Read Batak Angkola JOB 17 Bible Online

JOB 17 - Batak Angkola bible

JOB 17

¹Donok noma ajalku jana abis ne ma gogongku; hum tanoman noma na tading di au.

²Gabe siincahan ni halak noma iba; songon i ma roha-rohana manjajang hupaida-ida.

³Tigor do au ale Debata. Pos ma rohaMu di au! Ise dope he na tarbaen manungkoli na hudok?

⁴Ditutupi Ho do roha ni halahi jabat nada mangastui; ulang jabat nian tunduk iba baenon ni halahi.

⁵Songon pandohan, sanga ise na mangaduhon donganna hara ni hauntungan, anakna sandiri pe manjagit pamalosan.

⁶Saonnari tu iba ma dipadaihon pandohan i; laho manijuri bohingki, ro ma halahi.

⁷Rambon parnidaanku, hara ni pardangolan; sude pamatangku mandingkil songon na hurang mangan.

⁸Maradu tarsonggot jana homang halak na sole; halak na so marsala mandok iba na so marTuhan.

⁹Angka halak na denggan dohot na so marsala, mur marpos ni roha di pardangolan ni ngoluna na tumbuk tu Debata.

¹⁰Hape sugari ro halahi sude tuson, sahalak pe nada adong na bisuk sidapoton.

¹¹Salpu ma ariniba, sundat ma sude sangkap; mago muse ma sandok parsintaan ni rohaniba.

¹²Hape anggo ale-alengku mandok, ‘Arian do borngin i jana dapot ne ma na torang.’ Tapi huboto do di bagasan rohangku, matua sai manggolap noma na masa tu au.

¹³Hum tano hamatean noma da arop ni rohaniba, giot disi ma iba modom di na golap bulita.

¹⁴‘Damang,’ noma goaranku tanomanki, jana angka goya sipangan sibukki goaranku ma, ‘Dainang’ dohot ‘Ibotongku’.

¹⁵Di dia dope arop ni roha di au; ise dope na dumpangan hamogaan baen di au?

¹⁶Muda manuat au tu tano ni na mate, nada adong di au siaropon be.”