Read Batak Angkola JOB 2 Bible Online

JOB 2 - Batak Angkola bible

JOB 2

¹Mangulahi ro angka mahluk parbanua ginjang mangadop tu TUHAN, jana laing dohot do Sibolis di tonga-tonga ni halahi.

²Jadi disapai TUHAN ma tusia, “Sian dia ho?” Dialusi Sibolis ma, “Na sian paradang-adangan do au pahae-pahulu mamolusi portibi.”

³Disapai TUHAN ma, “Madung he dipamanat ho si Job naposongKi? Di sude portibi, nada adong na songon ia burjuna dohot denggan ni rohana. Marsomba tu Au do ia jana saotik pe nada adong dibaen ia hajahatan. Laing hot do setia ia tu Au, haru pe na dung nielekmu Au laho mangago ia sian na so dalanna.”

⁴Tapi dialusi Sibolis i ma, “Ummarga do da hosa sian arta. Ra do jolma mangambungkon sude sinadonganna asalkan ma laing mangolu ia.

⁵Sugari ma huparkanciti pamatangna i, musti buraannia Ho di joloMu!”

⁶Jadi didok TUHAN ma tu Sibolis, “Antong, baen sajo ma sanga na aha tusia, asal ma ulang dibunu ho ia.”

⁷Jadi kehe ma Sibolis sian jolo ni TUHAN, jana dipatubu ia ma baro sap sude pamatang ni si Job mamungka sian palampak ni patna i lalu tu ambubunia.

⁸Dung i juguk ma si Job di ginjang ni rompak na nitimbun, jana dibuat ia ma topik-topik ni ngarngar panghayo ni pamatangnia i.

⁹Didok na nibuatnia i ma tusia, “Aha dope umbaen na sai burju ho tu Debata? Tole ma da, burai ma i, dung i mate ho!”

¹⁰Dialusi si Job ma, “Songon halak na bodo do pangkulingmu! Bia do parjadi ni i hum na denggan sajo jagitonta sian Debata, hape muda na jat tulahonta?” Jadi, haru pe dibolus si Job sude sitaonon i, nada adong didok ia hata na mangalo Debata.

¹¹Madung tarbege sitaonon ni si Job tu donganna tolu halak, i ma si Elifas na sian kota Teman, si Bildad halak Suah dohot si Sopar halak Naamah. Martahi ma halahi laho mangaligi lalu mangapoi ia.

¹²Tapi di na nitatap ni halahi ia sian na dao dope, jabat do giot so ditanda halahi be ia. Tangis ma halahi gogo jana disibakkon halahi ma pakean ni halahi lalu diparsampakkon halahi ma abu tu ginjang dohot tu ulu ni halahi.

¹³Pitu ari pitu borngin halahi juguk di tano i, di lambung ni si Job, umpe mandok hata sangkababa, angke songon i noma boratna diida halahi sitaononnia i.