Read Batak Angkola JOB 28 Bible Online

JOB 28 - Batak Angkola bible

JOB 28

¹[10] Adong do panombangan inganan ni perak nipambuatan, adong muse do inganan ni sere anso nipolinan.

²Sian bagasan tano dihuar do bosi, sian tumbaga didakdak do batu.

³Dibolus halak do na golap bulita, inganan na sabagas-bagasna pe dipareso roha. Disi di bagasan hagolapan i ma, dijalahi halak angka batu na mararga.

⁴Di simadao di inganan na so adong halak, di na so unjung didege bope dibolus halak, disi ma markarejoi halak lalu marsigantungi tu tali, di bagasan angka liang mamolngit na lobi.

⁵Dilehen tano do suhana baen balanjo ni jolma, hape laing di toru ni tano i muse ma, sude diluak-luak niparbalikkon lopus sude isi ni tano diparsarsarkon.

⁶Batu na di bagasan tano i marisi batu intan Lasurit, dohot abuanna i marisi sere na polin.

⁷Nada diboto halihi dalan tu panombangan i, hum habang pe di ginjangna nada unjung halihi bangar.

⁸Singa pe dohot binatang panyoro na asing nada unjung dope mamolus dalan na lungun laho tusi pe.

⁹Dihuar halak do batu na pir, dibungkarsa dolok lalu tu ojahanna.

¹⁰Di na mambaen liang di bagasan dolok batu, dapot ia ma batu na mararga situtu.

¹¹Lalu do tu angka mual ni aek dihuar ia, jana diungkap ia ma angka pangalaho na buni.

¹²Hape anggo bisuk di dia ma he jalahan? Di dia ma he hita marsiajar anso niastuan?

¹³Nada adong anggo bisuk di tonga-tonga ni jolma; nada adong na torang umboto argana na satutuna.

¹⁴Angka tandolan ni laut dohot laut na maradu bidang mandok: Nada adong anggo di au bisuk.

¹⁵Nada tarsambari bisuk haru pe tu sere na pita, jana dohot perak pe nada tararga.

¹⁶Sere dohot batu na ummarga pe nada tarbaen argana mangente.

¹⁷Sere sanga kaco na halus pe nada tarpartimbangkon tusi, nada tarasam dohot mutiha na lolot i.

¹⁸Ummarga do dao bisuk ulang pado humala, kristal dohot mutiara.

¹⁹Nada mardonok dope batu krisolit Etiopia sanga sere na polin, martimbangkon roha na marbisuk.

²⁰Di dia dehe haroroan ni habisuhon? Di dia do dapot hita parbinotoan?

²¹Nada adong unjung na mangolu mangaligisa, salangkan unggas na di awang-awang i pe nada marnidasa.

²²Hamatean pe dohot hamagoan mandok, hum barita sajo do na nibege ni halahi.

²³Hum Debata do na umboto sanga na di dia inganan ni habisuhon i, hum Ia do na mamboto dalan tusi,

²⁴hara na niidaNia do angka topi ni tano; sude na di toru ni langit dipamanat Ia do.

²⁵Di na nilehenNia gogo tu alogo i, jana dipahot Ia angka batas ni laut i;

²⁶di na nitontuhonNia inganan hadabuan ni udan, dohot dalan siboluson ni hilap dohot ronggur;

²⁷di hatiha i ma diida Ia habisuhon, diuji Ia ma hadenggananna, gabe sombu ma rohaNia.

²⁸Didok Debata ma tu jolma, “Angkon pasangopanmunu do DEBATA anso maruli bisuk hamu. Angkon mandao do hamu sian hajahatan anso dapotan parbinotoan hamu.”