do baga-bagangKu tu marribu-ribu sundut jana Huampuni do hajahatan dohot dosa i tapi nada lalap boti Au manguhumi parjahat bope dakdanak dohot pahompumunu lopus tu sundut patoluhon dohot paopatkon hara ni dosa ni simatobang ni halahi.”

⁸Diompot si Musa ma mangalompit tot tu tano marsomba.

⁹Didok ia ma, “TUHAN, muda na tutu ma lomo rohaMu mida au, pangidoanku, ale TUHAN, mardalan ma sugari TUHAN di tonga-tonganami; haru pe bangso sijogal rungkung bangso on, laing ampuni ma hasalaan dohot dosanami; jagit ma hami songon bangsoMu sandiri.”

¹⁰Didok Ia ma tu si Musa, “Saonnari baenonKu ma parjanjian. BaenonKu ma angka hahomangan di jolo ni bangsomon, songon na so jungada tarjadi di sude tano on di tonga-tonga ni angka bangso. Idaon ni sude bangso na humaliang hamu ma, na nibaen ni TUHAN, angke sanga aha na Hubaen rap dohot ho, pambaenan na godang situtu do i.

¹¹Tapi anggo ho angkon marsitiopan tu na Huparentahon tu ho sadari on. Ligi ma angkon Huayak halak Amori sian jolomu, songon i halak Kanaan, halak Het, halak Peris, halak Hewi dohot halak Jebus.

¹²Jago-jago hamu, ulang jabat mambaen janji hamu dohot halak di luat na nidapotkonmunu i, anso ulang gabe jorgong halahi muse di tonga-tongamunu.

¹³Sabalikna do, angkon rumpakkononmunu angka langgatan ni halahi angka tugu ni gana-ganaan ni halahi be tabaonmunu do.

¹⁴Ulang marsomba tu debata na asing, angke Au, TUHAN, Debata Pangiburu do Au, nada tarpadiar Au adong imbang di Au.

¹⁵Ulang jabat mambaen janji hamu dohot halak luat i; angke muda marsomba halahi tu angka debatana i jana pasahat haul, piohonon ni halahi ma hamu anso rap dohot halahi mangankon na nihaulkon ni halahi.

¹⁶Muda dialap hamu boru ni halahi gabe parumaenmu, jana markarosuan ma angka daboru i mangihutkon debata ni halahi, gabe elek-elekon ni halahi ma angka anakmi anso dohot markarosuan mangihutkon debata ni halahi.

¹⁷Ulang baen hamu debata na nituang di hamu.

¹⁸Pasangap ma Ari Pesta Roti Na So Marragi; pitu ari honokna angkon mangan roti na so marragi hamu, laing songon na Huparentahon tu ho di tingki na niaturkon di bulan Abib; harana di bulan Abib i do hamu ruar sian tano Mesir.

¹⁹Sandok anak halaklahi na parjolo sorang, Au do nampunasa, bope sandok jantan sian pahan-pahananmu, anak ni lombu sanga biri-biri na parjolo sorang.

²⁰Tapi anggo anak ni halode na parjolo sorang, angkon tobusonmunu do dohot sada biri-biri songon gontina. Muda nada ra hamu manobusna angkon ponggolkononmu do rungkungna i. Ganop anak siangkaanmunu angkon tobusonmunu do i. Ulang ma adong sahalak na tarida ro tu jolongKu na so marsilua.

²¹Onom ari ma lolotmu diloas markarejo, tapi anggo di ari papituhon angkon maradian do jana di hatiha ni pangkuron pe sanga di sabion angkon laing pasangaponmu do ari paradianan i.

²²Angkon pagodangonmu do Pesta Gotilon di na mamungka hamu mambuat patumonaan ni suha ni eme. Laing pestahon hamu ma Ari Pesta Undung-undung Bulung Rata marayak ujung ni taon di ari palimapuluhon i.

²³Tolu noli sataon, angkon sude halaklahi sian hamu angkon ro marsomba tu Au, TUHAN, Debata ni Israel.

²⁴Dung Hupaorot, angke paorotonKu ma angka bangso sian jolomu jana pabidangonKu ma luat ingananmu; jana nada adong umpe sahalak na puluk mambuat luat ingananmu, muda kehe hamu mamestahon Pesta Roti Na So Marragi, Pesta Gotilon dohot Ari Pesta Undung-undung Bulung.

²⁵Ulang haulkon hamu roti na marragi muda ro hamu manghaulkon pahan-pahanan tu Au. Na nisambol baen haul di Pesta Paskah, nada tola tinggalhononmunu saotik pe lalu tu ancogotna.

²⁶Na dumenggan sian patumonaan ni suha ni ememunu ganop taon angkon i do obanonmu tu Bagas Ni TUHAN. Ulang lompa hamu anak ni hambeng di bagasan susu ni indukna.”

²⁷Didok TUHAN ma tu si Musa, “Suratkon ma sudena hata on, harana baenonKu ma parjanjian dohot ho bope dohot Israel, marojahan tu hata on.”

²⁸Disi ma si Musa rap dohot TUHAN opat pulu ari opat pulu borngin honokna, nada mangan nada minum jana disuratkon ia ma di batu i sude hata ni parjanjian i, i ma Parenta Na Sampulu ni Debata.

²⁹Di na manuat si Musa sian Dolok Sinai dioban ia ma dua batu hasaksian i; sian na so pamotoannia hape na marsinondang do bohinia hara ni na dung manghobari ia dohot TUHAN.

³⁰Disi diida si Harun dohot halak Israel bohinia, diida halahi ma na marsinondang bohina i, jadi gabe mabiar ma halahi mandonohi ia.

³¹Tapi dipiohon si Musa ma halahi gabe ro ma si Harun dohot sude pamimpin ni bangso i mandapotkon si Musa jana manghobari ma ia tu halahi.

³²Dung songon i, dipadonok halak Israel ma tusia jana dipalalu ia ma tu halahi sude parenta na nidok ni TUHAN tusia di ginjang ni Dolok Sinai i.

³³Dung sidung si Musa manghobari dohot halahi, digupgupi ia ma bohinia.

³⁴Tapi muda giot masuk ia tu Bandar Parmianan Ni TUHAN laho manghatai dohot Ia, dibuka ia do panggupgupi ni bohinia i lopus ruar ia; jadi muda dung haruar ia, didok ia ma tu halak Israel sanga na aha na nitonahon ni TUHAN tusia,

³⁵jana diida halahi ma marsinondang bohinia. Gabe digupgupi si Musa ma bohinia i mangulahi lopus masuk ia mangulahi mangadop laho mangkatai dohot TUHAN.