Read Batak Angkola JOB 27 Bible Online

JOB 27 - Batak Angkola bible

JOB 27

¹“Mangasahon Debata na mangolu i na so mambaen hatigoran tu iba, mangasahon Na Markuaso i na sai paarsak roha,

³husumpahon: Salolot laing markosa au baenon ni Debata, sapanjang adong hosa di bagasan pamatangniba,

⁴nada ra bibirku paruar hata na so tutu, dilangku pe nada i mandok hobar na manipu.

⁵Jadi anggo au, nada ra au mandok bahaso na tutu hamu; lopus mate pe pos do rohangku, na so targora anggo au.

⁶Laing na marsitiopan do au tu pangoloionku, jana rohangku pe di bagasan laing na ias do i tutu.

⁷Sai hona uhum ma nian angka musungku songon sibaen na jahat, angka na magigi mida au songon halak na sumalin.

⁸Adong ma he siaropon ni roha ni halak na so hasaya di na ro Debata manunggu hosana?

⁹Tangihonon ni Debata ma he tangis ni halahi di hamamasa ni hasusaan mandondoni?

¹⁰Angkon sian Debata hian do nian halungunkononna hasonangan, jana nada marnaloja martangiang tuSia.

¹¹Huajari pe hamu salaho tu Debata Pargogo Na So Hatudosan; paboaonku ma tu hamu kuaso dohot tahi ni rohaNa.

¹²Nian, hamu sandiri pe madung marnida. Antong biasi dope datdatanmunu mangalehen sipaingot na so marguna?”

¹³“Songon on ma da pambaenna dibaen Debata Na Sun Kuaso manguhumi halak na jahat dohot na durako.

¹⁴Muda bahat anakna, marmatean ma i di parporangan jana marsingkor-singkor ma ngolu ni i marhahurangan.

¹⁵Kahanggina na tading i, mate hona bala ma i, jana umpe diandungi angka ina na nitadingkonna halahi.

¹⁶Bolas jadi do maradu bahat perak ni halahi dohot pakeanna maradu martinggangi

¹⁷hape gabe halak na ias roha ma nampuna perak dohot pakean i sudena.

¹⁸Songon asar ni tamboung na mura sego do bagas ni parjahat, parsantongkinan sajo do i songon sopo-sopo ni halak panjago.

¹⁹Dipapodom-podom ia dirina songon halak na kayo, hape nada be tarulahisa, di na ngot ia sian podomanna, mamago hape limpot sinadonganna.

²⁰Mandondoni ma na jorbut, songon aek magodang na ro maradu ompot. Alogo na gogo di borngin-borngin mangombus lalu mangalaoskonsa dopur.

²¹Dioban alogo Habincaran ia jana disapu ias ia sian bagasna.

²²Dijalahi ia do nian parondingan, hape anggo alogo i laing manondong ma so maralangan.

²³Dompak marlojong ia, marngius-ngius ma alogo i songon halingsungsung, mambaen ia mabiar hara ni hagogoan na mangagohon.”