Read Batak Angkola JOB 12 Bible Online

JOB 12 - Batak Angkola bible

JOB 12

¹“Na tutu ma da i, hamu ma wakil ni jolma manusia. Muda mate hamu, salpu muse ma habisuhonna.

³Au pe laing jolma na marroha do da; huastui do sude i na nipardokkonanmunu hata. Boti muse, ise ma he na so mangastui i be? Jadi ulang ning rohamunu na sumurung hamu sian au, ale!

⁴Sipartataan ni dongan au dohot ale-ale, hape tigor do iba so marsala. Najolo dialusi Debata do tangiangniba, muda mangido tolong iba tuSia.

⁵Marbile au dibaen hamu, hape marsonang-sonang hamu mangolu. Tu halak na giot tinggang diantukkon hamu umban-umban.

⁶Hape ngolu ni panyamun so adong mangondam. Angka na puluk mangalo Debata mangolu do soada mara. Hape debata sisoada do diasangkonsa, i ma pos ni rohana hum tu gogona.

⁷Marsapa ma tu unggas dohot tu pahan-pahanan anso hamu dapotan pangajaran.

⁸Pangido ma tu ihan dohot suan-suanan hatorangan gabe manjagit ma hamu hatangkasan.

⁹Ise ma he sian sudena i na so tangkas umbotosa, na Debata sandiri do manompasa?

¹⁰Ia do na mangatak mangatur sasudena na nitompa. Jana na kuaso di hosa ni ganop jolma manusia.

¹¹Songon dilaniba na sai giot mandai na lambok, laing songon i do pinggolniba sai giot tumangi na nidok.

¹²Ninna, di halak siginjang umur do bisuk dohot roha. Hape anggo bisuk dohot gogo hum adong di Debata sajo ma. Tutu adong ma parbinotoan di halak na matobang, hape anggo pangastuion dohot kuaso laing di Debata do sapanjang!

¹⁴Sanga aha na nibungkarNia nada be tarpajongjong mangulahi, sanga ise na nitabanNia nada be tarpaluai.

¹⁵Ditambok Ia aek, gabe hiang jana marigang ma sudena. Dibulak Ia mangulahi, gabe mangalantap ma banjirna.

¹⁶Na gogo do Debata, tahan jana na godang! HatobanNia do angka na lilu dohot na paliluhon.

¹⁷Diela Ia bisuk sian parkuaso di pamarenta, jana angka pamimpin gabe sipartataan dibaen Ia.

¹⁸Ditunggalingkon Ia raja jana ditaban Ia halahi.

¹⁹Dipatoruk Ia angka malim dohot angka pangituai.

²⁰Dihuntam Ia halak na nihaposan. Diendat Ia bisuk ni angka halak na tobang.

²¹Dipaila Ia angka pangarajai, jana dipaujung Ia daulat ni halahi.

²²Dipatorang Ia inganan na mangarambon, disondangi Ia angka halinu na golap mangalomlom.

²³Angka bangso dibaen Ia ma gabe jana maduma, lopus diabiskon Ia halahi gabe sisoada.

²⁴Angka pamimpin dibaen Ia so martontu di pikiran, gabe madang-adang halahi so martujuan.

²⁵Gapa-gapa ma halahi di hagolapan, jana marlenongan songon na mabuk di parminuman.