Read Batak Angkola JOB 10 Bible Online

JOB 10 - Batak Angkola bible

JOB 10

¹Loja au jana magigi paida-ida ngolungku. Gabe huusehon na paet di rohangku.

²Ale Debata, ulang ma da au sai pasala. Patorang ma da dialo Ho iba hara ni aha.

³Aha ma labona muda iba dipisat Ho songon on, jana muda diambungkon Ho suha ni karejoMon? Aha ma he na ro muda dihobuk Ho pandapot dohot tahi ni parjahat i?

⁴Nada sarupa pangaligianMu tu parnidaan ni jolma

⁵jana umurMu pe nada songon halahi pendekna.

⁶Antong anggo songon i, biasi pola sai sihiranMu dosangku, biasi sai kojaronMu ganop hasalaanku?

⁷Diboto Ho do nian jana torang di rohaMu, na bonar jana na so marsala au. Jana umpe sahalak na margogo palua iba sian tanganMu.

⁸Na nigana ni tanganMu do iba, songon dia do i muda iba saonnari baenonMu pusa?

⁹Ingot ma na sian tano liat do dijadihon Ho iba! Biasi angkon mulak gabe abu baenonMu iba?

¹⁰Dipaloas Ho ma hape damang manjadihon au jana dipagodang Ho di bortian ni dainang au.

¹¹Dibaen Ho ma rupa ni pamatangku marholi dohot marurat dibaen Ho marjuhut holi-holingku jana marbobak.

¹²Dilehen Ho ngolu di au; dihaholongi Ho au, dijago jana diparmudu-mudu Ho hosangku.

¹³Hape saonnari ma anso huboto di na sahonokna i, sip-sip madung ditahi rohaMu hamagoanki.

¹⁴Sai dipamanat Ho do au betak sai mambaen sala, anso tartulak Ho mangalehen hasesaan ni dosa.

¹⁵Muda au mambaen dosa, gabe mago ma bagianniba! Hape muda soada iba targora, laing na tong ma iba sipardosa! Nada puluk iba mandorgak, hara ni raso na bile jana na marsak.

¹⁶Muda mandapot iba haru pe nian so sadia, mangayak ma Ho tu au songon singa. Jana dipatudu Ho ma mangulahi kuasoMu, hum na giot mangago tu au.

¹⁷Sai hot ma dipajuju Ho saksi mangalo au; jana mur martamba ma tu au rimasMu. Dipajuju Ho ma angka paranganMu na imbaru laho mangaroro lalu mamorangi au.

¹⁸Biasi padiaronMu au sorang tu portibi on? Dumenggan iba jolo mate, dompak so tarida jolma!

¹⁹Gabe songon na so unjung topak iba, angke sian bortian hian tu kuburan noma.

²⁰Iale, mate ne ma da iba. Padiar ma da mamunjung iba, anso tardai iba tingki na tading on di iba.

²¹Santongkin nari noma anso kehe au jana nada mulak, mandapotkon luat na holom jana manggolap.

²²Luat na homur na gok halinu ni hagaoran, sarupa ma disi sinondang dohot hagolapan.”