Read Batak Angkola HARURUAR 40 Bible Online

HARURUAR 40 - Batak Angkola bible

HARURUAR 40

¹Didok TUHAN ma tu si Musa,

²“Pasangonmu ma Bandar ParmiananKi di tanggal sada bulan sada.

³Pamasuk ma tu bagasan Bandar Parmianan Poti Parjanjian na marisi Parenta Na Sampulu i lalu pasang ma tire di jolona i.

⁴Pamasuk ma meja i lalu pambaeni ma angka parkokas tu ginjangna i. Laing pamasuk muse ma parlampuan i jana pagara ma lampu i.

⁵Payakkon ma langgatan sere inganan panutungan ni hamonyan i di jolo ni Poti Parjanjian i jana angkon di pintu ni Bandar Parmianan do gantungkononmu tirena i.

⁶Tapi anggo langgatan pamelean ni pelean situtungon angkon pajongjongonmu do di jolo ni pintu Inganan Na Badia i, bandar parluhutan i.

⁷Langgatan baen haul situtungon i angkon di antara ni Bandar Parmianan dohot langgatan do i baenonmu lalu baen ma aek tusi.

⁸Dung i handangna i angkon pasangonmu do humaliang Bandar Parmianan jana angkon gantungkononmu tire di pintu ni alaman i.

⁹Dung i angkon pasahatonmu do Bandar Parmianan dohot sude panjamaanna i tu Au marhite na mamiahisa dohot miak upacara, jadi gabe dihapunjungkon ma i di Au.

¹⁰Dung i angkon pasahatonmu do tu Au langgatan i dohot sude panjamaanna marhite na mamiahisa, anso sudena i dihapunjungkon.

¹¹Dung i pasahat ma bak parbasuan i dohot ojahanna i, sarupa pambaenna.

¹²Dung i angkon suruonmu do si Harun dohot angka anaknia ro tu pintu ni Bandar Parmianan jana marpangir ma halahi mangihutkon upacara ugamo.

¹³Papakehon ma pakean malim i tu si Harun, miahi ma ia jana marhite na songon i ma dihapunjungkon ho ia anso tarbaen ia mangoloi Au songon malim.

¹⁴Dung i oban muse ma angka dakdanaknia jana papakehon ma kameja tu halahi.

¹⁵Jana miahi ma halahi songon pamiahimu di amang ni halahi i, anso laing tarbaen muse ma halahi mangoloi Au songon malim. Markite-hite upacara na mamiahi i, gabe malim ma halahi salolot-lolotna.”

¹⁶Dipatulus si Musa ma sudena songon na niparentahon ni TUHAN i.

¹⁷Jadi di tanggal sada bulan sada di taon paduahon dung ditadingkon bangso Israel tano Mesir, dipajongjong ma Bandar Parmianan ni TUHAN.

¹⁸Dipayakkon si Musa ma ojahanna, dipajongjong ma angka tiangna jana dipasang ma angka balok na manggistang.

¹⁹Dipahembang ia ma tarup ni Bandar Parmianan lalu dipayakkon ia ma tutupna parruar di ginjangna, songon na niparentahon ni TUHAN i.

²⁰Dung i dibuat ia ma batu na dua karambar i jana dipamasuk ia ma i tu Poti Parjanjian. Porsan-porsan ni Poti i disurukkon ia ma tu bagasan golang-golang pamorsananna lalu dipasang ma tutupna di ginjang.

²¹Lalu dipamasuk ma Poti i di bagasan Bandar Parmianan, dung i digantungkon ma tire pangondingina di jolo. Songon i ma pangholipi ni Poti Parjanjian i dibaen.

²²Dung i dibaen si Musa ma meja di bagasan Bandar Parmianan, sabola Utara di ruar ni tire i,

²³lalu dipayakkon ia roti sihaulkonon tu TUHAN di ginjangna i.

²⁴Parlampuan i pe dibaen ia ma di bagasan Bandar Parmianan, sabola Selatan paadop-adop dohot meja i,

²⁵dung i dipagara si Musa ma angka lampu i di adopan ni TUHAN.

²⁶Dipayakkon ma langgatan sere di bagasan Bandar Parmianan i, di jolo ni tire i,

²⁷jana ditutung ia ma hamonyan na huskus di ginjangna songon na niparentahon ni TUHAN i.

²⁸Digantungkon si Musa ma tire di pintu ni Bandar Parmianan,

²⁹lalu dibaen ia ma di jolo ni pintu i langgatan ni haul situtungon. Dihaulkon ia ma haul situtungon dohot haul gandum di ginjang ni langgatan i.

³⁰Bak parbasuan dibaen ia di antara ni Bandar Parmianan dohot langgatan lalu digohi ia dohot aek.

³¹Disi ma si Musa, si Harun dohot angka anaknia marbasu tangan dohot pat

³²ganop masuk halahi tu bagasan Bandar Na Badia i sanga dumonok tu langgatan i, basuon ni halahi ma pat dohot tanganna, songon na niparentahon ni TUHAN i.

³³Dibaen ia ma handang humaliang Bandar Parmianan dohot langgatan lalu digantungkon ia ma tire di pintu ni alamanna i. Jadi dung songon i, salose ma sude karejo i.

³⁴Dung i mijur ma ombun manutupi Bandar Na Badia i jana digohi sinondang na marnyala sian haroro ni TUHAN ma Bandar Parmianan.

³⁵Jadi gabe nada hamasuhan si Musa be tu bagasan Bandar Parmianan.

³⁶Muda manaek ombun i sian Bandar Na Badia i, dibungkar halak Israel ma parbandaranna laho pinda tu inganan na asing.

³⁷Muda laing hot do ombun i di ginjang ni Bandar Na Badia i, laing hot muse ma halahi di parbandaran ni halahi.

³⁸Salolot na madang-adang i bangso Israel tarida do haroro ni TUHAN di ginjang ni Bandar Parmianan di bagasan rupa ni ombun muda hatiha arian jana di bagasan rupa ni api na marjilam muda borngin.