Read Batak Angkola HARURUAR 39 Bible Online

HARURUAR 39 - Batak Angkola bible

HARURUAR 39

¹Dibaen si Besaleel dohot si Aholiab ma pakean na jeges-jeges sian wol na rata langit, na bunga torung, dohot na rara sipakeon ni angka malim muda hatiha maribadat halahi di Inganan Na Badia. Pakean malim ni si Harun, dibaen halahi hombar tu na diparentahon ni TUHAN tu si Musa.

²Dibaen halahi ma efod sian abit linen na halus, wol na rata langit, na bunga torung dohot na rara dohot bonang sere.

³Ditopa halahi ma marlempeng-lempeng sere na dirasip muse gabe bonang na nipis, lalu ditonun ma i dohot abit linen na halus, dohot wol na rata langit, na bunga torung dohot na rara.

⁴Dibaen halahi ma dua tali abara ni efod i na dilohotkon di topina anso tartambat.

⁵Songon i muse dohot bobat laing sian abit na halus partonunna, dibaen ma i di efod i gabe sada dohot baju songon na diparentahon TUHAN tu si Musa.

⁶Digosok halahi ma batu intan dalimo lalu dipasang ma i marbingke sere. Markite-hite hamaloanna digorga halahi ma goar-goar ni anak ni si Jakob na dua bolas i di angka batu intan i.

⁷Dung i dibaen ma angka batu intan i tu tali abara ni baju efod i laho mangwakili marga-marga ni Israel na dua bolas i songon na diparentahon TUHAN tu si Musa.

⁸Dibaen si Besaleel dohot si Aholiab ma tutup ni andora sian abit na sarupa dohot efod i, sulamanna pe laing sarupa.

⁹Maropat sogi do potongna tapi dilompit dua, 22 sentimeter do bidangna dohot ginjangna.

¹⁰Dibaen do opat baris batu intan di tutup ni andora i, di baris parjolo: batu dalimo, topas dohot baiduri sopa;

¹¹baris na paduahon: zamrud, batu nilam dohot intan;

¹²baris patoluhon: batu lasuardi, akik dohot batu lampusung;

¹³jana di baris paopatkon: batu pirus, jakut dohot ratna. Marbingke sere do sudena i dibaen.

¹⁴Tarsurat do di sada be batu i goar ni anak ni si Jakob mangwakili marga-marga ni Israel na dua bolas i.

¹⁵Jana dibaen ma rante-rante sian sere na polin na dipuyu songon tali.

¹⁶Dung i dibaen ma dua golang sere na dipasang di ujung parginjang ni tutup ni andora i.

¹⁷Disurukkon ma rante sere i tu golang na dua sinangkin,

¹⁸jana ujungna na sabariba nari ditambatkon ma i tu bingke na dua i, jadi gabe tambat ma jolona i di tali abara ni efod i.

¹⁹Dibaen halahi muse ma dua nari golang na asing na dipasang di suhi na dua sian toru ni tutup andora i, dihilim parbagasan na dais tu efod i.

²⁰Dibaen halahi muse ma dua nari golang sere na dipasang di toru sabola jolo ni tali abara ni efod i di lambung ni pangkilimanna i jana di ginjang ni bobat na sian tonunan na halus i.

²¹Hombar tu na niparentahon ni TUHAN tu si Musa, dibaen halahi ma sambungan ni golang ni tutup andora i tu golang ni efod dohot tali na rata langit, jadi gabe hot ma tutup andora di ginjang ni basaenna i nada taldus.

²²Mantel na dipake di ginjang ni efod i, na nibaen sian wol na rata langit do i sudena.

²³Lubang ni rungkungna i dibibiri do i togu ditonun anso ulang mura masibak.

²⁴Di topina i sian toru humaliang, dibaen hiasanna tar songon batu ni dalimo sian abit linen na halus, dohot sian wol na rata langit, na bunga torung dohot na rara, diholang-holangi giring-giring sere, hombar tu na diparentahon ni TUHAN tu si Musa.

²⁷Dibaen halahi ma kameja di si Harun dohot di angka anaknia,

²⁸songon i saroben, kupia, saraor pendek sian abit linen,

²⁹dohot bobat sian abit linen na halus, wol na rata langit, na bunga torung dohot na rara, na dipajeges dohot sulam-sulaman, hombar tu na diparentahon TUHAN tu si Musa.

³⁰Dibaen muse dope hiasanna sian sere na polin, i ma tandana paboa na dung gabe dihapunjungkon halahi tu TUHAN. Digorgahon do hiasanna i marhite hata na mandok, “Dihapunjungkon tu TUHAN”.

³¹Dipasang ma hiasan i di sarobenna i sian jolo, hombar tu na diparentahon ni TUHAN tu si Musa.

³²Ujungna sidung ma sudena karejo i na paulihon Bandar Parmianan Ni TUHAN i. Madung disalosehon halak Israel sudena hombar tu na diparentahon ni TUHAN tu si Musa.

³³Dioban halahi ma antong tu si Musa Bandar Parmianan dohot sude parkokasna, angka sangkotanna, angka balok na mamarat i, angka tiang dohot ojahanna,

³⁴tutupna na sian bobak ni hambeng jantan na dirarai, tutupna na sian bobak na halus, tire panutup ni Inganan Na Sun Badia;

³⁵Poti Parjanjian na marisi batu sidua lambar dohot porsan-porsanna maradu dohot tutupna,

³⁶meja dohot sude panjamaanna dohot roti na nihaulkon tu Debata,

³⁷parlampuan na sian sere mata, angka lampuna maradu sude panjamaanna, miak ni lampu,

³⁸langgatan sere, miak upacara, pultak ni hamonyan, tire baen pintu ni Bandar Parmianan,

³⁹langgatan tumbaga dohot dalan-dalanna na sian tumbaga, tungkot porsan-porsanna dohot sude na porlu tusi; bak inganan pamasuan dohot ojahan ingananna,

⁴⁰angka tire na gabe handang ni alamanna dohot angka tiang maradu ojahanna, tire ni alaman maradu angka tali-talina, angka pasi ni Bandar Parmianan; sude panjamaan sipakeon di bagasan Bandar Parmianan;

⁴¹dohot angka pakean hagodangan sipakeon ni angka malim di Inganan Na Badia dohot pakean dinas ni si Harun dohot angka anaknia.

⁴²Madung dipatulus halak Israel sude karejo i laing songon na niparentahon ni TUHAN tu si Musa.

⁴³Dipareso si Musa ma sudena i jana diida ia ma bahaso na dung tumbuk sudena dibaen laing songon na niparentahon ni TUHAN. Jadi dipasupasu si Musa ma antong halahi.