Read Batak Angkola HARURUAR 8 Bible Online

HARURUAR 8 - Batak Angkola bible

HARURUAR 8

¹Dung i didok TUHAN ma tu si Musa, “Kehe ma ho manopot raja i paboa ma disia hata ni TUHAN songon on, ‘Paloas ma bangsongKi kehe laho maribadat tu Au.

²Muda digagai ho, gohanKu ma luat on dohot tohuk songon uhuman.

³Gok ma Batang aek Nil dohot tohuk, jabat marruaran binatang-binatang i sian aek i ro tu bagas godangmu, tu bilik dohot tu podomanmu, angka bagas ni menterimu dohot rayatmu, lalu dope tu inganan parmasahan ni roti dohot tu angka hudonmunu.

⁴Mangamburi ma tohuk i tu pamatangmu, tu pamatang ni rayatmu dohot tu sude menterimu.’ ”

⁵Didok Debata ma tu si Musa, “Suru si Harun pagistangkon tungkotnia di ginjang ni angka batang aek, angka bondar dohot angka tobat pe, laho parohon angka tohuk jana sap tano Mesir.”

⁶Dung i dipahortang si Harun ma tungkotnia di ginjang ni sude aek i, gabe marroan ma angka tohuk manggohi luat i.

⁷Tapi dipasang angka parelmu i ma elmu sihir ni halahi muse, jana gok muse ma tohuk marruaran di sude luat i.

⁸Dipio raja i ma si Musa dohot si Harun, ning ia ma, “Tangiangkon ma tu TUHAN, anso dipakehe Ia angka tohuk on, dung i huloas pe kehe bangsomi manghaulkon haul tu TUHAN.”

⁹Dialusi si Musa ma, “Sian sonang ni rohangku hutangiangkon pe raja i. Tontuhon ma hatihana jana tangiangkononku ma raja i, angka menteri maradu sude rayat ni raja i. Dung i malua ma raja i sian gangguan ni angka tohuk i, jana nada adong be na tinggal asing sian na di Batang aek Nil.”

¹⁰Dialusi raja i ma, “Tangiangkon ma au ancogot.” Ninna si Musa ma, “Baenonku ma songon na nipangido ni raja i anso diboto raja i, nada adong Debata na asing na songon TUHAN, Debatanami i.

¹¹Nada gangguan ni tohuk be raja i, angka menteri dohot sude rayat i nada adong be na tading asing sian na di Batang aek Nil.”

¹²Dung i kehe ma si Musa dohot si Harun, ditadingkon halahi ma raja i. Dung i martangiang ma si Musa tu TUHAN anso diagohon sude tohuk na niparoNia tu raja i.

¹³Dioloi TUHAN do pangidoan ni si Musa i, sude tohuk angka na di bagas, angka na di alaman, bope na di ladang marmatean ma.

¹⁴Dipalagut halak Mesir i ma bangke ni tohuk i marturpuk-turpuk, jabat bau sude luat i.

¹⁵Dung diida raja i na dung marmatean sude tohuk i, dipajogal ia ma rohania mangulahi. Jana songon na nidok ni TUHAN, nada ra raja i manangihon si Musa dohot si Harun.

¹⁶Didok Debata ma tu si Musa, “Suru ma si Harun mangalipatkon tungkotnia i tu tano, dung i muba ma sude abu i gabe rongit di sude tano Mesir.”

¹⁷Jadi dilipatkon si Harun ma tungkotnia i tu tano. Dung i sude abu na adong di tano Mesir i muba ma gabe rongit, mangarongomi jolma dohot binatang-binatang.

¹⁸Angka parelmu sian halak Mesir i giot manguji elmu ni halahi mambaen angka rongit i, tapi nada malo halahi. Sap sude rongit,

¹⁹gabe didok angka parelmu sihir i ma tu raja i, “Debata do mambaen on!” Tapi laing jogal do roha ni raja i, jana songon na nidok ni TUHAN, nada ra raja i manangihon si Musa dohot si Harun.

²⁰Didok TUHAN ma tu si Musa, “Kehe ma ho ancogot sogot manyogot i mangadop raja i hatiha manuat ia tu batang aek i, jana pabolkas ma tusia hata on, ‘Paloas ma kehe bangsongKu maribadat tu Au.

²¹Muda digagai ho, Hupaingot hian ho na giot uhumonKu hamu marhite na parohon lanok tu ho dohot tu angka menterimu dohot tu rayatmu. Angka bagas na di Mesir angkon sap lanok, angka tano i pe gok lanok.

²²Tapi asing baenonKu anggo tu tano Gosen, inganan ni bangsongKi. Anggo disi nada adong lanok, anso diboto hamu, Au do TUHAN na manguhum luat on.

²³PatidahononKu ma asing ni bangsongKu sian bangsomu. Ancogot ma masa hahomangan i.’ ”

²⁴Dung i diparo Debata ma lanok bahat situtu manggohi bagas godang ni raja i dohot bagas ni angka menterinia i. Markancit situtu do na satano Mesir patunda ni lanok i.

²⁵Dung i dipio raja i ma si Musa dohot si Harun, ning ia ma, “Kehe ma hamu manghaulkon haul tu Debatamunu di luat on.”

²⁶“Nada tarpatupa hami i,” ninna si Musa mangalusi, “harana gabe hancit roha ni halak Mesir i, hara ni pahan-pahanan na hami haulkon tu TUHAN Debatanami. Muda gabe hancit do roha ni halak Mesir i hara ni pahan-pahanan na hami sambol jana na hami sombahon di inganan na bolas idaon ni halahi, gabe dangguran ni halak Mesir i ma hami dohot batu lopus mate.

²⁷Angkon tu halongonan do hami kehe tolu ari pardalanan daona laho manghaulkon haul tu TUHAN Debatanami, songon na niparentahonNia hian tu hami.”

²⁸Ninna raja i ma, “Hupaloas pe hamu kehe tu halongonan, laho manghaulkon haul tu TUHAN Debatamunu i, asal ma ulang dao hamu kehe. Antong, tangiangkon ma au!”

²⁹Dialusi si Musa ma, “Antong disi kehe hami, tangiangkononnami ma tu TUHAN anso markehean lanok i sian raja i, sian menteri-menteri bope sian rayat i. Tapi ulang be paoto-oto hami, jana ulang ambati bangso Israel kehe manghaulkon haul tu TUHAN.”

³⁰Kehe ma si Musa maninggalkon raja i jana martangiang tu TUHAN,

³¹ditangihon TUHAN do tangiang ni si Musa i. Morot ma lanok i sian raja i, sian angka menteri dohot sian rayatnia i. Umpe sada lanok i na tading.

³²Tapi dison pe tong do dipajogal raja i rohana jana nada diloas ia kehe bangso i.