Read Batak Angkola JOB 13 Bible Online

JOB 13 - Batak Angkola bible

JOB 13

¹Unjung do huida sudena i, jana torang do huastui.

²Laing huboto do, sanga aha pe na nibotomunu. Ulang diambang hamu talu iba tu hamu.

³Tapi anggo au na giot mangkobari noma tu Na Sun Kuaso. Di joloNia do giotku belaonku parkaro.

⁴Dibaen ditutupi ho do otomu dohot gabus, nada adong imbarna songon angka datu pargabus.

⁵Sugari na so mandok hata hamu nian, betak na niambang do hamu halak parguruan.

⁶Jadi tangihon bo panuhaskon, parrohahon ma pangampiningku.

⁷Tola ma he mangasahon Debata, margabus iba? Bolas ma ulaning marbungkak laho tu haporluanNia?

⁸Tola ma he hamu mamihak tu Debata, jana martangkang mangondihon Ia?

⁹Muda dipareso Debata ho, denggan ma ulaning dapotna? Tarpaoto hamu ma he Ia songon na manggabusi jolma?

¹⁰Muda pe mamihak hamu, haru pe di na buni, laing na uhuman ni Debata do hamu jana dimuruhi.

¹¹Na so tarsonggot dehe rohamu baenon ni hagodangan ni Debata? Adong he na so heput be rohamu dibaen hasogironNa?

¹²Songon abuan na so hasaya do sandok sipaingotmu; songon tano buro na mura matapor do pambelaanmu.

¹³Hara ni i pahohom ma, padiar ma au da mandok hata! Nada parduli au sanga aha pe patundana!

¹⁴Madung singkop do da au manyabung hosa!

¹⁵Nada parduli be di bagi aha hara ni dele ni roha! Muda giot bunuon ni Debata iba, rohana ma diSia. Tapi anggo pangalahongku angkon ampinanku di joloNia.

¹⁶Betak malua iba baenon ni habaranionniba, angke anggo parjahat nada puluk i mangadop tu Debata!

¹⁷Saonnari tangkas ma parate-atehon pandohanku, parrohahon ma hatoranganku.

¹⁸Madung sidung huhobasi bukaon parkarongku; pos do rohangku, nada tarbaen dipasala au!

¹⁹O Tuhan, betak sai ro Ho jana manuhas au, hohom noma da au, painte ujung ni ngolungku.

²⁰Tapi oloi ma jolo pangidoanku na dua on, anso laing puluk iba mangulahi ro tu joloMon:

²¹antak ma da mamparhanciti au, jana ulang be dondoni au dohot hasogironMu!

²²Dokkon ma da hata, anso maralus iba. Sanga au ma mandok hata, lalu lehenonMu ma balosna?

²³Sadia bahat ni sala dohot dosa na hupatupa? Sugari nian dipajojor Ho ma da sandok pangalaosionniba!

²⁴Biasi mandao jana sumisi Ho sian au? Hara ni aha umbaen dietong Ho au musuMu?

²⁵Hum bulung-bulung na madabu diombus alogo do iba, hagamangkononMu ma he au? Hum durame na hiang jana na malos do iba, patut ma he pakojar-kojaronMu au?

²⁶Na paet do ditontuhon Ho ngolu bagianku, dibaloskon Ho do hasalaanku dompak di haposoonku.

²⁷Ditambat Ho do patku dohot rante bosi; sude panggulmitonku Ho do manjagoi. Salangkan palampak ni patku, nada taldus sian panatapanMu.

²⁸Gabe pora do au songon hayu na busuk; songon abit na nipangan ni ngitngit gabe lapuk.