Read Batak Angkola JOB 1 Bible Online

JOB 1 - Batak Angkola bible

JOB 1

¹Di tano Us maringanan ma sada bayo na margoar si Job. Marsomba tu Debata do ia jana setia tuSia. Halak na burju do pangalahonia jana saotik pe nada dibaen ia hajahatan.

²Adong do pitu halak anaknia jana tolu borunia.

³Tamba ni i bahat do angka naposonia, pitu ribu biri-birinia, unto tolu ribu, lombu saribu dohot halode lima ratus. Pendek hata dohonon, ia ma na kumayo sian sude halak na maringanan di Luat Habincaran.

⁴Somal do angka anak ni si Job na pitu i mambaen pesta di bagas ni halahi margonti-gonti. Dipadohot muse do di pesta i boru ni si Job na tolu i, jadi rap mangan minum ma halahi sude.

⁵Ganop abis pesta, sai sigop do ngot si Job jana dihaulkon ia ma haul salaho tu angka anaknia i anso disesa Tuhan dosa ni halahi. Harana didok rohania betak na dung mardosa do angka dakdanaknia i jana pabilehon Debata sian na so pamotoanna.

⁶Di na sanoli mangadop ma angka mahluk pardibanua ginjang tu TUHAN jana dohot ma mangihut di tonga-tonga ni halahi Sibolis.[1]

⁷Disapai TUHAN ma tusia, “Sian dia ho?” Dialusi Sibolis ma, “Na baru madang-adang dope au pahae-pahulu jana hubolusi sude portibi.”

⁸Dung i disapai TUHAN muse ma, “Madung he dipamanat ho si Job naposongKi? Sude jolma na di portibi nada adong halak na songon i burjuna dohot denggan ni rohana. Marsomba tu Au do ia jana nada mambaen hajahatan ia.”

⁹Tapi dialusi Sibolis i, “Tontu antong marsomba tu Ho si Job, angke manjagit upa ia.

¹⁰Sai dijagohon Ho do antong ia, pangisi ni bagasnia dohot sude sinadongannia. Dipasupasu Ho karejonia jana dilehen Ho disia bahat pahan-pahanan jabat tuk pakeon ni halak saluat.

¹¹Tapi sugari rupani dibuat Ho sandok sinadongannia i, musti diburai ia Ho di joloMu!”

¹²Gabe didok TUHAN ma tu Sibolis, “Antong, baen ma sanga aha tu sasude sinadongan ni si Job, asal ma ulang diparhanciti ho ia!” Bulus kehe ma Sibolis sian jolo ni TUHAN.

¹³Dung adong sadia honok marpesta ma angka dakdanak ni si Job di bagas ni siangkaanna.

¹⁴Jadi ompot ma ro sahalak hatoban marlojong tu bagas ni si Job paboahon, “Tuan, ma ro halak Seba mangalo hami dompak mamangkur ladang angka lombu jana angka halode hatiha manjampali di lambungna i. Madung dirampas halahi angka pahan-pahanan i jana dibunu halahi angka hatoban ni tuan i na adong disi. Hum sasada au ma i na malua anso laing adong paboahon barita tu tuan i.”

¹⁶Mangkobari dope ia, ro muse ma hatoban na paduahon mandok, “Ma disoro ronggur angka biri-biri ni tuan i, dohot angka parmahanna, mate sude. Hum sasada au ma i na malua anso laing adong na paboahon tu tuan i.”

¹⁷Inda sidung dope ia mangkobari, ro ma hatoban na patoluhon paboahon, “Tolu rombongan pasukan ni halak Kasdim ro mangarampas angka unto ni tuan i jana dibunu do angka hatoban ni tuan i. Hum sasada au ma i na malua anso adong na paboahon barita tu tuan i.”

¹⁸Dompak mangkobari dope ia, ro ma hatoban na asing maroban barita, “Na marpesta do angka dakdanak ni tuan i di bagas ni siangkaan i.

¹⁹Jadi ma ro halingsungsung mangombus sian sabola parhorsihan jana ditondong ma bagas i lopus rumpak jana mate do sude anak ni tuan i didondoni. Hum au sajo ma i na malua anso adong na paboahon barita tu tuan i.”

²⁰Jadi jongjong ma si Job, jana disibakkon ia ma pakeannia tanda ni marsakna. Dicukur ia ma ulunia, marsomba ma ia mandok,

²¹“Nada adong bagi na ahangku di na nitubuhon au, jana mate pe au nada mardiha-diha. Madung dilehen TUHAN i sudena jana Ia muse do na mambuatsa. Nipuji ma goar ni TUHAN i!”

²²Jadi haru pe dibolus si Job sude sitaonon i, nada mardosa ia jana nada dipasala ia Debata.