Read Batak Angkola JOB 24 Bible Online

JOB 24 - Batak Angkola bible

JOB 24

¹Biasi nada ditontuhon Debata ari paruhuman, anso angka halak sitandaanNia maruli hatigoran?

²Sai adong do halak na paimbar tanda ni batas, anso tanonia martamba saruas. Ditangko halahi do biri-biri marhulanan, lalu dipabarasa di bara ni biri-birina.

³Halode ni na so marama so marina, dilojongkonsa; jana lombu ni ina na mabalu, dirampas baen gadena.

⁴Diambati halahi do halak na pogos laho mambuat hakna, gabe tarpaksa ma martabuni halak na so mardiha-diha.

⁵Jadi anggo sipogos i songon halode na riar do i manjalahi jampalanna di padang na potpot i; hum di inganan na songon i ma ia da dapotan panganon ia di angka anakna.

⁶Ladang ni na asing tarpaksa karejohononna; batu ni anggur ni parjahat angkon paluhutonnia.

⁷Marpakean soada ia boti so marulos, palas pamatang di borngin na ngali manorus.

⁸Lemlem ma ia di dolok hona udan na por situtu padamos badan simanare tu dolok batu laho marsilaung ulu.

⁹Diparhatoban halak na jahat ma dakdanak na so marama so marina, jana dibuatsa ma anak ni halak na pogos baen garar ni utangna.

¹⁰Kehe boti do halak na pogos so marpakean; male do ia dompak manggotil di ladang.

¹¹Dibaen ia do miak sian zetun dohot inumon sian anggur, hape anggo ia laing na manguas sun.

¹²Di angka kota na ribur tarbege do tangis ni na giot mate, angka na margasa pio-pio mangido dipature-ture, hape nada ditangihon Debata tangiang ni halahi be; umpe ra Ia mangarohahonsa dohot manerge.

¹³Adong do halak na pasilihon sinondang, nada tandaon ni halahi dalannia bope na so tarihutkonsa.

¹⁴Andos torang dope ngot ma sibunu jolma sian podomanna, lalu kehe ma ia mamunu halak na so mardiha-diha, jana dompak so torang dope ari, monjap-onjap ma ia sai songon panangko.

¹⁵Siparhamainan sai tarpainte ari potang; mamake panutup ni bohi ia anso ulang nitandaan.

¹⁶Mambuhar bagas ma panangko di borngin ni ari; mandao ma ia sian na torang di arian lalu kehe martabuni.

¹⁷Mataniari bincar habiaran godang do disia, hape anggo golap manyantak, i do na pasonang rohana.”

¹⁸[7]“Mayup do anggo parjahat baenon ni aek magodang, hona bura ni Debata tanona bope ladang; mamolngit noma kobun anggurna; nada adong be halak mangkarejohonsa.

¹⁹Songon ombun na mago dibaen logo dohot mataniari, songon i do pardosa dibondut tu bagasan kuburan.

²⁰Dipapangani goya halahi, jana dihalupahon inana i. Nada be sipaingot-ingoton goarna; dironcohon noma ia songon hayu na maburgat.

²¹Umbaen songon i pe, patunda ni na niparhancitannia ma na mabalu, jana marpangalaho na kejam tu ina na so marsinuan bulu.

²²Hape mardongan kuasoNa dibunu Debata do halak na gogo. Martindak ma Debata gabe putus ma arop ni roha ni halak na durako.

²³Dilehen Debata disia ngolu na sonang i, tapi nada marnamantak ia dimatai.

²⁴Santongkin do ia masonang, hape dung salpu i kehe ma ia sapanjang. Malos ma ia songon ruput na so marguna; songon burir ni eme na nisabi sian bonana.

²⁵Ise ma he tarbaen manggagai masa on, sanga manjua hasintongan ni na hudok on?”