Read Batak Angkola HARURUAR 7 Bible Online

HARURUAR 7 - Batak Angkola bible

HARURUAR 7

¹Didokkon Debata ma tu si Musa, “BaenonKu ma ho songon Debata di jolo ni raja i, jana angkangmu si Harun songon panurirangmu mandok hata tusia.

²Pabolkas ma tu si Harun sude na Huparentahon tu ho. Suru si Harun mandok tu raja i, angkon paloasonnia do halak Israel maninggalkon Luat Mesir.

³Tapi mur patangkangonKu do roha ni raja i. Nada tangihononnia hatamu, hara ni i bahat ma Hupamasa hahomangan di Mesir.

⁴Hara ni i ma angkon uhumanKu Mesir dohot angka uhum na dokdok, dung i obanonKu ma bangso Israel bangsongKi haruar sian luat i.

⁵Dung i botoon ni halak Mesir i ma bahaso Au do TUHAN, di hatiha Huuhumi halahi jana Huoban Israel haruar sian luat ni halahi.”

⁶Sude na nitonahon ni TUHAN i dikarejohon si Musa ma dohot si Harun.

⁷Hatiha i 80 taon ma umur ni si Musa jana si Harun marumur 83 taon, di na kehe i halahi mangadop tu raja i.

⁸Mangkuling ma TUHAN tu si Musa dohot tu si Harun,

⁹“Muda dipangido Raja Parao baenonmunu hahomangan songon bukti, suru ma dibuat si Harun tungkotnia jana diambungkon ia tu tano di jolo ni raja i. Muba ma tungkot i gabe ulok.”

¹⁰Dung i kehe ma si Musa dohot si Harun manopot raja i jana dibaen halahi ma sude na niparentahon ni Debata. Didanggurkon si Harun ma tungkot i tu tano di jolo ni raja i dohot angka parpangkatna jana muba ma tungkot i gabe ulok.

¹¹Hara ni i dipiohon raja i ma angka halakna parelmu dohot parsibalik mata, gabe dibaen halahi muse ma songon i mangihutkon elmu ni halahi.

¹²Diambungkon halahi ma tungkot ni halahi tu tano i, muba ma tungkot i gabe ulok. Hape dibondut tungkot ni si Harun do tungkot ni halahi i.

¹³Haru pe songon i laing tangkang do raja i jana nada ra ia manangihon hata ni si Musa dohot si Harun, songon na nidok ni TUHAN hian.

¹⁴Dung i didokkon TUHAN ma tu si Musa, “Na jogal do roha ni raja i; laing nada dipaloas ia bangso Israel kehe.

¹⁵Hara ni i kehe ma ho mandapotkon ia manyogot on, dompak manuat ia tu Batang aek Nil. Oban ma tungkot na muba i gabe ulok, jana painte ma haroronia di topi ni batang aek i.

¹⁶Dokkon ma tu raja i, ‘Na disuru ni TUHAN Debata ni halak Ibrani do au mandok tu raja i, anso dipaloas raja i bangsoNa i kehe marsomba Ia di halongonan. Hape lopus saonnari, nada ditangihon raja i.

¹⁷Saonnari, Na Marmulia i TUHAN mandok, botoon ni raja i ma sian na giot baenonNia, sanga ise TUHAN i. Ligi da, lipatonku ma aek ni batang aek on dohot tungkot on, jana muba ma aek i gabe mudar.

¹⁸Marmatean ma angka ihan jana sun ma bau ni batang aek on, jabat nada tarinum halak Mesir i aekna.’ ”

¹⁹Didok TUHAN ma tu si Musa, “Suruhon ma si Harun mambuat tungkotnia jana dipagistang ia ma i tu ginjang ni sude batang aek, tu angka bondar-bondar dohot angka tobat na di Mesir. Gabe mudar ma aekna i, jana sap mudar ma sude luat i, lopus tu bagasan tong hayu dohot sambong batu pe sap ma mudar.”

²⁰Dibaen si Musa ma dohot si Harun sanga aha na niparentahon ni TUHAN i, di jolo ni raja i dohot angka na parpangkatna, diangkat si Harun ma tungkotnia jana dilipatkon ia ma tu batang aek i, jadi sude ma aek na di bagasan i muba gabe mudar.

²¹Marmatean ma angka ihan na di bagasan batang aek i jana santak bauna, jabat nada tarinum halak Mesir be aek i. Sap mudar ma tano Mesir sude.

²²Tapi laing dibaen angka parelmu ni raja i muse do songon i marhite elmu sihir ni halahi, gabe sai jogal ma roha ni raja i. Laing songon na nidok ni TUHAN, na so ra do raja i manangihon si Musa dohot si Harun.

²³Balik noma, kehe ia tu bagas godang, umpe diterge ia na masa i saotik pe.

²⁴Marsihuar ma sude halak Mesir di topi ni batang aek i laho manjalahi aek siinumon, hara ni na so tarinum be aek na sian batang aek i.

²⁵Ma pola pitu ari salpu dung diburai TUHAN Batang aek Nil i.