Read Batak Angkola HARURUAR 6 Bible Online

HARURUAR 6 - Batak Angkola bible

HARURUAR 6

¹Dung i didok Debata ma tu si Musa, “Ligionmu ma saonnari sanga aha na giot baenonKu tu raja i. PaksahononKu ma tusia anso dipalua ia bangsongKu. Angkon paksaonKu ia anso dipatola ia kehe halahi sian luat on.”

²Mangkuling ma Debata tu si Musa, ninna ma, “Au do TUHAN.

³Ro do Au mandapotkon si Abraham, si Ishak dohot si Jakob, i ma Debata na gok kuaso, tapi nada Hupataridahon diringKu tu halahi marhite goar ‘TUHAN’ i ma goarKu na badia i.

⁴Hubaen muse do parjanjian dohot halahi. Madung Hujanjihon na giot lehenonKu tano Kanaan di halahi, luat inganan ni halahi najolo songon halak sileban.

⁵Madung Hubege angguk ni halak Israel, na niparhatoban ni halak Mesir i, jana gabe taringot Au tu janjingKi.

⁶Jadi baen ma boa-boa tu bangso Israel, bahaso madung Hudok tu halahi: ‘Au do TUHAN; sai na urupanKu do hamu jana paluaonKu sian parhatobanon ni bangso Mesir i. SurduhononKu tanganKu na gogo i mandabu uhum na dokdok tu bangso Mesir, jana paluaonKu hamu.

⁷Gabe bangsongKu ma hamu baenonKu jana Au gabe Debatamunu. Anso diboto hamu, Au do TUHAN Debatamunu di na Hupalua hamu sian parhatobanon di Mesir.

⁸ObanonKu ma hamu tu luat na dung Hujanjihon hian di bagasan sumpa tu si Abraham, si Ishak dohot si Jakob; lehenonKu ma tano i gabe nampunamunu sandiri, Au do TUHAN.’ ”

⁹Sude Tona Ni TUHAN i dipabolkas si Musa do tu bangso Israel, tapi nada ditangihon halahi be si Musa dibaen madung mandele halahi patunda ni hancitna parhatobanan i.

¹⁰Dung i didok TUHAN ma tu si Musa,

¹¹“Kehe ma ho mangadop tu raja ni Mesir i, jana dok ma angkon paloasonnia bangso Israel maninggalkon luat on.”

¹²Tapi dialusi si Musa ma, “Halak Israel sandiri, nada ra manangihon hatangku, mur ma raja ni Mesir i. Tutu do nada malo au manghobari.”

¹³Dung i diparentahon Debata ma tu si Musa dohot tu si Harun, “Dokkon ma tu bangso Israel bope tu raja ni Mesir i, bahaso na hutugaskon do hamu maroban bangso i, ruar sian Mesir.”

¹⁴Si Ruben, i ma anak siangkaan ni si Jakob, adong do opat anakna i ma: Si Hanokh, si Palu, si Hesron dohot si Karmi. Halak on ma na gabe ompu ni angka marga di horong ni si Ruben; digoari halahi do marga i mangihutkon goar ni halahi.

¹⁵Anak ni si Simeon adong do onom halaklahi: Si Jemuel, si Jamin, si Ohad, si Jakhin, si Zohar dohot si Saul, anak ni sada boru Kanaan. Halahi ma na gabe ompu ni marga na sian horong Simeon; digoari marga i mangihutkon goar ni halahi.

¹⁶Anak ni si Levi tolu halaklahi: Si Gerson, si Kehat, dohot si Merari; halak on ma ompu ni angka marga na sian horong Levi; angka marga i digoari mangihutkon goar ni halahi. Umur ni si Levi 137 taon.

¹⁷Anak ni si Gerson dua halaklahi: Si Libni dohot si Simei, bahat do pomparan ni halahi.

¹⁸Anak ni si Kehat opat halaklahi, i ma si Amram, si Jishar, si Hebron dohot si Usiel. Umur ni si Kehat 133 taon.

¹⁹Anak ni si Merari dua halaklahi i ma si Mahli dohot si Musi. Angka on ma marga sian horong Levi bope angka pomparan ni halahi be.

²⁰Dibuat si Amram do si Jokhebed gabe dadaborunia, i ma iboto ni amangnia, jana anaknia, i ma si Harun dohot si Musa. Umur ni si Amram 137 taon.

²¹Anak ni si Jishar tolu halaklahi, i ma si Korah, si Nefeg dohot si Zikri.

²²Si Usiel pe tolu halak anaknia halaklahi i ma: Si Misael, si Elsafan dohot si Sitri.

²³Marbagas ma si Harun dohot si Eliseba, boru ni si Aminadap; iboto ni si Nahason, ditubuhon ia do si Nadab, si Abihu, si Eleasar dohot si Itamar.

²⁴Anak ni si Korah tolu halaklahi i ma si Asir, si Elkana dohot si Abiasap. Halak on ma na gabe ompu ni horong ni marga ni si Korah.

²⁵Si Eleasar anak ni si Harun marbagas dohot boru ni si Putiel, anak ni halahi i ma si Pinehas. On ma horong sian Marga Levi.

²⁶Si Harun dohot si Musa na manjagit hata ni Debata na mandok, “Boan hamu ma halak Israel hombar tu angka pasukanna be haruar sian Mesir.”

²⁷Halahi na dua do na mandok tu raja Mesir i paluahon halak Israel.

²⁸Dompak manghobari TUHAN di tano Mesir,

²⁹didok TUHAN ma, “Au do TUHAN. Pabolkas ma tu raja Mesir, sude na dung Hudok tu ho.”

³⁰Dialusi si Musa ma, “Diboto Ho do na so malo au manghobari. Mungkin ma he ditangihon raja i hobarku?”