Read Batak Angkola JOB 14 Bible Online

JOB 14 - Batak Angkola bible

JOB 14

¹Mamungka sorang jolma gale so margogo; pendek ngoluna sai mardamoro.

²Mangerbang ia jana malos songon bunga; salpu songon halinu lalu mago so tarida.

³Ale Debata, ra ma he Ho manatap au, jana paadop au tu paruhumanMu!

⁴Tarbaen ma he jolma pardosa parohon na sanggam soada hurangna?

⁵Na dung nitontuhonMu do umur ni jolma dipastihon Ho do bilangan ni bulanna. Ditontuhon Ho muse angka batas ni ngoluna na so tarbaen be i salpuannia.

⁶Padiar ma ia maradian, ulang be nigangu ia; anso tardai ia ngolunia lopus simpul karejona.

⁷Laing ra dope hayu na nitaba, mangulahi martumbur, lalu mardangka.

⁸Haru pe busuk uratna di bagasan tano, jana tungkona mate hara ni lapuk,

⁹tapi muda dais aek, mangolu ma mangulahi; songon simarata na marpupu sai martunasi.

¹⁰Hape mate jolma i, abis ma parsorionna; marujung ma ngolunia, gabe tu dia noma kehena?

¹¹Songon aek na marombun sian tobat, songon parsurut ni aek lopus abis,

¹²songon i muse ma jolma na mate: jongjong mangulahi nada tarbaensa be. Nada tarsunggul be i sapanjang langit mangembang, manggulot pe nada ra be, di podomanna ma sapanjangna.

¹³Paloas au martabuni di portibi ni halak na mate i. Linggomi ma au lopus di parmombun ni murukMu. Tapi tontuhon hatihana laho marningot tu diriniba.

¹⁴Angke muda mate jolma i, tarbaensa ma he mangolu mangulahi? Sian ari tu ari au sai tarpainte lopus ari-ari hapaetanku solpu pate.

¹⁵Gabe pioonMu ma iba, jana au pe mangalusi ma; holong ma rohaMu mangulahi mida au, mahluk na nijadihonMu.

¹⁶Jadi mataanMu ma sandok langkangku, tapi nada rohahononMu be anggo dosangku.

¹⁷SesaonMu ma dosangku jana pasidingonMu; salangku pe angka na salpu sesaonMu.

¹⁸Sanoli on mangkatolbak ma angka dolok jana marsursuran, jana angka dolok batu na tohong humusor ma sian ingananna.

¹⁹Angka batu pe gisgison ni aek na doras; tano pe ayupon ni udan na doras. Songon i ma disegohon Ho arop ni roha ni jolma.

²⁰Ditaluhon Ho do ia sapanjangna, gabe kehe ma ia; dipaorot Ho do ia jana muba ma rupana. Dung i diparenta Ho kehe ia.

²¹Angka dakdanakna gabe halak na marmulia, tapi nada jabat be diboto ia. Jana muda sanga halahi marbile, nada adong halak na paboahon tusia be.

²²Hum barnit ni pamatangna noma hilalaonna; hum paniak ni ate-atena noma taonkononna.”