Read Batak Angkola JOB 11 Bible Online

JOB 11 - Batak Angkola bible

JOB 11

¹“Inda he hata na rumar i, na ingkon nilehen alusna? Angkon nipatigor ma he siparhata-hata gabus?

³O ale Job, diambang ho dehe lakna na so taralusi hami ho? Ning rohamu lakna hohom ma hami baenon ni incakmu?

⁴Rohamu do mandok na so sala hatami. Na ias ma ho da di jolo ni Debata ning rohami.

⁵Tapi sai anggiat ma Debata sandiri mandok hata!

⁶Jana dipaboa Ia ma nian tu ho, na bahat do suhi ni habisuhon, jana na so haastuan jolma. Jadi botoonmu ma sugari na so sadia do dangolmi, martimbangkon uhuman na patut tanggungonmi.

⁷Bia ma he pandodomu di bako ni Debata? Tardodo ho ma he gogo ni kuasoNa?

⁸Gumincat sian langit do da kuasoNia, na so tolap ho do mandungdung manjujarsa. Dao umbagas do kuasoNia sian portibi hamatean, nada haastuan ho i sanga andigan.

⁹Umbidang do kuasoNia sian portibi, jana umbolak sian bidang ni laut raya.

¹⁰Muda ditangkup Ia ho jana ditogu tu paruhumanNia, gabe ise ma na puluk mangambatisa?

¹¹Ditanda Debata do angka jolma na so marguna nada buni hajahatanna sian panatapanNa.

¹²Muda bisa halode manubuhon jolma, baru pe bisa halak na bodo gabe marbisuk.

¹³O ale Job, paias ma rohami, manyosal ma ho! Martangiang ma ho tu Debata!

¹⁴Salpuhon ma dosa sian rohamu jana padao ma hajahatan sian bandarmu!

¹⁵Gabe benget ma iba jana margogo mangadopi ngolu. Hot ma parjongjongmu togu jana nada pola be marganggu.

¹⁶Salangkan dangolmu nada be sai ingotonmu. Songon parsurut ni aek magodang, sian parningotan salpu.

¹⁷Tumorang ma ngolumu sian tingki ni arian, jana na gumolap di ari ni ngolumu gabe songon mataniari bincar marsinondang.

¹⁸Hot noma ho jana gok arop ni roha. Linggoman ni Debata ma ho anso marhasonangan.

¹⁹Nada habiaranmu be musumu. Jana bahat ma halak mangido urupanmu.

²⁰Tapi anggo parjahat sai balangboling panailina, hara ni na so adong pangambilingan dapotsa. Hum sada noma arop ni rohana, i ma dung dapot ujung ni ajalna.”