Read Batak Angkola JOB 16 Bible Online

JOB 16 - Batak Angkola bible

JOB 16

¹Jotjot do hubege pandapot na songon on; “Hum na pahancitkon do apo-apomon.

³Andigan pe he antahonmu hata na rumar on? Aha dehe na manyosoi rohamu mangalehen alus?

⁴Sugari sura hamu au, jana au hamu, au pe laing malo do pajojor na nidokmunu. Husabur tu hamu hata na gara; mopeng-openg ma nibaen uluniba.

⁵Hupapir rohamunu dohot hata na denggan angka hatangku mambaen roha haapoan.

⁶Muda iba mandok hata, nada marguna jana muda hohom pe iba, na hancitniba nada ummaha.

⁷Debata do mambaen abis gogo iba, disintakkon do sude isi ni bagasniba.

⁸Dialo jana ditangkup Ia do au. Saonnari marniang mandamos do pamatangku, jana i ma tandana di halak na bahat na tutu au pardosa na jahat.

⁹Hara ni goyak ni rohaNa, pamatangniba jubak-jabik dibaen Debata; di santak ni murukNa manaili Ia tu iba.

¹⁰Maradu ngangang pamangan ni halak mangincahi au; marrongom mambalbal au jana ditampeleng dohot hurumku.

¹¹Dipasahat Debata do iba tu tangan ni na so hasaya; didabu muse tu tangan ni na so marguna.

¹²Sonang humani do ngolungku so adong susa hape ompot ma Debata mangalo manyaroso iba. Dijomak Ia ma tangkuhuk lalu disampakkon Ia au; dibaen Ia ma au panomboan ni jurukNia.

¹³Nada jabat adong ibo ni rohana torus manembak Ia tu au, lopus gabe use isi ni butuhangku.

¹⁴PangaroroNia songon ulubalang marporang, diparkanciti Ia iba so maralang-alang.

¹⁵Mamake abit goni ma au tanda ni hamarsahan, jana juguk di abuan hara ni hataluan.

¹⁶Marrarai bohingku hara ni na tangis; marbosoli lampak ni matangku marlombaman,

¹⁷hape nada au mangasa hagogoan; tangkas do na bulus pangidoanku maradopkon Tuhan.

¹⁸O tano, ulang ma tabunihon angka na sala na masa tu au. Ulang ma pahohom piopiongku na mangido hatigoran.

¹⁹Huboto do anggo pangidoanku di banua ginjang do; saksihononNia ma, anggo au na so mardosa do.

²⁰Diincahi jana dipartatai angka dongan iba; lalu tangis ma au mangido tolong tu Debata.

²¹Iale, sugari nian Debata sandiri ma mangampini di joloNia; songon halak na rade mangondihon ale-alena.

²²Nada sadia be angka taon ni ngolungku na tinggal i, kehe noma au santongkin nari jana nada mulak mangulahi.