Read Batak Angkola JOB 22 Bible Online

JOB 22 - Batak Angkola bible

JOB 22

¹“Sian tonga-tonga ni jolma manusia, nada adong sahalak pe na marguna. Haru pe na sun bisukna marroha, hum di dirina be do jolma marguna.

³Aha ma he guna ni i di Debata, muda dipambaeni ho hagiotNia? Adong ma he labo diSia, muda sanggam ngoluniba?

⁴Nada i hara ni biarmu mida Debata, ditudu ho jana nietong sala,

⁵tapi hara ni bahatna do dosamu, boti na sun jahat ni pambaenanmu dohot pangalahomu.

⁶Muda so targarar kahanggimu utangna, dirampas ho ma sude pakeanna.

⁷Halak na loja so dilehen ho inumonna, halak na malean pe nada dipio ho mangan.

⁸Mangasa jabatan ma ho dohot kuaso laho mambuat tano sasudena.

⁹Nada diurupi ho angka na mabalu, salangkan na tinggal menek pe laing diparhanciti ho.

¹⁰Hara ni i humaliangmu, rongom taon-taonan, jana tompu ma rohamu digohi habiaran.

¹¹Madung disonggopi hagolapan ho, gabe nada adong be idaonmu bagi aha; jana ayupon ni banjir noma ho.

¹²Nada he Debata na maringanan di langit pargincat, jana na manatap tu toru, tu angka bintang na sun gincat?

¹³Hape laing manyapai dope ho, ‘Aha diboto Ia? Di balik ni ombun do Ia, bia ma he baenonNia manguhumi hita.’

¹⁴Diambang ho do lakna holip panatapanNa baenon ni ombun di na mardalan Ia di batas antara ni langit dohot tano?[6]

¹⁵Adong he sai laing giot mamolus dope ho di dalan na nibolus ni angka parjahat?

¹⁶Dibuatkon do halahi dompak so dapot hatihana, jana diayupkon aek dompak di banjirna.

¹⁷Halahi ma da na puluk manulak Debata, jana na mangetong di bagasan rohana na so tarbaen Ia tu halahi sanga na aha.

¹⁸Hape nian Debata do na mambaen maradong halahi! Nada niastuan be da parpikir ni halak na so tontu i!

¹⁹Halak na denggan, martata do marmoga-moga, muda diidasa halak na jahat dapot di uhumanna.

²⁰Na dung sego do da sinadongan ni parjahat gabe sisoada, jana abis muse ma didilat api teba-tebana.

²¹Antong ale Job, mardame ma da ho dohot Tuhan, anso laing dumpangan ho di hasonangan. Muda dipatulus ho i, pasti dapot ho ma parlaboan.

²²Jagit ma na niajarkon ni Tuhan tu ho; simpan ma i sude di bagasan rohamu.

²³Mulak ma ho tu TUHAN di bagasan serep ni roha; antak ma da antong di bagasmu hajahatan.

²⁴Ambungkon ma da seremu na polinna i; danggurkon ma i tu tandolan ni batang aek na so maraek i.

²⁵Baen ma da Na Markuaso i gabe seremu, dohot perakmu na ummarga di rohamu.

²⁶Gabe sai porsaya ma ho tu Debata, jana botoonmu ma sian Ia do haroroan ni jop ni rohaniba.

²⁷Muda martangiang ho, alusanNia ma i, jana patulus ma antong janjimu sudena i.

²⁸Mardohar ma ho di sude karejomu, jana sondangan ni na torang ma dalanmu.

²⁹Patutoruon ni TUHAN do halak siginjang roha, hape anggo na serep marroha paluaonNa ma.

³⁰Urupan ni Debata ma ho muda soada sala jana muda dipatulus ho giotNia.”