Read Batak Angkola HARURUAR 5 Bible Online

HARURUAR 5 - Batak Angkola bible

HARURUAR 5

¹Dung i kehe ma si Musa dohot si Harun manopot raja Mesir, ninna halahi ma, “Songon on ma hata ni TUHAN Debata ni Israel, ‘Paloas ma bangsongKi kehe anso dibaen halahi ibadat tu Au di halongonan.’ ”

²Disapai raja Mesir i ma, “Ise dehe TUHAN i? Biasi angkon tangihononku i, jana paloasonku kehe bangso Israel? Nada hutanda TUHAN i, jana halak Israel pe nada huloas kehe.”

³Didok si Musa dohot si Harun ma, “Debata ni halak Ibrani i, madung ro manopot hami. Loas ma hami kehe tu halongonan, hira-hira tolu ari mardalan daona, laho manghaulkon haul tu TUHAN Debatanami. Muda nada hami baen i, bunuonNia ma hami marhite nyae sanga porang.”

⁴Ninna raja i ma tu si Musa dohot si Harun, “Adong he na giot mangalalapi jolma i do di karejona maksudmunu? Suru ma markarejo angka hatoban i mangulahi!

⁵Madung umbahat bilangan ni bangsomu sian bangso Mesir. Saonnari giotmunu maradian halahi markarejo!”

⁶Laing di ari i sude panjago rodi bangso Mesir dohot angka mandur sian Israel manjagit parenta sian raja i.

⁷“Ulang be nilehen durame tu bangso i laho pauli batu bata. Padiar ma marsijalahi di ibana halahi.

⁸Tapi laing dokkon hamu anso laing dos bahat ni batu bata i dipauli halahi songon na salpu i, sada pe nada tola hurang. Na hurangan karejo do halahi; hara ni i do dibaen sai dipangido halahi anso huloas halahi kehe laho manghaulkon haul tu Debata ni halahi.

⁹Tambai hamu ma karejo ni halahi, ulang loas hamu maradian halahi, anso ulang sanga halahi manangihon barita-barita gabus.”

¹⁰Sude panjago rodi ni halak Mesir dohot angka mandur halak Israel kehe ma mandokkon tu halak Israel i. “Madung diparentahon raja i nada lehenon be durame di hamu.

¹¹Jalahi hamu ma sanga tudia, tapi nada tola hurang bahat ni batu bata i paulionmunu songon na somal.”

¹²Dung i mampar ma halak Israel i tu sude tano Mesir laho manjalahi durame.

¹³Sude panjago rodi i manyosak halak Israel anso dipauli halahi batu bata i dos bahatna, taran dilehen dope di halahi durame.

¹⁴Dipukul angka panjago rodi i do angka mandur halak Israel, na nikarejokon manjago karejo ni angka hatoban i. Disapai halahi do, “Biasi nada ra bangsomi pauli batu bata dos bahatna songon na salpu i?”

¹⁵Dung i kehe ma angka mandur ni halak Israel i mangadop tu raja i laho humolos, “Biasi songon i dibaen raja i tu hami?

¹⁶Nada dilehen be di hami durame, hape angkon pauli batu bata hami, jotjot hami dipukuli, raja i do nampuna tanggung jawab!”

¹⁷Dialusi raja i ma, “Na losok do hamu jana nada ra markarejo, hara ni i do dibaen ro hamu mangido tu au anso huloas hamu kehe laho manghaulkon haul tu TUHANmunu.

¹⁸Kehe ma hamu mangulahi markarejo. Nada lehenon durame di hamu, tapi angkon songon na salpu i do bahat ni batu bata baenonmunu.”

¹⁹Mangarti ma angka mandur i, bahaso na dung di bagasan hasusaan halahi dung didok, angkon dos bahat ni batu bata paulion ni halahi songon di ari na salpu.

²⁰Bulus kehe ma halahi jana marsuo tu si Musa dohot si Harun na dung painte-inte halahi.

²¹Ninna angka mandur i ma, “Madung diida Debata pambaenanmunu jana uhumonNia ma hamu, angke hara ni hamu do bonsirna gabe magigi raja i dohot angka parpangkat mida hami. Madung dilehen hamu alasan tu halahi, dalan laho mamunu hami.”

²²Dung i kehe ma si Musa manopot TUHAN jana ning ia ma, “TUHAN, biasi he dibaen Ho hamamago tu bangso on? Biasi disuru Ho au tuson?

²³Sian dung ro au manopot raja i mangkatai marhite goarMu, mur diparkanciti ia ma bangso on. Hape nada adong dibaen Ho sanga aha laho mangurupi halahi.”