Read Batak Angkola JOB 19 Bible Online

JOB 19 - Batak Angkola bible

JOB 19

¹“Aha ma he angkon sai pupuonmunu pabile-bile iba, jana marhancit au dibaen hamu sai hona hata?

³Mulak-ulak sai dipahancit hamu rohangku, jana sai dipahanciti hamu au so mamboto malu.

⁴Sugari sala pangalahongku, nada adong bagi aha rugimunu.

⁵Diambang hamu ma na sai dumenggan hamu ulang au; hasusaanki ma ning rohamunu tanda ni na sala au.

⁶Na he diboto hamu, na niparhancitan ni Debata iba, jana ditangkup Ia iba di tirangkap na nibaenNia.

⁷Mangarunta do au hara ni jorbut ni pambaenNia, hape umpe sahalak na mamarate-atehon iba. ‘Di dia dehe hatigoran,’ sai ningiba mangangguhi, hape tu iba nada adong na manangi.

⁸Ditutup Debata dalan di au, nada tarbolus au, golap do dibaen Ia dalanku.

⁹Dirampas Ia do sude sinadonganku, jana hadengganan ni goarki disegohon Ia.

¹⁰Sai dilibas Ia do iba sian sude na masa, songon halak na mangurati suan-suanan, dipadiarsa do i marhancit lalu rahar, songon i ma pambuatNia di sude arop ni rohaniba.

¹¹Maradu marapi purun tu iba muruk ni Debata; gabe musuNa iba dietong rohaNa.

¹²Nada tarambat pangaroro ni paranganNa, dihuar halahi ma bondar jana dihobuksa bandarniba.

¹³Dipadao Ia sian au angka koum sisolkotku; gabe halak na asing noma au di angka sitandaanku.

¹⁴Mandao ma sude ale-alengku; angka tamu di bagasku nada be marningot au.

¹⁵Naposongku dadaboru lupa do sanga ise au, tuanna; dietong rohana au halak na so sitandaanna.

¹⁶Hupio naposongku, hape nada ia mangalus, haru pe huelek ia mamake hata na halus.

¹⁷Gialan saripengku manganggo bau ni hosangku, donganku martinadohon umpe ra donok tu au.

¹⁸Angka dakdanak pe di dalan mambaen tu iba habilean; muda jongjong pe iba gabe sipartataan.

¹⁹Sogen angka donganku mida au; angka haholonganku mandao be ma sian au.

²⁰Maradu martanggurniang noma pamatang; na giot mate ne noma da iba, hosa i maradu habang.

²¹Hamu angka donganku, ibo ma jolo rohamunu mida au, angke tangan ni Debata do mamukul au.

²²Sai torus do au didondoni Debata; biasi ma Ia tiruonmunu? Na so tuk dope he sian hamu na hancit taononku?

²³Iale, sugari nian disuratkon ma na hupardokkoni on, anso laing adong sipaingot-ingoton;

²⁴sugari nian digorgahon ma tu batu na pir i anso laing hot tahan sian ari tu ari.

²⁵Huboto do anggo di banua ginjang, adong disi pangondianku; di ujungna ro Ia manolong au.

²⁶Haru pe huling-hulingniba magurbahi jana mangkabola, tapi anggo di ngolungkon, sai tataponku ma Debata.

²⁷Idaonku ma Ia jana au sandiri ma marnida Ia jana nada halak na asing be Ia di iba. Mandele au hara ni na nidokmunu,

²⁸‘Bia do baenonta manuntut ia?’ Manjalahi dalan ma hamu anso roroonmunu au.

²⁹Tapi, saonnari habiari hamu ma podang! Harana hona muruk jana hona uhum ni Debata do halak pardosa; jana tangkas ma botoonmunu, na adong do Debata manguhumi jolma.”